Read Paite Chin VAIHAWMMITE 6 Bible Online

VAIHAWMMITE 6 - Paite Chin bible

VAIHAWMMITE 6

¹Huan, Israel suante’n TOUPA mitmuh in thil a hih khialta uh. Huchi in TOUPA’N Midiante khut ah kum sagih sung a pekhia hi.

²Midiante’n Israelte a zouta ua; huchi in Midiante ziak in tang ah kawkhukte, kawhawm leh kulhte a bawl uhi.

³Hichi ahi a, Israelte’n haichi a chinkhit un Midiante, Amalekte leh suahlam tate a hong kuan ua; a va dou ua,

⁴Panmun a va khoh ua, Gaza tan in lei a thilpoute a hihsiat sak ua, Israel gam ah nekding himhim a hawi kei ua, belam, bawng leh sabiltung tan in a hihse vek uhi.

⁵A ganhonte uh leh a puaninte utoh a hong kuan ua, khaupe bang in tampi a hong kuan ua; amaute leh a sangawngsaute uh simseng ahi kei a, gam hihse dia hong kuan ahi uhi.

⁶Huchi in Israelte Midiante ziak in a genthei mahmahta ua; Israel suante’n TOUPA a samta uhi.

⁷Hichi ahi a, Midiante ziak a Israel suante’n TOUPA a sap tak un, Toupa’n Israel suante kiang ah zawlnei khat a sawl a; aman a kiang uah, “TOUPA, Israelte Pathian in, hichi in a chi.

⁸‘Aigupta gam apan k’on pitou a, saltanna inn apan k’on pikhia hi.

⁹Aiguptate khut apan leh nou hon nuaisiah mi teng khut apan k’on hunkhia a, na ma uah amaute ka delhkhia a, a gam uh nou k’on pia hi.

¹⁰Kei TOUPA na Pathian uh ka hi, A gam ua na tenna uh Amorte pathiante na lau ding uh ahi kei, ka chi hi’. Himahleh ka thugen na zuikei uh” a chi hi.

¹¹TOUPA angel khat a hong a, Ophrah khua a Abiezerte mi Joash tawsaw sing nuai ah a tu hi. A tapa Gideon in Midiante muhlouh din grep sukna khuk ah buh a na vua hi.

¹²TOUPA angel a kiang ah a hong kilak a, a kiang ah, “Nang mihat hangsan, TOUPA na kiang ah a om hi” a chi hi.

¹³Gideon in a kiang ah, “Aw ka toupa, TOUPA ka kiang ua om ahihleh bangchidan a hichibang a ka tung ua hiai thilte hongtung ahia? Ka pipute un, TOUPA’N Aigupta gam apan hon pitou hilou hia? chi a, a thilhih lamdang a hon hilhte uh koilam a bang chikhinta ahia? Tun zaw, TOUPA’N hon pampaih ahita a, Midiante khut a hon peta eive” a chi hi.

¹⁴TOUPA’N, amah a en a, a kiang ah, “Hiai na hatna in kuan in, Midiante apan Israelte hunkhia in. K’on sawl ahi kei maw?” a chi hi.

¹⁵Aman a kiang ah, “Aw TOUPA, bangchi’n ahia Israelte ka va hutkhiat mahmah ding? Ngai in, Manasseh suan lak a inkuan hatlou pen ka hi ua, kei lah ka pa inkawte lak a neupen ka hi ngal a” a chi hi.

¹⁶TOUPA’N, a kiang ah, “Na kiang ah ka om ngeingei ding hi, huchi in Midiante mi khat lel bang in na zou vek ding” a chi hi.

¹⁷Aman a kiang ah, “Na mittung ka hihleh, nang mahmah in n’on pi chih chiamtehna banghiam hon musak in.

¹⁸Na ma a lat ding thilpiak ka va lak a, na kiang a ka hong nawn masiah hiai apan hehpih in nana paimang ken” a chi hi. Aman, “Na hong nawn masiah ka na om gige ding” a chi hi.

¹⁹Gideon inn sung ah a lut a, kel nou leh tangbuang ephah khat silngou sohlouh a bawl a; a sa seng ah a koih a, huai gel tui bel ah a koih a, tawsaw sing nuai ah a kiang a hontawi in a honglan hi.

²⁰Pathian angel in a kiang ah, “Sa leh tanghou silngou sohlouh la inla, hiai suang tung ah koih inla, a tui pen sungkhia in” a chi hi. Huchibang in aman a hihta hi.

