Read Paite Chin VAIHAWMMITE 9 Bible Online

VAIHAWMMITE 9 - Paite Chin bible

VAIHAWMMITE 9

¹Huan, Jerubbaal tapa Abimelek Sekem khua ah a nu sanggampate kiang ah a hoh a, a nu pa inkawte tengteng a houpih hi.

²“Sekem khua a mi tengteng zak in thu gen unla, ‘Jerubbaal tapa tengteng mi sawm sagihte’n na tung ua vai a hawm uhia hoih na sak uh, mi khat in na tung ua vai a hawm uh?’ Gendih ua, keileng na guh uh leh na sa uh hi sam ka hi, chih theigige un” chi in a gen hi.

³A nu sanggampate’n Sekem khua a mi tengteng zak in huai thu tengteng a gen uh. Huchi in Abimelek zuih utna lungsim a hon puta ua; “Amah i unau ahi” a chi ngal ua.

⁴Baal Berith inn apan dangka sawmsagih a pia ua, huai in Abimelek in mingongtat leh mi ginalou pipi a guai a, amau amah a zui uhi.

⁵Ophrah khua a a pa inn ah a va hoh a, Jerubbaal tapate, a unau sawmsagihte suang khat tung ah a that hi. Jerubbaal tapa naupangpen Jotham bel a na kibuk ziak in a that khakei hi.

⁶Sekem khua a mi tengteng leh Bethmillo a mi tengteng a kikaikhawm ua, Sekem khua a suangphuh bul tawsaw kiang ah Abimelek kumpipa in a bawlta uhi.

⁷Hiai Jotham a hilh uleh Gerizim tang ah a hohtou a, a vum ah a va ding a, aw ngaih tak in a kikou a, a kiang uah, “Nou Sekem khua a mite aw, ka thugen ngaikhia dih ua, huchi in Pathian mah in leng nou thu a hon ngaikhe sam ding hi:

⁸Khatvei a tung ua kumpipa ding thaunilh din singte a kuan khia ua; Olive sing kiang ah, ‘Nang ka kumpipa hi in,’ a chi uhi.

⁹Himahleh olive sing in a kiang uah, ‘Pathian leh mihing pahtawina dia a zat pen uh ka thau nusia in singte tung ah dopsang in ka om ding maw?’ a chi hi.

¹⁰Singte’n theipi kung kiang ah, ‘Kisa dih, nang ka kumpipa ding un hongom in,’ a va chi uhi.

¹¹Himahleh theipi kung in a kiang uah, ‘Ka khumna leh ka gah hoih tak nusia in singte tung a dopsang in ka om ding maw?’ a chi hi.

¹²Singte’n grepgui kiang ah, ‘Kisa dih, nang ka kumpipa ding un om in aw?’ a chi uh.

¹³Grepgui in a kiang uah, ‘Pathian leh mihing kipaksak ka uain nusia in singte tung a dopsang in ka om ding maw?’ a chi hi.

¹⁴Huchi in sing tengteng in lingvom kiang ah, ‘Kisa in, nang ka kumpipa ding un om in,’ a chi uhi.

¹⁵Lingvom in singte kiang ah, ‘Na kumpipa ding ua thau honnilh taktak na hih uleh ka lim ah hong bu in hon muang un; huchi ahihkei leh ling apan mei hongpawt henla Lebanon tang a sidar singte kangkhin hen,’ a chi hi.

¹⁶“Huaiziak in tuin, chihtak tak a Abimelek na kumpipa ua bawl na hih ua, Jerubbaal leh a inkawte hoihtak a bawl a, a kituahpih bang a, a tung a na hih ua;

¹⁷Ka pa’n gal a hon dousak a, a na sihloh hialta a, Midiante khut apan in nou a hon hunkheta hi.

¹⁸Tuni in ka pa inkawte tung ah na hel ua, a tapate sawmsagih tak suang khat tung ah na that ua, na unaupa uh a hih ziak in a sikhanu tapa Abimelek Sekem khomite kumpipa din lah na bawlta ngal ua.

¹⁹Tuni a Jerubbaal leh a inkawte tung a chihtak tak a gamta na hih uleh, Abimelek tung ah kipak unla, amah leng na tung uah kipak hen.

²⁰Himahleh huchibang ahihkeileh Abimelek apan mei hong kuang khia henla, Sekem khua a mite leh Bethmillo mite kangtum hen. Sekem khua a mite leh Bethmillo apan mei kuang hongpawt henla, Abimelek kangtum vek hen” a chi hi.

²¹Huchi in Jotham a tai a, a taimang a, Beer ah a tai a, a unaupa Abimelek a lauh ziak in huai ah a tengta hi.

²²Abimelek in Israelte tung ah kum thum vai a hawm hi.

²³Pathian in Abimelek leh Sekem khua a mite kikal ah kha gilou a sawl hi. Huchi in Sekem khomite Abimelek tung ah lepchiahtak in a gamta uhi.

²⁴Huai ahihleh Jerubbaal tapa sawmsagihte tung a mulkimhuai tak a, a gamtat ziak a a tung a phulakna a hongtun theihna ding leh amaute thatpa a unaupa uh Abimelek tung a leh, a unaute that ding a amah a na panpih Sekemte tung a, a sisan uh a om theihna ding ahi.

²⁵Sekem khua a mite’n mualvumte ah amah guktan mite a koih ua, huai mun a vapai peuhmah a na suam ua; huai thu Abimelek a hilh uhi.

²⁶Ebed tapa Gaal, a unaute toh a hong kuan ua, Sekem khua ah a lut ua; Sekemte’n a na muangmoh kei uh.

²⁷Lou lam ah a hoh ua, a grephuan ua grepte a lou ua, a chil ua, vualnuam a bawl ua, a pathian in uah a lut ua, ne a dawn in Abimelek a hamsiat uhi.

