Read Paite Chin VAIHAWMMITE 21 Bible Online

VAIHAWMMITE 21 - Paite Chin bible

VAIHAWMMITE 21

¹Huan, Israel suante’n Mizpah khua ah, i lak ua mi kuamah in i tanute uh Benjamin suante zi din i pe kei ding uh, chi in a kichiam uhi.

²Mipite Bethel ah a hoh ua, Pathian ma ah nitak tan in a tu ua, a awte uh suah in a kap vongvong uhi.

³Amau bel, “Aw TOUPA Israelte Pathian, bangchidan ahia Israelte lak a hichibang thil a hongom?” a chi uh.

⁴Hichi ahi a, a zing in zing khang in a thou ua, huai ah maitam a bawl ua, haltum thillatte leh lemna thillatte a lan uhi.

⁵Israel suante’n, Israel nam tengteng lak a TOUPA kiang a paikhawm pawl lak a vatel teilou kuate ahi ua? a chi uh. Mizpah khua a TOUPA kiang a vahoh lou peuhmahte bel, thah ngeingei ding ahi, chi in a na kichiamta uhi.

⁶Israel suante a unaupa uh Benjamin suante tungthu ah a kisik ua, “Tuni in Israel suante lak ah nam khat satkhiak ahita, a chi uhi.

⁷A omsunte adin a zi ding uh bangchi’n i hihta ding ua? I tanute uh lah a zi ding ua neisak lou din TOUPA minlou in i na kichiamta ngal ua” a chi uhi.

⁸Amau a chi ua, Mizpah a TOUPA kiang a hong paitou lou Israel namte lak ah a om hia? Ngai in, kikhawm pawl omna mun ah Jabesh-gilead mite lak ah khat lel leng a hong hohkei uhi.

⁹Mite a kisim uleh, ngai in, Jabesh-gilead gam a omte khat lel leng a na omta kei uhi.

¹⁰Kikhawm khawmte’n mi hangsan hoih ngen sing khat leh sang nih a sawl uh. “Kuan unla, Jabesh-gilead gam a omte numei leh a tanu neute u toh namsau in va satlum vek un.

¹¹Na hih ding dan uh hichibang ahi. Mi tengteng leh numei, pasal luppih khinsa peuhmah hihmang thang vek un” chi in thu a pia uhi.

¹²Jabesh-gilead gam a omte lak ah nungak za li, pasal kithuahpih ngei hetlouh a mu uh. Huchi in a omna uh Shiloh khua ah a pi ua, huai bel Kanan gam a om ahi.

¹³Kikhawm khawm tengteng in mi a sawl ua, Rimmon suangpi a om Benjamin suante a va houpih ua, kilemna bawl din a sam uhi.

¹⁴Huaitak in Benjamin pawl a hong nawn ua; Jabesh-gilead gam a numei a hawite uh a zi ding un a pia uh. Huchi in leng a kiching kei lai uhi.

¹⁵Israel nam lak a TOUPA’N kihihtuamna a na bawl ziak in mite, Benjamin suante tungthu ah a kisik uhi.

¹⁶Huchi in kikhawmte upate’n, “A damlaite zi ding bang i chih ding ua? Benjamin suante lak a numeite lah hihmang ahita ngal ua?” a chi uhi.

¹⁷“Amau Israel nam hihman louhna din Benjamin suan omsunte bangchi’n suan i neisak ding ua?

¹⁸I tanute uh lah a zi un i neisak thei ngalkei ua” a chi uh. Israel suante’n, “Kuapeuh Benjamin suante zi dia nei sak peuhmah hamsiat in om uhen” chi’n a kichiam uhi.

¹⁹Amau, “Ngai un, Bethel mallam, Bethel apan Sekem zotna lamlian suahlam pang a Lebonah simlam a om Shiloh khua ah kumchih in TOUPA adin Ankuangluina a om” a chi uh.

²⁰Amau Benjamin suante kiang ah, “Va hoh unla, grep mun ah va guktan un;

²¹Na en unla, ngai un, Shiloh khua a nungakte lamna a lam dia a hongpawt uleh, grep mun apan hongpawt unla, Shiloh nungakte na zi ding un man chiat unla, Benjaminte gam ah paipih un.

²²Hichi ahi ding a, a pate uh hiam, a sanggampate uh hiam kalh dia i kiang ua a hong uleh, a kiang uah, Hon hehpih un. Kidouna sung in lah zi ka guan theikei uh. Nou lah na tanute uh na piak thoh un hilou a, kichiamna a mawh tanglou ding na hi uh” ka chi ding uh, a chi uhi.

²³Benjamin suante’n huchibang in a hih uh. Lampawlte lak a mi amau zah chiat zi din a man ua, a paimangpihta uhi. Huchi in a gam uah a pai ua, khopite a puahnawn ua, huai ah a tengta uhi.

²⁴Huaitak in huai apan Israel suante bel amau chichi leh amau namnam in a kihuituam nawn ua, huai nungsiah amau gam chiat ah a pai nawn uhi.

²⁵Huailai in Israelte lak ah kumpipa a omkei a; michih in amah mit a dikte a hih chiat uhi.