²¹Huchi in TOUPA angel in a chiangtawi muk in sa leh tanghou silngou sohlouh a khoih a; suang apan mei a hongpawta, sa leh tanghou silngou sohlouh a kangtum vek hi. TOUPA angel muhtheihlouh in a paita hi.

²²Huchi in Gideon in “TOUPA angel ahi chih a theita hi. Gideon in, Maizen, Aw TOUPA Pathian, TOUPA angel kimaituah a mu ka kei maw” a chi hi.

²³TOUPA’N a kiang ah, “Lungmuangtakin om inla, lau ken. Na si kei ding” a chi hi.

²⁴Huchi in Gideon in huai ah TOUPA adin maitam a doh a, Jehovah Shalom a sa hi. Tunitan in Abi ezerte Ophrah ah a omlai hi.

²⁵Hichi ahi a, huai zan mah in TOUPA’N a kiang ah, “Na pa bawngtal tuai, bawngtal nihna kum sagih a upa la inla, na pa neih Baal maitam hihchim inla, a bul a sing a bawl Aserah phuk in.

²⁶Hiai suangpi tung ah zeneitakin TOUPA na Pathian adin maitam bawl inla, bawngtal nihna la inla, na phuk ding Aserah sing zang in haltum thillat lan in” a chi hi.

²⁷Huchi in Gideon in a sikhate lak a mi sawm a pi a, TOUPA’N a kiang a a gen bang in a hihta hi. Hichi ahi a, a pa inkawte leh khopi a mite a lauh ziak in, sunlai in a hih ngam kei a, zanlai in a hihta hi.

²⁸Khopi a mite zingkhanga, a thoh uleh ngai in, Baal maitam hihchip in a na om a, a bul a Ashera phukpaih in a na om a, maitam tung ah bawngtal nihna lat in a na om hi.

²⁹“Hiai kua hih ahia?” chi in a kihou ua, a kidong tuahua, a zon khit un, “Joash tapa Gideon in hiai thil a hih a na hi” a chi uhi.

³⁰Huchi in khopi a mite’n Joash kiang ah, Na tapa vapikhia in, a sih ngeingei ding ahi. Baal maitam a hihchip ziak leh a bul a Aserah a phuk ziak in, a chi uh.

³¹Joash in amah hong kalh teng kiang ah, Baal gum ding na hi u maw? Aman hon hondam ding hia? Kuapeuh amah gum zingsang mahmah a thah ding ahi. Pathian khat ahihleh a maitam a hihchip ziak in, kigum leh a kei dia, a chi hi.

³²Huaiziak in, huai ni’n amah Jerubbaal a sa uhi, a maitam hihchip a hih ziak in “Baal in amah kalh heh,” a chi uhi.

³³Huchi in Midian tengteng leh Amalekte leh suahlam tate a kikhawm ua; lui a kan ua, Jezreel guam ah a kikulh uhi.

³⁴Himahleh, TOUPA Kha Gideon tung ah a hongtung a; pengkul a muta; huchi in Abi ezerte’n amah a gum uhi.

³⁵Manasseh tengteng kiang ah mi a taisak a; huaite’n leng a naih khawm uh. Asherte, Zebulunte leh Naphtali teng kiang ah leng mite a taisak a; amau leng a behlap touta uhi.

³⁶Gideon in Pathian kiang ah, “Na gen bang a ka khut a Israelte na hutkhiat ding leh,

³⁷Ngai in, buhphual ah belam mul ka koih dia, belam mul tung kia a daitui a na om a, lei tengteng a na hulvek leh, na gen bang in ka khut in Israelte na hunkhe ding, chih ka thei ding” a chi hi.

³⁸Huchibang a honghi a, a zing zingsangpi a thou a, belam mul a suk leh belkuang dim tui a takkhia hi.

³⁹Gideon in Pathian kiang ah, “Ka tung ah heh ken, khatvei kia k’on gen nawn ding. Hehpih in, khatvei kia belam mul in hon ze-et sak nawn in. Tutung in ahihleh belam mul kia hul henla, leitung tengteng ah daitui om nawn leuleu hen, a chi hi.

⁴⁰Huchibang in Pathian in huai zan in a hih a; belam mul kia a na hul a, leitung tengteng ah daitui a na om leuleu hi.