Read Paite Chin 2 JOHAN 1 Bible Online

2 JOHAN 1 - Paite Chin bible

2 JOHAN 1

¹‍Upa in, thutak a ka it mahmah numei hoih, tel a omnu leh a tate kiang ah; kei kia hilou in, thutak thei peuhmahte’n a hon it uhi;

²‍Thutak eimah a om gige, tangtawn a i kiang ua om gige ding a hih ziak in:

³‍Pa Pathian leh Toupa Jesu Khrist, Pa Tapa kiang a kipan hehpihna, zahngaihna, lemna thutak leh itna in noute hon ompih hen.

⁴‍Pa kiang a kipan a thupiak i muh bang in na ta kuate hiam thutak a om a ka muh ziak in ka kipak mahmah hi.

⁵‍Numei hoih, na kiang a thupiak thak gelh hilou in, a tung a kipan a i neihpen gelhzaw in, i ki-ittuah theihna ding in nget petmah in k’on ngen hi.

⁶‍Huan hiai itna ahi, a thupiak bangzel a i omna uh. Hiai ahi thupiak a tung a kipat a na zak uh, huai ah na om ding uh ahi.

⁷‍Khemmi tampi Jesu Khrist sa in a hongpai chih gumlou khovel ah a hong pawtta uhi. Tua mite ahi, khemmi leh Khrist doumi.

⁸‍I sepkhiaksate mangsaklou a, a kipahman bukim a i muh theihna ding un, nangmah kiveng hoih in.

⁹‍Kuapeuh huai thu kihilhna thu a om gige lou a talek in Pathian a neikei; huai thu kihilhna thu a a om gige in Pa leh Tapa a neikhawm hi.

¹⁰‍Kuapeuh huai thu kihilhna thu hon pawlou a, na kiang ua a hongpai leh na inn uah tungsak kei unla, paukam hoih in kha kei un.

¹¹‍Paukam hoih a khami a thil hihkhelh ah a pangsam hi.

¹²‍Na kiang ua thu tampi gen ding ka neih ziak in lai leh laitui a gelh ka ut kei a; na kipahna uh a kim theihna ding in na kiang ua hong a, kimaituah a kihou ka lamen zaw hi.

¹³‍Na sanggamnu tel tate un chibai a honbuk uhi, Amen.