Read Paite Chin 3 JOHAN 1 Bible Online

3 JOHAN 1 - Paite Chin bible

3 JOHAN 1

¹‍Upa in, deihtak Gaias thutak a ka it kiang ah:

²‍Deihtak, na kha in vualzawlna a muh bang in, bangkim a vualzawlna na muh leh na dam theihna ding in ka thum zel hi.

³‍Unaute a hongpai un, thutak a na hindan leh na muanhuai dan a hon theihsak ziak un ka kipak mahmah hi.

⁴‍Ka tate thutak ah a om uh chih ka zak kan a kipahna thupizaw ka neikei hi.

⁵‍Deihtak unaute mikhual himahle uh, a tung ua na hih peuh ah muanhuaitak in na hih zel hi:

⁶‍Huaite’n saptuamte ma ah na itna a theisakta uhi; amau tuh a zinna ua Pathian mi hihtuak him a na makaih leh na hih hoih ding hi.

⁷Amau Khrist min a a zinna uah Jentelte kiang a kipan bangmah lalou in a pawt zel uhi.

⁸‍Huchi in thutak a seppihte i hihtheihna ding in huchibang mite eite’n i kipahpih ding ahi.

⁹‍Saptuamte kiang ah thu neukha zaw ka gelhta; himahleh Diotrephes, a lak ua tungnun utnakpa’n a kipahpih kei hi.

¹⁰‍Huaiziak in ka hongpai leh a thilhihte ka pholhkhe ding a, i tung ua thu dikloupi a gen a a kamtam dan ka thei khesak ding hi. Huai leng hun a sa kei a, amah ngei in unaute a kipahpih kei a, a kipahpih nuamte leng khou in saptuamte lak a kipan a delhkhia hi.

¹¹‍Deihtak, gilou mi omdan ching ken, a hoih chingzaw in. Thil hoih hihmi tuh Pathian apan ahi; thil gilou hihmi’n Pathian a mu ngeikei hi.

¹²‍Demetrias in mi tengteng phat a loh a, thutak a phat nangawn a loh behlap hi; eite’n leng i phat ua, hiai phatna a dik ahi chih na thei hi.

¹³‍Na kiang ah thu tampi gelh ding ka nei hi, himahleh laitui leh laipuan in gelh ka ut kei hi.

¹⁴‍Sawtlou nungchiang in honmuh ka lamen hi, huchi in kimaituah in i kihou ding.

¹⁵‍Khamuanna na tung ah om hen. I lawmte’n chibai a honbuk uhi. A min uh louchiat in lawmte chibai hon buksak in.