Read Paite Chin VAIHAWMMITE 20 Bible Online

VAIHAWMMITE 20 - Paite Chin bible

VAIHAWMMITE 20

¹Huchi in Israel suante tengteng a kisata ua, pheikhai lual in Dan khua apan Beer — sheba khaw pha in Gilead gam a mite toh Mizpah khua ah TOUPA kiang ah a kikhawmta uh.

²Mi tengteng heutu, Israel chite tengteng nangawn Pathian mite kikhopkhawmna ah a tel ua, sepaih namsau tawi mi nuai li ahi uhi.

³Benjamin suante’n Israel suante Mizpah khua ah a hohtou uh chih a za uh, Israel suante’n, “Bangchidan a hichibang a gitlouhna hongom ahia, honhilh un?” a chi uh.

⁴Levi chi, a thah uh numei pasal in, “Benjamin chite omna Gibeah khua ah ka mei toh giak din ka valut uh.

⁵Gibeah mite’n a hong sualta ua, zan in inn a hongum ua; honthah a tum ua, ka mei a pawngsual ua a sita hi.

⁶Huchi in ka mei luang ka sem a, Israelte gamluah tengteng ah ka khak a, Israel gam ah thil kihhuai leh haihuaitak a na hihta ngal ua.

⁷Nou Israel suante aw, na vek un ngai un, na ngaihdan uleh na phasak dan uh gen dih ua” a chi hi.

⁸Huchi in mi tengteng pheikhai lual in a thou ua, “Kuamah i puanin lam ah i pai hetkei ding, kuamah i inn ah i lut kei ding uh.

⁹Gibeahte i bawl ding dan hichibang ahi. Ai i san ding ua, amaute i dou ding uh.

¹⁰Gibeah mun a Benjaminte i vasualna ua mipite nekding pe din Israel nam tengteng lak a mi za khat ah sawm zel, sang khat ah za zel, sing khat ah sang zel i telkhe ding uh” a chi uhi.

¹¹Huchi in Israel mi tengteng pheikhai lual in huai khopi sual din a kikhawm uhi.

¹²Israel namte’n Benjamin nam tengteng kiang ah mi a sawl ua, “Na lak ua na hih uh bang gitlouhna ahia?

¹³Gibeah khua a mi Belial tate honpi unla, Israel gam a gitlouhna a daih theihna din ka na that ding uh” chi in mi a sawl uh. Himahleh Benjamin chite’n a unau Israel suante thugen a zui nuam kei uh.

¹⁴Benjamin suante bel Israel suante dou din khopite apan a hong pawtkhawm ua, Gibeah khua ah a lutta uhi.

¹⁵Huai ni a Benjamin suante khopi apan namsau tawi a pawtte, Gibeah khua a mi za sagih telkhiak simlouh in sing nih leh sang guk ahi uh.

¹⁶Huai tengteng lak ah veilong za sagih, telkhiat a om ua; amaute’n vaisuangseh in samzang chia leng a khial kei uhi.

¹⁷Israel mite, Benjamin mite simlouh in namsau tawi ngen mi ngen nuai li ahi uh. Amau tengteng galdou thei vek ahi uhi.

¹⁸Israel suante a thou ua, Bethel ah a hohtou ua, Pathian a va dong ua, Benjamin suante kuan ahia va sual masa ding? a chi uh.

¹⁹TOUPA’N, Judah nam va hoh masa u hen, a chi hi. Huchi in Israel suante lak ah a thou ua, Gibeah khua a va umta uhi.

²⁰Israel mite Benjamin pawl sual din a kisa ua, Israel mite’n Gibeah khua ah amaute sual din panmun a khoh uhi.

²¹Benjamin suante Gibeah khua apan a hongpawt ua, huai ni’n Israel suante lak a mi sing nih leh sang nih a hongthat uhi.

²²Mipite, Israel mite a kihasuan nawn ua, a sual tung ni ua a sualna mun mah uah sual din panmun a khoh nawn uhi.

²³Israel suante a hohtou ua, Pathian ma ah nitak tan in a va kap ua, “Ka unau uh Benjamin suante ka va sual nawn ding uam?” chi’n TOUPA a dong uhi. TOUPA’N, “Va sual nawn un” a chi hi.

²⁴A ni nihni in Israel suante’n Benjamin suante a va naih uh.

²⁵Benjamin suante leng huai a ni nih ni’n sual din Gibeah khua apan a pawtsam ua, Israel suante lak a mi sing khat leh sang giat a hongthat nawn uh. Huaite tengteng namsau tawi mi ahi uhi.

