Read Paite Chin VAIHAWMMITE 17 Bible Online

VAIHAWMMITE 17 - Paite Chin bible

VAIHAWMMITE 17

¹Huan, Ephraim tanggam ah mi khat a om a, a min Mikah ahi.

²Aman a nu kiang ah, “Dangka sang khat leh za khat nang apan lakmang a omte, nang leng na hamsiat leh ka zak mahmah a na genpen, ngai in, huai dangka ka kiang ah a om hi, kei lak ahi,” a chi hi. A nun, “Ka tapa TOUPA vualzawl in om hen,” a chi hi.

³Dangka sang khat leh za khat a nu a pekik a, a nun, “Hiai dangka kei khut mahmah in ka tapa in milim a bawlna ding leh milim a sunna din TOUPA kiang ah ka lan hi. Huaiziak in tuin k’on pekik ding” a chi hi.

⁴Huchi in huai dangka a nu a pekik a, a nun dangka za nih a la a, dangka sekmi a pia a, aman milim khuakthoh leh sunthohte a na bawl a, huaite Mikah inn ah a om uhi.

⁵Mikah in pathiante in a nei a, ephod leh milimte a bawl a, a tapa khat a siampu in a septuamta hi.

⁶Huailai in Israel gam ah kumpipa a omkei a; michih in a ma mit a dik a sakte a hihchiat mai uhi.

⁷Judah gam Bethlehem mi Judah nam, Levi chi tangval khat, huai ah a va om hi.

⁸Huai mi Bethlehem Judah khopi apan a pawt a, omna zong in a vak ahi. A vakna lam ah Ephraim tanggam a Mikah inn a va tung hi.

⁹Mikah in a kiang ah, “Koi apan hongpai na hia oi?” a chi hi. Aman a kiang ah, “Bethlehem Judah mi Levi chi ka hi a, omna mun zong a vak ka hi” a chi hi.

¹⁰Mikah in a kiang ah, “Ka pa leh siampu din ka kiang ah teng in, kum teng in, dangka sik tang sawm ka honpe dia, puansilh khat leh nek dingte leng” a chi hi. Huchi in Levi chi a lutta hi.

¹¹Levi chi, huai mi kiang a ten a lungkim hi. Huchi in huai tangvalpa a tapa khat bang in a omta hi.

¹²Mikah in Levi chi a septuamta a, huchi in tangvalpa a siampu in a pangta a, Mikah inn ah a tengta hi.

¹³Huchi in Mikah in, tuin zaw Levi chi ka siampu din ka neita hi. TOUPA’N a hon lamzang sakngei ding, chih ka thei, a chi hi.