Read Paite Chin VAIHAWMMITE 19 Bible Online

VAIHAWMMITE 19 - Paite Chin bible

VAIHAWMMITE 19

¹Huan, hichi ahi a, huailai a Israel gam a kumpipa a omlouh lai in, Levi chi a mi khat Ephraim tanggam tawplam ah a om a, Judah gam a Bethlehem mi mei in a nei hi.

²A mei in a angkawm san a, huchi in Judah gam a Bethlehem a a pa inn ah a taisan hi. Huai ah kha li tak a om hi.

³A pasal a thoua, a sikha leh a sabiltung nih pi in kamdam in a vakhem a, lungkim a pikik nawn tum in a va delhzui hi. Aman a pa inn ah a na pilut a, apan a na muh in a na kipahpih hi.

⁴A sungpa, numei pa’n a kiang a om din a na khou a; a kiang ah ni thum a om a, a ne un a dawn khawm ua, huai ah a tung hi.

⁵Hichi ahi a, a ni li ni’n zingkhang in a thoua, amah bel pawttumin a thou hi. Numei pa’n a makpa kiang ah, “Tanghou tawmchik ne in. Na lungtang hihhalh tadih inla, huaikhit chiang in na pai ding” a chi hi.

⁶Huchi in a tu ua, a nih un a ne un a dawn khawm uh. Numei pa’n huai mi kiang ah, “Lungkimtakin tuzan giak in, na lungtang nuamsak in” a chi hi.

⁷Huai mi bel pawt tum in a thou a, himahleh a sungpa’n a zolzol a, a giak nawnta hi.

⁸A ni nga zingkhangpi in pawt tum in a thou hi. Numei pa’n, “Na lungtang hihhalh tadih lechin a kei dia, nitak ni nem hun tanbek omtadih in” a chi hi. Huchi in a nihun an a nekhawm nawn uhi.

⁹Huai mi bel a mei leh a sikha toh pawt tuma a kisak leh a sungpa, numei pa’n a kiang ah, “Ngai in, ni leng a kaita, tu zan giak nawn mai inla, ni leng tum ding ahita. Hiai ah giak in; na lungtang a kipahna ding in. Huchi in zing chiang in zingkhang in na thou dia, in lam ah na pai mai ding” a chi hi.

¹⁰Himahleh huai mi huai zan giah a utkei a, a thou a, a pawtta hi. Jebus khozawn a tung a, huai bel Jerusalem khua ahi, sabiltung nih bawlsa a pi a; a mei leng a tel hi.

¹¹Jebus khaw kiang a tun un ni a kai mahmahta hi. Sikha in a pu kiang ah, “Hongpai dih, hiai Jebuste khopi ah i lutmai ding, i giakmai ding” a chi hi.

¹²A pun a kiang ah, “Israel suan hilou namdang khua ah lut lou e. Gibeah kholam i zuan zaw ding” a chi hi.

¹³A sikha kiang ah, “Kisa aw, hiai munte a koi zaw hiam i zuan ding. Gibeah khua ah hiam, Ramah khua ah hiam i giak ding” a chi hi.

¹⁴Huchi in a pai nawnzel ua; Benjaminte Gibeah khaw kiang a tun un ni a tumta hi.

¹⁵Gibeah khua a giak din a lut ua, a lut un huai khopi khaw lak ah a tu uh, kuamah a zintun ding a omkei uhi.

¹⁶Ngai in, nitaklam in putek khat loukuan a hongpai hi. Huai mi bel Ephraim tang gam a mi ahi a, Gibeah khua a om zual ahi. Amah Benjamin chite lak a ahi.

¹⁷A kihei leh kholak a mikhualpa a mu hi. Putek in, “Koi a hoh ding? Koi apan a hongpai na hia?” a chi hi.

¹⁸Aman a kiang ah, “Judah gam a Bethlehem apan Ephraim tangtawp gam lam a hoh ka tum uhi. Huai a om ka hi, Bethlehem, Judah gam ah ka va hoh a; tuin TOUPA inn ah hoh ka tum hi. Kuamah hon zintun a omkei hi.

¹⁹Ka sabiltung ua ding buhpawl leh gan an ka nei uh. Kei leh na sikhanu leh na sikhate kiang a omtangval ading leng tanghou leh uain a omlai a, bangmah taksap ka neikei uh” a chi hi.

²⁰Putek in, “Lungmuangtakin om in. Na kulna tengteng ken ka tumvek ding. Kholak ah zaw giak mahmah ken” a chi hi.

²¹Huchi in a inn ah a pilut a, sabiltungte an a pia a; a khete uh a sil ua, ne in a dawn uhi.

²²Huchi a nuamsa leh kipaktak a a omlai un, ngai in, huai khua a mi, Belial tapate khenkhat in huai inn a hon umta uh. Kongkhak a hongkhen ua; inn neipa putek kiang ah, “Na inn a hong tungpa hon pikhia in, ka luppih ding uh” a chi uhi.

²³Inneipa a kiang uah a va pawt a, a kiang uah, “Hilou e, ka unaute aw, hichitel a gilou zaw hih mahmah kei un. Hiai mi ka mikhual ahi. Hiai thil haihuai hihkei un, a chi hi.

²⁴Ngai un, hiai ah ka tanu nungak leh a mei a om uh. Amau k’on pikhe dia, amaute zahlaksakin na utut uh a tung uah hih un. Himahleh hiai mi tung ah zaw hiai thil gilou hih kei un” a chi hi.

²⁵Himahleh huai mite’n a thu a zui nuam kei ua, huchi in hiai mi’n a mei a man a, a kiang uah a va pikhia hi. Amau a na luppih ua, khovak masiah zankhua in a pawngsual uhi. Huchi in khua a hong vaktakin, a khah uhi.

²⁶Khua a hong vaktakin numei a pai a, a pu tunna pa inn kongpi bul ah a puk a, khovak nung tan in a om nilouh hi.

²⁷A pu zingsang in a hong thou a, inn kongpite a hong a, pai tum in a va pawt hi. Ngai in, a meinu kongpi bul ah a khutte inn sung lam nga in a na lum hi.

²⁸Aman a kiang ah, “Thou in, i pai ding” a chi hi. Himahleh a dawng kei hi. Huchi in a sabiltung tung ah a koihtou a; a thou a, a mun lam ah a paita hi.

²⁹A inn a tun in temta a la a, a mei a sem a, a guhte toh seh sawmlehnih in a semnen a, Israel gam teng ah a khak vek hi.

³⁰Hichi ahi a, a mu peuhmahte’n, “Israel suante Aigupta gam apan a hongpawt nung uh hichibang thilhih leh muh tutan in a om ngei nai kei. ‘Ngaihtuah unla, kihou unla, na lungsim uh gen un’ ” a chi uhi.