Read Paite Chin VAIHAWMMITE 4 Bible Online

VAIHAWMMITE 4 - Paite Chin bible

VAIHAWMMITE 4

¹Ehud sih nung in Israel suante’n Toupa mitmuh in thil gilou a hih nawn uh.

²Huchi in Hazor a vaihawmpa, huai Kanan gam kumpipa Jabin kiang ah Toupa’n a khawngta hi. Huai mi sepaih heutupen bel Sisera ahi a, Jentelte gam Haroseth khua ah a teng hi.

³Israel suante’n Toupa a sam uh. Huai min kangtalai za kua tak a nei a, kum sawmnih sung Israel suante nakpitak in a nuaisiah hi.

⁴Huailai in zawlnei Deborah, Lapidoth zi in Israelte tung ah vai a hawm hi.

⁵Ephraim tanggam a Ramah leh Bethel khaw kikal a tumsing nuai ah Deborah a teng hi. Israel suante a kiang ah a vai uh hawmsak din a honghoh zel uhi.

⁶Kedesh Naphtali gam apan Abinoam tapa Barak a thukhak a, a kiang ah, “Toupa, Israelte Pathian in, Tabor kiang ah hohtou inla, Naphtali suante leh Zebulun suante mi sing khat pi in.

⁷Huchi in Kison lui ah Jabin sepaih heutu Sisera, a kangtalaite leh a mipite toh k’on sawl ding; amah nang k’on pe ding, chi in thu a honpia ahi kei maw?” a chi hi.

⁸Barak in a kiang ah, “Hon tonpih lechin ka hoh ding. N’on tonpih kei ding leh ka hohkei ding” a chi hi.

⁹Aman, “K’on tonpih tham ding. Himahleh na hohna a minhoih lohlou ding na hi. Toupa’n Sisera numei kiang ah a khong ding hi” a chi hi. Huchi in Deborah a thou a, Barak toh Kedesh khua ah a hohta uhi.

¹⁰Barak in Zebulunte leh Naphtalite Kedesh ah a thukhak khawm a; mi sing khat amah toh a hohtou ua; Deborah leng a kiang uah a hohtou sam hi.

¹¹Ken mi Heber bel Mosi puzon Hobab suante lak apan a na om tuam a, Kadesh kiang a Zaanaim gam a tawsaw sing mun ah a puanin a vakai hi.

¹²Abinoam tapa Barak bel Tabor tang ah a hohtou chih Sisera a hilh uhi.

¹³Huchi in Sisera in a kangtalai tengteng, sik kangtalai za kua leh a heute Jentelte gam Haroseth khua apan, Kison lui ah a kaikhawm hi.

¹⁴Huchi in Deborah in Barak kiang ah, “Khai le, tuni Toupa’n Sisera a honpiak ni ahi. Na makaipa Toupa ahi ka hia?” a chi hi. Huchi in Barak Tabor tang apan a paisuk a, mi sing khat in a zuisuk uhi.

¹⁵Toupa’n Sisera leh a kangtalai tengteng leh a sepaih tengteng namsau in Barak ma ah a hihbuai gawpta a; Sisera a kangtalai apan a kumkhia a, a khe in a taimang hi.

¹⁶Barak in bel kangtalaite leh sepaihte Jentel gam Haroseth pha in a delh hi. Huchi in Sisera sepaih tengteng namsau in a that vek a; khat lel leng a hinghawi kei uhi.

¹⁷Sisera bel Ken mi Heber zi Jael puanin ah khe in a tailut hi. Hozor Kumpipa Jabin leh Ken mi Heber inkuante kikal ah lemna a om hi.

¹⁸Jael bel Sisera dawn din a hongpawt a, a kiang ah, “Pu, honglut in, ka kiang ah honglut in; lau ken” a chi hi. Huchi in puanin sung ah a kiang ah a lutta a, aman puan in a khuh hi.

¹⁹A kiang ah, “Hehpih in tui tawmchik honpe dihve, ka dang a tak mahmah hi” a chi hi. Aman bawngnawi khuainulhai a hong a, a dawnsak a, a khuhkhum nawn hi.

²⁰A kiang ah, “Puanin kongpi ah ding inla, huchi in, ‘Hiai ah mi a om hia?’ chi a hondot uleh, ‘omlou’ na chizel in” a chi hi.

²¹Heber zi Jael in puanin khetkilhna a la a, sek a tawi a, awlchikin a khe a suanpheia, khetkilhna in a haizek ah a khen paisuak a, lei toh a kilhbelh hi. Bah in a ihmut a lim mahmah ngal a; huchi in a sita hi.

²²Ngai in, Barak in Sisera a hondelh a, amah tuak din Jael a vapawt a, a kiang ah, “Hongpai in, na mi zon k’on ensak ding,” a chi hi. Huchi in a kiang ah a vahoh a; ngai in, Sisera a na sita mai a, puanin khetkilhna a haizek ah a na tal hi.

²³Huchi in Pathian in huai ni’n Israel suante ma ah Kanan gam kumpipa Jabin a nuaisiah hi.

²⁴Kanan kumpipa Jabin a nuaisiah masiah uh Israel suante a hat semsem uhi.