Read Paite Chin VAIHAWMMITE 2 Bible Online

VAIHAWMMITE 2 - Paite Chin bible

VAIHAWMMITE 2

¹TOUPA Angel khat Gilgal khua apan Bokim khua ah a hohtou hi. Aman, “Aigupta gam apan k’on pawtsak a, ‘na pipute uh kiang a kichiam a ka na chiamsa gam ah k’on pilut a, nou toh ka thukhun ka bohse kei hial ding.

²Hiai gam a tengte toh thukhung kei unla; a maitamte uh hih chip sak un’ ka chi hi. Himahleh ka thupiak na zuikei ua, bangziak in ahia hiai na hih uh?

³Huaiziak in, Amaute k’on delhkhiak sak nawn kei dia, na pang uah lingte ahi zawta ding ua, a pathiante uh nou adin thang ahi ding uh” ka chi ahi.

⁴Hichi ahi a, TOUPA angel in Israel suan tengteng kiang a hiai thu a gen leh mipite aw suah hial in a kap uhi.

⁵Huai mun min Bokim a sa ua; huai ah TOUPA kiang ah a kithoihnate a lan uhi.

⁶Joshua in mipite a kikhenzak sak nung in Israel suante michih amau tantuam gam chiat luah din a paita uhi.

⁷Joshua damsung leh upate Joshua kheng a dam teng, TOUPA’N Israelte adia thil thupi a hih tengteng mu mite damsung in mipite’n TOUPA na a sem uhi.

⁸Nun tapa Joshua, TOUPA sikha kum za leh sawm a upa a hih in a sita hi.

⁹Gaash tang mallam pang Ephraim tang gam a amah tantuam gamgi sung Timnath Heres khua ah a vui uhi.

¹⁰Amah khang a mi teng leng a pipute uh kiang ah a paikhawmta uhi. Amaute nung in TOUPA leh Israelte adia a thilhihte theilou suan dang a hong omta hi.

¹¹Israel suante’n TOUPA mitmuh in thil gilou a hih ua, Baal na a sem uhi.

¹²TOUPA, a pipute uh Pathian, Aigupta gam apan pikhepa a lehngatsan ua, pathian dangte, a kim ua tengte pathiante a zui ua, a bia ua, TOUPA a heh sakta uhi.

¹³TOUPA a lehngatsan ua, Baal leh Astoreth na a sem uhi.

¹⁴TOUPA Israelte tung ah a hehta a, amau doumite khut ah a pia a, a melma uh, a kim ua tengte kiang ah a khong a, a melmate uh a zouta kei uhi.

¹⁵Koipeuh ah hoh mahle uh TOUPA khut a tung uah a selam in a ke zel a, TOUPA’N a kiang ua kichiam a a gensa bang in. Huchi in buai namai in a buaita kei uhi.

¹⁶Himahleh TOUPA’N vaihawmmite a bawlsak a, huaite’n amau doumite khut apan a honkheta hi.

¹⁷Huchipi in leng a vaihawmmite uh thu a ngaikhe kei ua, pathian dangte kiang a angkawm in amaute a be zawta ua, a pipute un TOUPA thupiakte pom a a zuih uh lampi pen a pialsan pah maimah uhi.

¹⁸TOUPA’N vaihawmmite a bawlsak chiang in, vaihawmmi kiang ah TOUPA a om a, vaihawmmite damsung in a melmate uh khut apan a honkhe zel hi. Amau nuaisiahmite leh hih lungkhammite ziak a a mauna un, TOUPA a kisik sak hi.

¹⁹Himahleh hichi ahi a, vaihawmmi a sih khit chiang in, a nungtolh ua, pathian dangte zui a, a na uh a sep uah a pipute uh sang mah in a gamta se zawsem ua; a thilhihte uh leh a paupengna uh leng a tawpsan tuankei uhi.

²⁰Israelte tung ah TOUPA a hehta a; “Hiai namte’n a pipute uh thu ka piak, ka thukhun a bohsia ua, ka thu lah a ngaikhe kei ua;

²¹Huaiziak in tuban Joshua sih ma a delhkhiak louh namte ka delhkhiak sak nawn kei ding.

²²A pipute uh zuih bang a TOUPA dan zuih ding leh ding louh uh Israelte ze-etna din amau ka zang ding” a chi hi.

²³Huchi in TOUPA’N huai namte delhkhe pahlou in a om sakta a; Joshua khut ah leng a pekhe kei hi.