²⁸Ebed tapa Gaal in, “Eite’n a na uh i sep sak ding, Abimelek kua ahia? Sekem mah leng kua ahia? Jerubbaal tapa ahi kei maw? Zebul, a sepaih Makai hilou a maw? Sekem pa Hamor mite na sem ding maw? Bangziak in eita amah na i sep ding uh?

²⁹Hiai mite ka khut nuai ah om le uh aw! Abimelek ka lakhe ding. Abimelek kiang ah, Na sepaihte pungsak inla, hong paikhia in” a chi hi.

³⁰Huai khaw vaihawmpa Zebul in Ebed tapa Gaal thugen a zak in, a heh tohthoh in a om hi.

³¹Huchi in gitlouhpil in, Abimelek kiang ah, “Ngai in, Ebed tapa Gaal leh a unaute Sekem ah a hong uh. Ngai in, na tung a heltum in na khua a mite a hanthawn uhi.

³²Huchi in na mite toh kisa unla, zan in pawn ah na tang un.

³³Huchi in hichi ahi ding a, zingsang a nisuahtakin, beltak in thou inla, khua hong dou mai in. Ngai in, amah leh a lawite’n nang hondou dek chiang un, hoih na sak dandan in a tung uah na hihmai ding hi” chi a hilh din mite a taisak hi.

³⁴Huchi in Abimelek leh a mi tengteng zan in a thou ua, pawl li a kikhen in Sekem khua a va umta uh.

³⁵Ebed tapa Gaal a vapawt a, khopi lutna kongpi ah a va ding a, Abimelek leh a mite a guktanna ua kipan a hong kuanta uhi.

³⁶Gaal in mipite a muh in Zebul kiang ah, “Ngai in, mualvum apan mipite a hong paisuk uh” a chi hi. Zebul in a kiang ah, “Mual lim mihing bang a mu lel hiteh” a chi hi.

³⁷Gaal in, “En tanla, gamlai tak ah mipi a hong paisuk uhi. Pawl khatte houh aisan siampa tawsaw sing lampi ah a hongpai uh” a chi nawn hi.

³⁸Huchi in Zebul in a kiang ah, “Abimelek kua ahia, a na i sep ding pen uh? chi a na genna kam koi a omta ahia? Hiaite na mi muhsitte mah hilou umaw? Va pawtkhia inla, va dou in” a chi hi.

³⁹Huchi in Gaal in Sekemte makai in Abimelek a va douta hi.

⁴⁰Abimelek in a na delh a, a taisia a, khopi tan in mi tampi liam in a puk uhi.

⁴¹Abimelek bel Arumah khua ah a teng hi. Zebul in Gaal leh a unaute Sekem khua a teng theilou din a delhkhe vek hi.

⁴²Hichi ahi a, a zing in mipite pawn ah a pawtkhia uh chih Abimelek a hilh uhi.

⁴³Mipite a pi a, pawl thum in a khen a, pawn ah a guktan ua; a dak a, ngai in, mipite khopi apan a hong pawtkhia ua, huchi in amau a na sual ua, a thatta uhi.

⁴⁴Abimelek leh a pawlte malam ah a tai ua, khopi lutna kongpi ah ading ua, pawl nihte’n pawn a omte tengteng a pumboh ua, a thatta uhi.

⁴⁵Abimelek in khopi huai ni’n nitum in a sual a; huchi in khopi a la a, asung a mite a that a, khopi a hih sevek a; chitui in a theh hi.

⁴⁶Sekem kulh a omte tengteng in huai thu a naza ua, Berith pathian biakin sung bitna mun ah a tailut uhi.

⁴⁷Sekem kulh a mi tengteng a omkhawm vek uh chih Abimelek a hilh uh.

⁴⁸Abimelek leh a kiang a om tengteng Zalmon tang ah a hohtou uh. Abimelek in heipi a tawi a, sing hiang a satkhia a, a pua a, a kiang a om a mite kiang ah, “Ka hih dan na mu uh, ka hih bang in nou leng hih mengmeng un” a chi hi.

⁴⁹Mi tengteng in sing hiang a satkhe chiat ua, Abimelek hih bang in a pua ua, in kulhpi kim ah a sekhawm ua, kulhpi sung a omte a hal khum uhi. Huchi in Sekem kulhpi sung a om tengteng a sivek ua, pasal leh numei teng sang khat vel ahi uh.

⁵⁰Huchi in Abimelek bel Thebez khua ah a hoh a, Thebez khua a um a, a lata hi.

⁵¹Himahleh huai khopi sung ah kulhpi kiptak a om a, huai ah pasal leh numei tengteng leh khopi sung a mi tengteng a tailut ua, a kikhak khum bikbek ua, kulh tung ah a omkhawm uhi.

⁵²Abimelek bel kulhlam ah a hoh a, a vadou a, hal din kulh kongpi ah a hoh hi.

⁵³Numei kuahiam in buhgawizanna suang khat Abimelek lu tung ah a khesuk a, a luguh a kitam hi.

⁵⁴Huchi in a galvan tawipa tangval a sampah a, a kiang ah, “Na namsau phawi inla, honthat mai in. Huchi a mite’n, ‘Numei thah ahi,’ ” a hon chihlouhna ding un” a chi hi.

⁵⁵Israelte’n Abimelek a si chih a theihtak un, a inlam chiat uah a paita uhi.

⁵⁶Abimelek in a unau sawmsagih a thah leh a pa tung a giloutak a a tatsiatna Pathian in hiai bang in a thukta hi.

⁵⁷Sekem khomite gitlouhna tengteng Pathian in a thuk samta hi. Jerubbaal tapa Jotham hamsiat amau tung ah a hongtungta hi.