Read Paite Chin VAIHAWMMITE 3 Bible Online

VAIHAWMMITE 3 - Paite Chin bible

VAIHAWMMITE 3

¹Kanan gam a galdou kha nai hetlou Israelte ze-etna din TOUPA’N hiai namte a nusia hi.

²A tup bel Israel suante, tuma a galdou dan thei nai het loute galdou dan sinsak a hihna ding lel ahi.

³Huaite bel Philistiate kumpipa ngate, Kananmi tengte, Sidonte leh Lebanon tang a teng Hivte ahi ua, Baal Hermon tang apan Hamath khaw lutna pha in ahi uh.

⁴TOUPA’N Mosi zang a a pipute uh thu a na piakte a zuih ding uh leh zuih louh ding uh theihna din, huaite Israelte ze-etna ding ahi uh.

⁵Israel suante Kanante, Hitte, Amorte, Perizte, Hivte leh Jebuste lak ah a teng uhi.

⁶A tanute uh zi in a nei ua, a tanute uh a tapate uh zi in a pia ua, a pathiante uh na a sem uhi.

⁷Israel suante’n TOUPA mitmuh in thil gilou a hih ua, TOUPA a Pathian uh a mangngilh ua, Baal leh Astoreth na a sem uhi.

⁸Huchi in TOUPA Israelte tung ah a hehta a, Mesopotamia gam kumpipa Kushan Risathaim kiang ah a zuakta hi. Huchi in Israel suante’n Kushan Risathaim na kum giat a sem uhi.

⁹Israel suante’n TOUPA a sap tak un, TOUPA’N Israel suante hunkhepa a bawlsak a, huai mi in amau a hunkheta hi. Huai mi bel Kaleb naupa Kenaz tapa Othniel ahi.

¹⁰TOUPA kha amah tung ah a hongtung a, Israel tung ah vai a hawm hi. Aman Mesopotamia gam kumpipa Kushan Risathaim a va dou a, TOUPA’N Kushan Risathaim a khut ah a pia a, a zouta hi.

¹¹Huchi in kum sawmli gam galmuang in a omta a, huchi in Kenaz tapa Othniel a sita hi.

¹²Israel suante’n TOUPA mitmuh in thil gilou a hih nawn uh. TOUPA mitmuh a thil a hihkhelh ziak un TOUPA’N Moab kumpipa Eglon Israelte tung ah a hatsak hi.

¹³Aman Ammon leh Amalek suante a kaikhawm a; Israelte a va dou a, tum khopi a luahta hi.

¹⁴Huchi in Israelte Moab kumpipa Eglon thunuai ah kum sawmlehgiat a om uhi.

¹⁵Himahleh Israel suante’n TOUPA a sap tak un, TOUPA’N Gera tapa Ehud, Benjamin mi, mi veilong, hunkhepa a bawlsak hi. Israel suante’n Moab kumpipa piak ding kipahman Ehud a tawisak uhi.

¹⁶Ehud in namsau hiam tuah tongtan a sau in a sek a; puan nuai ah a taklam pheipi ah a henbelh hi.

¹⁷Moab kumpipa Eglon kipahman a va pia a; Eglon bel mi thau tak ahi.

¹⁸Kipahman a vapiak khit in, kipahman tawite a paisak nawn hi.

¹⁹Amah bel Gilgal khaw kiang a suangsekna mun apan a nungkik nawn a, “I aw, kumpipa, honhilh ding thuguk ka nei hi” a chi hi. Aman, “Dai un,” a chi hi. Huchi in a kiang a ding teng in a pawt khiaksan vek uhi.

²⁰Ehud in a kiang a va naih a; amah bel a nipi dantan ah amah kia in a na tu hi. Ehud in, “Pathian in na kiang a gen ding thu a hon thukhak hi” a chi hi. A tutphaha kipan amah a hong ding hi.

²¹Ehud in a khut veilam in a pheipi taklam a namsau a doka, a gil ah a dawt hi.

²²A namsau bul tan in a tuma, a thau in namsau a hubita, a gilpi apan namsau a dokkhe kei a, a ek a tolhkhia hi.

²³Huchi in Ehud inlim ah a pawt a, dantan kongkhakte a khakkhum a, a kalh bikbek hi.

²⁴A pawt khitnung in, a sikhate a hongpai ua, a va et tak un ngai in, dantan kongkhakte a na kikalh hi. “A nipi dantan ah a tuam omtadih a hi’n teh” a chi uhi.

²⁵Zumhuai tan khop in a ngak nilouh ua, ngai in, dantan kongkhakte a hong himhim kei a; huchi in tahbi a la ua, a hong ua; ngai in, a kumpipa uh pialkhang ah sisa in a na puk hi.

²⁶Ehud lah huchi a a ngak nilouh sung un a na taimang khina, huai suangsekna mun a khenga, Seirah ah a tailut hi.

²⁷Hichi ahi a, huai mun a tun in Ephraim tanggam ah pengkul a muta, Israel suante tanggam apan a kiang ah a paisuk ua, aman a ma uh a kaita hi.

²⁸Aman a kiang uah, Honzui dih ua. TOUPA’N na melma uh Moabte hon pekhinta ahi, a chi hi. Huchi in a zuisuk ua, Moab gam chin Jordan lui kannate a la ua; kuamah a galkah uh a phalkei hi.

²⁹Huai hun in Moabte sing khat mi hat ngenta leh mi hat hangsan hoih ngenta a that ua; khatlel leng taikhia a omkei uh.

³⁰Huchi in huai ni’n Moabte Israelte lak ah a zahlak uhi. Huchi in, gam kum sawmgiat sung galmuang in a om hi.

³¹A nung in Anath tapa Shamgar a hong kilanga, huai mi’n Philistiate za guk bawng sutna chiang in a sunluma; Israelte a hunkhia hi.