Read Paite Chin VAIHAWMMITE 8 Bible Online

VAIHAWMMITE 8 - Paite Chin bible

VAIHAWMMITE 8

¹Huan, Ephraimte’n a kiang ah, “Bangziak a hichibang a honbawl e, Midiante na douna ua na honchial samlouh?” a chi uhi. Huchi in nakpitak in amah a tai uhi.

²Aman a kiang uah, “Nou toh genkak di ken bang ka hih zou a eita? Abi-ezerte grep loh sang a Ephraimte grep loh hoihzaw hilou maw?

³Pathian in Midiante kumpipa Oreb leh Zeeb na khut uah a hon peta hi. Huchi in nou toh genkak din ken bang ka hih zou a eita?” a chi hi. Huchi in huai thu a gen tak in a tung a a hehna uh a daita hi.

⁴Gideon leh a kiang a om mi za thumte’n Jordan lui a phasuk ua, a kan ua, bah mahle uh a delh teitei uhi.

⁵Sukoth khua a mite kiang ah, “Hehpih in kei honzuite sangpek pedih ua; a bah mahmahta uh. Midiante kumpipa Zebah leh Zalmunna delh ka hi” a chi hi.

⁶Sukoth khua a miliante’n, “Zebah leh Zalmunna na khut a omkhinta uhia, huchi a na sepaihte tanghou ka piak pahmai ding uh? a chi uh.

⁷Gideon in hiai ziak in, ”TOUPA’N Zebah leh Zalmunna ka khut a a honpiak chiang in gamdai a ling leh loulingneite in na sa uh ka kuikek ding” a chi hi.

⁸Huai apan Penuel ah a hohtou ua, a kiang uah huchi mah bang in a gen nawn hi. Penuel khua a mite’n Sukoth khua a mite dawn mah bang in a dawng uhi.

⁹Penuel khomite kiang ah, “Vualzou a ka hong kiknawn chiang in, hiai kulh ka hihchim ding” a chi hi.

¹⁰Zebah leh Zalmunna bel Karkor ah a om ua, a sepaihte leh suahlam tate sepaihte a sibang teng, sing khat leh sang nga toh. Namsau dokmi nuai khat leh sing nih lah a sikhinta ngal ua.

¹¹Gideon bel Nob leh Jogbeh suahlam a puanin a tengte lampi ah a hohtou a, sepaihte a vadou a; sepaihte galmuangtak in a na om ngal uhi.

¹²Zebah leh Zalmunna a taikekta ua; amau a delh ua; huchi in Midiante kumpipa nih Zebah leh Zalmunna a man ua, sepaihte tengteng a hihbuai gawpta uhi.

¹³Joash tapa Gideon bel kidouna apan nisuah ma in a hong kiknawnta hi.

¹⁴Sukoth khua ah tangval khat a man ua, thu a dong uh. Huchi in Sukoth khua a milante leh upate min a gelhsak vek a, sawmsagih leh sagih ahi uh.

¹⁵Sukoth khua a mite kiang ah a hohtou a, “Zebah leh Zalmunna en dih ve ua, hiaite a kei ua, Zebah leh Zalmunna na khut ua omsa bang a, mi bahte tanghou ka piak ding uh?” chi a n’on enghou uh, a chi hi.

¹⁶Huchi in huai khua upate a man a, gamdai ling leh loulingneite in Sukoth mite a thuhilh hi.

¹⁷Penuel khaw kulh a hihchim a, khua a mite leng a that hi.

¹⁸Huchi in Zebah leh Zalmunna kiang ah, “Tabor tang a na mi thahte uh mi bangchibang ahi ua? a chi hi. Amau, Nangmah bang ahi uh; Kumpipa tapate a bang chiat uh” a chi uhi.

¹⁹Aman, ka unaute ahi uh, ka nu tapate mahmah eive ua. TOUPA a hin bang in, amaute na hinghawi le uchin zaw, nou hon thatlou mah ding hiveng in, a chi hi.

²⁰A tapa upapen Jether kiang ah, “Khaile, nang amaute that in” a chi hi. Himahleh tangval in a namsau a phawikei; tangval lel ahihlai ziak in a lau hi.

²¹Huchi in Zebah leh Zalmunna in, “Nangmah hong kisa inla, hong satlum tanla. Piching leh piching kisual ding ahi” a chi uhi. Huchi in Gideon a thou a, Zebah leh Zalmunna that in, sangawngsaute ngawng zepnate a la hi.

²²Huchi in Israel mite’n Gideon kiang ah, “Nang ka tung uah vaihawm in, nang leh na tapa leh na tapa tapate tan in leng. Nang Midiante apan lah n’on hunkheta hi” a chi uhi.

²³Gideon in a kiang uah, “Ken zaw na tung uah vai ka hawm kei ding. Ka tapa in leng na tung uah vai a hawmsam kei ding. TOUPA’N na tung uah vai a hawm zaw ding” a chi hi.

²⁴Gideon in a kiang uah, “Thil khat ahihleh honnget ka ut, michih in na gallak bilbah uh, honpe chiat un, a chi hi, Ishmaelte a hih ziak un dangkaeng bilbah a nei uhi.

²⁵Amau, “Phaltakin k’on pe ding uh” a chi uh. Huchi in puan a phah ua, michih in a gallak bilbah uh a hon paikhe chiat uhi.

²⁶Huai dangkaeng bilbah a ngette gikdan dangkaeng sekel sang khat leh za sagih ahi; hakkolte, bilbahte, Midian kumpipate puan sandup simlouh in, a sangawngsaute uh khainiang omte leng tellou in.

²⁷Gideon in huaite in Ephod a bawl a, a omna Ophrah khua ah a koih hi. Israel tengteng in hiai thil ah ang a kawm uh. Huchi in Gideon leh a inkawte adin thang a hong hita hi.

²⁸Huchi in Midiante bel Israel suante nuaisiah in a om uh; a tangkhe zou nawn kei uh. Huchi in Gideon damsung kum sawmli sung in gam galmuang in a omta hi.

²⁹Joash tapa Jerubbaal a pai a, a inn ah a tengta hi.

³⁰Gideon in zi tampi a neih ziak in amah suan mahmah tapa sawmsagih a nei hi.

³¹Sekem khua a a mei in tapa a suansak lai a, a min Abimelek a sa hi.

³²Joash tapa Gideon kha leh khuk tuah a dam in a sita a, Abiezer mi Ophrah khua a a pa Joash han ah a vui uhi.

³³Hichi ahi a, Gideon a sihphet in Israel suante a kinung hei ua, Baalte toh ang a kawm ua, Baal Berith pathian in a neita uhi.

³⁴Israel suante’n a kim ua melmate tengteng lak apan amau hunkhepa TOUPA a Pathian uh a theigige kei uhi.

³⁵Jerubbaal, Gideon mah, Israelte tung a theihtawp a hoih suahpa inkawte leng a hehpih kei uhi.