Read Paite Chin VAIHAWMMITE 7 Bible Online

VAIHAWMMITE 7 - Paite Chin bible

VAIHAWMMITE 7

¹Huchi in Jerubbaal, huai bel Gideon ahi a, leh a kiang a om mi tengteng zingkhang in a thou ua, Harod tuikhuk chin ah a kikulh uh. Midiante bel mallam pang Moreh tangbul guam ah a kikulh uhi.

²TOUPA’N Gideon kiang ah, “Na kiang a om mite, Midiante a khut ua ka piakna din a tam lua uhi. Huchilou in zaw Israelte’n, ‘ei khut ngei a kihunkhia i hi uh,’ chi in a hon otkhum kha ding uhi.

³Huaiziak in, ngai in, mite zak in, ‘Kuapeuh lau leh ling a om leh kiknawn henla,’ Gilead tang apan pai kiknawn hen, chi in, genkhia in” a chi hi. Huchi in mite sing nih leh sang nih a kiknawn ua; sing khat a omlai uhi.

⁴TOUPA’N Gideon kiang ah, “Mite a tam law lai uh. Lui ah pisuk inla, huai ah ken k’on khensak ding. Hichi ahi ding a, Hiai mi zaw na kiang ah paiheh, ka chih peuhmah na kiang ah pai hen. Hiai mi zaw na kiang ah pai kei heh, ka chih peuhmah pai kei hen” a chi hi.

⁵Huchi in mite lui ah a pisuk a, TOUPA’N Gideon kiang ah, “Ui bang a, a lei a tui liah thoh peuhmah a tuam in koih inla, huchi mah bang in kun a khukdin a tuihip thoh peuhmah leng” a chi hi.

⁶A khut pek a liahthohte mi za thum ahi ua, midang tengteng kun a khukdin a tuihip vek ahi uh.

⁷Huchi in TOUPA’N Gideon kiang ah, “Mi za thum, a liah a liah thohte zang in k’on hunkhe ding. Midiante na khut ah ka honpe ding hi. Mipi teng amau mun chiat ah pai nawn uhen” a chi hi.

⁸Huchi in mite’n nekding leh a pengkulte uh a tawi ua; Israel mi tengteng a puanin lam uah a paisak vek a, mi za thumte bel a omsak a, Midiante kulh bel a nuai phaizang ah a om hi.

⁹Hichi ahi a, huai zan in TOUPA’N a kiang ah, “Thou inla, kulh ah va hohsuk dihve; na khut ah k’on peta hi.

¹⁰Himahleh hohsuk na lauh leh na sikha Purah toh kulh ah va hohsuk phot un.

¹¹Huchi in a thugen uh na za dia; huaikhit chiang in na khut hihhat in a om dia, kulh ah na hoh ngamta ding” a chi hi. Huchi in a sikha Purah toh kulh a galvengte tuah masak napen omna ah a hohsuk uhi.

¹²Midiante, Amalekte leh suahlam tapate tengteng huai phaizang ah khaupehon bang in tampi a na om ua; a sangawngsaute uh simseng vuallouh, a tamlam uh lah tuipi piau a piaunel zah mahmah ahi uhi.

¹³Gideon a tunsuk in, ngai in, mi khat in a lawmpa a mang a na hilh a, a kiang ah, “Ngai in, mang ka nei a, barli buh tanghou phel Midiante kulh ah a na om a, puanin ah a na tuklut a, a hon hihchim a, a hih lumlet a, puanin a kiphah maimah” a chi hi.

¹⁴A lawmpa’n a dawng a, “Huai ahihleh Israelmi, Joash tapa Gideon namsau lou bang dang hi kei e. Pathian in Midiante leh sepaih tengteng a khut a pia ahi ve” a chi hi.

¹⁵Hichi ahi a, Gideon in huai mang leh a lehkhiakna a ki hilhchian uh a zak in Pathian a beta hi. Huchi in Israelte kulh lam ah a kiknawn a, “Thou dih uh; TOUPA’N Midian sepaihte na khut uah a hon peta hi” a chi hi.

¹⁶Huchi in mi za thumte pawl thum in a khen a, avek un pengkul leh leibel vuak, asung a meisel koihsa a pe chiat hi.

¹⁷Aman a kiang uah, “Hon en unla, ka hih bang in hih sam un. Ngai un, kulh tuah masakpen ka tun chiang a ka hih bang a na hih sam ding uh ahi.

¹⁸Kei leh ka kiang a om tengteng in pengkul k’on mut chiang un, kulh kimvel a om tengteng in pengkul na mutsam ding uhi, ’TOUPA ading leh Gideon ading in’ na chi chiat ding uh” a chi hi.

¹⁹Huchi in Gideon leh a kiang a om mi zate’n zanven laizang, galven a kikhen kuan laitak in kulh tuah masak a tungsuk ua, pengkul a mut ua, a leibel tawi uh a tatkham uhi.

²⁰Pawl thumte’n pengkul a mut ua, leibelte a tatkham ua, a khut veilam un meisel a tawi ua, a taklam un pengkul mut ding a tawi uhi. “TOUPA leh Gideon namsau” chi in a kikou uhi.

²¹Kulh kim ah michih amau panmun chiat ah ading vek ua; huchi in sepaih tengteng a tai ua; a kikou ua, a taikek uhi.

²²Mi za thumte’n pengkulte a mut ua, TOUPA’N sepaih tengteng amau leh amau namsau in a kisualsak a, huchi in sepaihte Zazerah a Bethshittah, Tabath kiang a Abel meholah gamgi pha in a taikek uhi.

²³Israelte Naphtali, Asher leh Manasseh tengteng apan kigawm khawm in Midiante a nungdelhta uhi.

²⁴Gideon in Ephraim tanggam tengteng ah, Midiante hongsual un, Bethbarah tan in luite na lakkhalh un, Jordan lui toh, chi’n mite a vial taisak a, huchi in Ephraim tengteng a kikhawm ua, Bethbarah tan in luite Jordan lui toh a na lak khalh vek uhi.

²⁵Midian kumpipa Oreb leh Zeeb a man ua; Oreb suangpi ah a that ua, Zeeb pen Zeeb grep sukna khuk ah a that uhi. Midiante a delhta ua, huchi in Oreb leh Zeeb lutang Jordan luigal a Gideon kiang ah a hontun uhi.