²⁶Huchi in Israel suan tengteng leh, mi tengteng a va paitou ua, Bethel ah a hohtou ua, a kap ua, TOUPA ma ah a tu uh. Huai ni’n nitak tan in an a ngawl uhi. TOUPA kiang ah haltum thillat leh lemna thillatte a lan uhi.

²⁷Israel suante’n TOUPA a dong uh. Huailai in huai ah Pathian thukhun bawm a om hi.

²⁸Huailai in Aron tapa Eleazar tapa Phinehas in a na a semzel ahi. “Ka unau uh Benjamin suante ka va sual nawn ding uam, ka tawpsanta mai ding uam?” chi’n TOUPA a dong uhi. TOUPA’N, “Vahoh un; zingchiang in zaw na khut uah k’on peta ding” a chi hi.

²⁹Israel suante’n Gibeah khaw kim ah tangpangmi a gukkoih uhi.

³⁰Israel suante Benjamin suante sual din a ni thum ni’n a kisa nawn uh. Nidang mah bang in Gibeah khua sual din panmun a khoh nawn uh.

³¹Benjamin suante bel huai mite sual din a pawt ua, khua a pawtsan uh. Huchi in nidang mah bang in mite sual in a thatpan nawnta ua, pawn ngial ah Bethel kholam lamliante ah Israel suante sawmthum a that uh.

³²Benjamin suante’n “A ma mah bang in i ma uah a zahlak nawnta uh e” a chi uhi. Israel suante’n bel, “I tai ding uh, khopi apan lamlian lam ah i tolhkhe sak ding” a chi uhi.

³³Huchi in Israel suan tengteng in a panmun uh a pawtsan ua, Baal Tamar mun ah panmun a khoh uhi. Israel suan a guk a na tangpangte a mun ua pan, Gibeah phaizang a panmun tan in a hong pawtkhia uhi.

³⁴Israel suan tengteng lak a telkhiat mi sing khat in a va sual ua, kidouna a thupi mahmah hi. Himahleh amau thil hoihlou a kiang naichik ah a om chih a theikei uhi.

³⁵TOUPA’N Israelte ma ah Benjamin suante a that hi. Israel suante’n huai ni’n Benjamin suante mi sing nih leh sang nga leh za khat a that uhi. Huai tengteng namsau tawimi ahivek uhi.

³⁶Huchi in Benjamin suante’n a vuallelta uh chih a hong kitheita uhi. Israel suante’n Gibeah khua sual dia a guk a tang pang mite a koih uh a muan ziak un Benjamin suante a nungtolh san uhi.

³⁷A guk a tangpang mite’n Gibeah khua a sualguih uh. Huchi in a guk a tangpangte a kiphalh ua, khua a mi tengteng namsau in a sualta uhi.

³⁸Israel suante leh a guk a tangpang mite’n a kichiam uh bel khopi sung a mei khuttouh sak ding, chih ahi.

³⁹Huai a muh chiang ua, Israel taikekte kileh hei a, dou ding a chih uh ahi.

⁴⁰Huchi in khopi sung a meikhu a hong kitun nguingui tak in, Benjamin suante a kihei uleh, ngai in, khopi a pum in vanlam ah a khutou ngoingoi maimah hi.

⁴¹Huchi in Israel suante a hong kilehhei ua, Benjamin suante’n lamdang a sa mahmah uh. A tan uh a hoihkei ding chih lah a theita ngal ua.

⁴²Huaiziak in, Israel suante ma ah gamdai ah a taikekta uhi. Himahleh a delhzui pek ua, khopi apan hong pawtte’n huai ah na that uhi.

⁴³Benjamin suante bel a umsip ua, a delh ua, ni suahna lam Gibeah kiang a a khawlna uah a phata uhi.

⁴⁴Benjamin suante mi sing khat leh sang giat a si ua; avek un mi hat hangsan chiat ahi uhi.

⁴⁵A kihei ua, gamdai lam Rimmon suangpi ah a tai uh. Mi sang nga lamliante ah a tom ua; Gidom tan in a delhzui ua, mi sang nih a that uhi.

⁴⁶Huchi in huai ni a Benjamin suan si, namsau tawimi ngen sing nih leh sang nga ahi ua, avek un mi hat hangsan ahi uhi.

⁴⁷Mi za gukte gamdai lam Rimmon suangpi ah a taikek ua, huai Rimmon suangpi ah kha li sung a om uhi.

⁴⁸Israel suante Benjamin suante tung ah a kisa nawn ua, khopi sung a om peuhmah gante, a muhmuh uh namsau in a satlum zel ua, huailou leng a khaw muh peuhmah uh a halzel uhi.