Read Paite Chin VAIHAWMMITE 18 Bible Online

VAIHAWMMITE 18 - Paite Chin bible

VAIHAWMMITE 18

¹Huailai in Israel gam ah kumpipa a omkei. Dan chite’n gamluah ding a zong uh. Israel chite lak ah gamluah ding a tang naikei uhi.

²Dan suante’n a nam pumpi lak ua mi, pasalpha nga, Zoreah leh Eshtaol khua apan gam enkhe ding leh va entel din mi a sawl uh. A kiang uah, “Vakuan unla, gam va entel dih ua” a chi uh. Huchi in Ephraim tanggam a Mikah inn a va tung ua, huai ah a giak uhi.

³Mikah inn kiang a, a omlai un Levi chi tangval aw a thei ua, huailam a va zuan ua, a kiang ah, “Hiai a honpi kua ahia? Hiai mun ah bang ahia na hih? Bangchi’n ahia hiai a na ten?” a chi uhi.

⁴Aman a kiang uah, “Mikah in huchi in a hon na bawlta a, a hon guai a, a siampu in ka om hi” a chi hi.

⁵Amau a kiang ah, “Ka hohna ding uah ka lamzang ding uh hia ding lou, chih theihtheihna din Pathian hon dotsak dihve” a chi uhi.

⁶Siampu in a kiang uah, “Lungmuangtakin pai un. Na hohna ding ma uah TOUPA a om hi” a chi hi.

⁷Huchi in mi ngate a pawtkhia ua, Laish khua ah a lut ua, huai mite Zidon mite mah bang a galmuangtak leh lungmuangtaka om hithiat a om a va mu ua; amaute zahlaksak ding thuneimi kuamah a omkei a, Zidonte toh a kigamla ua, kuamah toh leng a kisaikha kei uhi.

⁸Zoreah leh Eshtaol khua ah a unaute uh kiang ah a hongpai ua; a unaute un a kiang uah, “Bangchi ahia oi?” a chi uh.

⁹Amau, “Thou dih ua, i sual ding uh. Gam ahihleh ka va mungei ua, ngai un, a hoih mahmah hi. Dai maimah ding na hi uhia? Huai gam valut a, valuah din zekai kei dih uh.

¹⁰Vahoh le uchin galmuanga om mite ahi chih nava muh ding uh, a gam lah a za mahmah ngal a. Pathian in nou a hon pekhinta hi. Lei a thil om ah zaw bangmah taksap ding a om hetlouhna mun ahi” a chi uhi.

¹¹Huchi in Zoreah leh Eshtaol khua apan Dan namte kidouna galthuam silh in mi za guk a pawtta uh.

¹²A va hohtou ua, Judah gam Kiriath-jearim khua ah om mun a bawl uh. Huaiziak in huai mun tunitan in Mananeh Dan a chilai ua, Kiriath-jearim tanglam ah a om hi.

¹³Huai apan Ephraim tanggam lam a zuan ua, Mikah inn a va tung uhi.

¹⁴Huchi in Laish gam enkhe dia mi nga pawtte’n a dawng ua, a unaute uh kiang ah, “Hiai innte ah ephod, milimte, milim bawltawmte, milim suntawmte a om chih na thei uhia? Huchi in bangchi’n ahia na hih ding uh ngaihtuah un” a chi uh.

¹⁵Huai apan a pai ua, Levi chi tangval omna Mikah inn ngei a va tung ua, a tungtang thu a dong uhi.

¹⁶Dan suan, mi za guk kidouna galthuam silhte kulh kongpi bul ah ading uhi.

¹⁷Mi nga gam enkhete a va hohtou ua, a lut ua, milim bawltawm, ephod, milimte leh suntawm milimte a la ua, siampu mi za guk kidouna galthuam silhte lak ah kulh kongpi bul ah ading hi.

¹⁸Huaite Mikah inn ah a valut ua, bawltawm milimte, ephod, milimte leh suntawm milimte a valak uleh, siampu in a kiang uah, “Hiai a bang hih na mai ua?” a chi hi.

¹⁹Amau, “Dai in, na khut in na muk hum inla, ka kiang uah hongpai inla, ka pa uh leh siampu ding un hongom in. Nang adin inn khat kia siampu a om hia hoih zaw, Israel lak a chi khat leh nam khat siampu dia om?” a chi uh.

²⁰Siampu lungtang a kipak mahmah a, huchi in ephod, milim, leh bawltawm milimte a la a, mipite lak ah a omta hi.

²¹Huchi in a paikhia ua, a nau neute uh, gante uh leh a vante uh a masuan touzel uh.

²²Mikah inn apan gamla kuam a paikhiak nung un Mikah invengte a ki kaikhawm ua, Dan suante a delhphata uhi.

²³Dan suante a sam uh. Amau a nunglam a nga ua, Mikah kiang ah, “Bang a chia ahia, mi huai zahzah n’on tonpih?” a chi uhi.

²⁴Aman, “Ka bawl pathiante leh siampu na paipih ua, na pai vengveng ua, bang ka neilai a? Bangziaka bangchi na hia, na honchih uh?’ a chi hi.

²⁵Dan suante’n a kiang ah, “Ka lak uah pau mawkmawk kei dih aw, huchilou in zaw mi thangpai khut na thuak kha dia, na inkawte toh na hinna na tan ding uh” a chi uhi.

²⁶Huchi in Dan suante a pai ua, Mikah in lah sualngam vual hi un a theikei a, a in lam ah a pai nawnta hi.

²⁷Mikah thilbawlte leh a siampu neih a paipih ua, Laish khua, galmuanga om hithiatte kiang a tungtou ua, namsau in a that ua; khua mei in a halta uh.

²⁸Zidon apan a gamlat mahmah ziak in a va hunkhe ding mi kuamah a omkei uh. A kuakua toh kizatna mahmah a neikei uhi. Beth rehob kiang as om phaizang ahi a, Khopi khat a lam ua, huai ah a tengta uhi.

²⁹A khaw min Israel tapa, a pu uh Dan tam in, Dan a sa uhi. Himahleh a tung in huai khaw min Laish ahi.

³⁰Dan suante’n huai milim bawltawm a dingkhe sakta uh. Mosi tapa Gershon tapa Jonathan leh a tapate, gamsal a pi a hih masiah uh Dan chite siampu ahita uhi.

³¹Huchi in Mikah bawltawm milim ahihleh Shiloh khua a Pathian inn a om laiteng a dingsak uhi.