Read Paite Chin VAIHAWMMITE 5 Bible Online

VAIHAWMMITE 5 - Paite Chin bible

VAIHAWMMITE 5

¹Huai ni’n Deborah leh Abinoam tapa Barak in hiai la a sa uhi:

²“Israel a makaite’n a makaih lai un, amau utthu a mite’n a zuihlai un, TOUPA phat un!

³“Aw, nou kumpipate aw, ngaikhia un. Aw, nou heutute aw, bil na doh un. Kei mahmah in TOUPA pahtawi in la ka sa dia, TOUPA, Israelte Pathian phat in la ka sa ding hi.

⁴“TOUPA, Seir gam apan na hong paikhiak a, Edom pawn a na hongpawt in, lei a ling a, van a hong kia a, meipi’n vuah a zusak uhi.

⁵Tangte TOUPA ma ah a chim ua, TOUPA, Israelte Pathian ma ah Sinai tang mah leng.

⁶“Anath tapa Samgar damlai nite leh Jael damlai nite in lamliante totlouh in a om ua, zin leh lengte lah lam neute ah a pai uhi.

⁷Israel gamte a tulkhin a, a khuate luahlouh in a tul khin hi, kei Deborah ka gamtang a, Israel gam nu ka gamtat masiah.

⁸Amau pathian thakte a tel ua; huchi in kulh kongkhak bul ah kidouna a om a; Israel gam a mi sing li lak ah lum leh tei muh in a om hia?

⁹Ka lungsim Israelte vaihawmpa, mipite lak a lungluttak a kipiate lam ah a om hi. TOUPA phat un.

¹⁰“Pau un, nou sabiltung kang tung a tuangte, nou vaihawmna a tute leh lampi a paite.

¹¹Thal kapmite husa zak phaklouh, tui tawina mun ah TOUPA thildik hihte a gengen ua, Israel gam tung a thildik a hihte ngei. “Huchi in TOUPA mipite kulh kongkhakte lam ah a paisuk ding uhi.

¹²“Thou in, thou in, Deborah; thou in, thou in, lasa in. Thou in, Barak, thou inla, Abinoam tapa, na salmatte pi in.

¹³Huchi in mi omlaite mipite lak a miliante tung ah thu a neisak a, TOUPA’N mihat tung ah thu hon neisak hi.

¹⁴Ephraim apan a zungzam khat Amalek dou a om a, Benjamin, na mite lak a mite’n nang a honzui uh, Makir apan gam vaihawmmite a hong paisuk ua, Zebulun apan Laigelhmi chiang tawimite a hong paisuk uhi.

¹⁵Issakar miliante Deborah kiang ah a om ua; Issakar leh Barak mah leng. Amah guam lam a sawlsuk ahi a, Reuben pawlte ahihleh Nakpitak in a kingaihtuah lai uhi.

¹⁶Bangdia belam huang lak a tu nilouh, Belamhon ham ngai ding lel a? Reuben pawlte adin lungtang a Kingaihtuahna thupitak a om hi.

¹⁷Gileadte Jordan gal ah a om nilouh ua; bangdia Dante longte a om nilouh uh ahia? Asherte tuipi piau ah a tu kinken ua, a tuipiaute ah a om nilouh uhi.

¹⁸Zebulun leh Naphtali pawn munsang a sihngap gigete ahi uh.

¹⁹“Kumpipate’n a hong dou ua, Kanan kumpipate’n Meggiddo tui kiang, Taanak khua ah a dou ua: sum himhim a lakei uhi.

²⁰Van apan a hondou ua; Aksite’n a mun ua kipan Sisera a hondou uh.

²¹Kison lui in amaute a taimang a, nidanglai lui, Kison lui in, Aw ka kha, hattak in pai zel in.

²²“Huchi in sakolte a kipek thotthot ua, sakol hatte a tawmtawm ziak un.

²³“Meroji hamsiat un,” TOUPA Angel in a chi, huai a tengte nakpitak in hamsiat un. TOUPA panpih ding, Toupa’n mi hattak a douna panpih dia a honglouh ziak un.

²⁴“Numei lak ah Jael, Ken mi Heber zi nuamsapen ahi, numei puanin a tengte lak ah amah mi nuamsapen ahi.

²⁵Tui a hong ngen a, aman nawitui a pia hi: nou hoih in nawitui dat a na pia hi.

²⁶Kilhna a tawi a, a taklam in nasemmi sek; sek in Sisera a khen a, a lu ah a khen pailet a, ahi, a haizek ah a khen a, a khen tal vengvong hi.

²⁷A khe bul ah a kuna, a puk a, a luma; a khe bul ah a kuna, a pukta a; a pukna mun ah a sita hi.

²⁸“Sisera nu bel tawlet ah a dak a, vathangkalh awng ah a sam a, Bang achia kangtalai hong tunghak ahia? Bang achia a kangtalai khe zekai ahia? a chi hi.

²⁹A numei pilte’n a na dawng ua, ahi, amah dawng din hong nawn ua:

³⁰“A mu zouta kei ua hia? Gallak kihawmta lou uhia? Michih in nungak khat hiam nih chiat; Sisera tan ding gallak puan ze tuamtuam, gallak puan ze kilawm, ze tuamtuam, gallak ngawng a velh ding puan, a langnih a ze kilawm, ze tuamtuam,” chi in.

³¹“Huchibang in aw, TOUPA, na melmate tengteng mangthang vek uhen. Amah itte bel hattak a pai, nisa bang hi uhen” a chi uhi. Huchi in gam kum sawmli sung galmuang in a om hi.