Read Paite Chin JUDA 1 Bible Online

JUDA 1 - Paite Chin bible

JUDA 1

¹‍Juda, Jesu Khrist sikha leh Jakob unau in, Pa Pathian sehtuam siangthoute leh Jesu Khrist a kep leh sap a omte kiang ah:

²‍Hehpihna, lemna leh itna na tung uah hihkhan in om hen.

³‍Deihtakte aw, i kikop hotdamna thu na kiang ua gelh teitei ka tuplai in, misiangthoute kiang a ginna khatvei kepsak a om thu a, phatuamngai tak a humbit a pang ding a hon hanthawn ding in, na kiang ua laigelh a kiphamoh chih ka na thei hi.

⁴‍Mi kuate hiam a guk a honglut a om ua, nidanglai apan hiai siamlouhtanna dia sehte; huaite’n Pathian hehpihna kaikawi in, i Heutupa leh i Toupa neihsun, Jesu Khrist a kitheihmohbawl behlap uhi.

⁵‍Huan bangkim khatvei in thei vek mahle u chin, Toupa’n Aigupta gam a kipan a mite a suahtaksak a, huai nung a gingtaloute tuh a hih manthat dan nou hon theihsak nawn ka ut hi.

⁶‍Huan angelte, amau sawltak hihna zuilou a, a omna ngei uh paisante ni thupi vaihawmna ading a mialnuai a tangtawn gawtna a henkawm in a sit hi.

⁷‍Sodom leh Gomorrah leh a kiang kim ua khuate kingaihna a kipumpiak a, gitlouhna lek lua, amau mihinpih loute nangawn enlah a a delhtak ziak un, tangtawn mei a gawt a om dingte etsakna ding a suankhiak in a om uhi.

⁸‍Himahleh huai te’n leng huchi bangmah in, a deihthusam bang un sa a hih thanghuai ua, vaihawmsakna a musit ua, thupinate a gense nak uhi.

⁹‍Himahleh Mikael angel tungnungpen in bawn, Diabol toh a kisel ua, Mosi luang thu a a kinak lai un a tungthu gensak in amah a gense ngam kei hi, “Toupa’n hontai zaw hen” a chi zawta hi.

¹⁰‍Huai mite’n bel thil a theihlouh peuh uh a gensia ua; ngaihtuahna neilou ganhingte bang a theihsiamna pianpih a neihte un, huai lampang ah amau a kihihsia uhi.

¹¹A tung uh a gik hi! Kaina lampi a zui ua, punna delh in Balaam mawhna ah a tai ua, Kora thukalhna ah a mangthangta uhi.

¹²‍Hiaite ahi uh na itna Ankuangluina ua hih melhemtu leh lauhuai kiselte, amau mah kikhem, angsung ngaihtuah a, maingaltak a tathangte; mei tuipai lou, huih mut lengte ahi ua; phavang a sing gahlou, nihvei sisa, a zung toh bawhkhiakte ahi uhi;

¹³‍Tuipi kihot vonvon, amau zahlakna thankhia ahi ua; aksi vialvak, amau dia tangtawn a mial bing bikbek sitsakte ahi uhi.

¹⁴‍Huan Enok, Adam a kipan khang sagihna in hiai mite tungtang ah, “Ngai un, Toupa a misiangthou sang sawmte toh a hongpai hi, chi in a na genkhol hi.

¹⁵‍Mi tengteng tung a vaihawm ding leh Pathian limsakloute tengteng Pathian limsaklouhna leh Pathian limsakloute tung a a sep tengteng uah leh, Pathian limsaklou mikhialte’n a tung a thukhauh tak a gen tengteng ua siamlouh tangsak ding in” a chi hi.

¹⁶‍Huaite phunhatte leh ngohhatte ahi ua, amau utna bangzel in a om ua, a kamte un leng kiotsakna thu a gen gawpgawp ua, punna deihman in mite maitangphat a deih uhi.

¹⁷‍Himahleh deihtakte aw, nouzaw i Toupa Jesu Khrist sawltakte’n thu a genkholhte uh theigige un.

¹⁸‍“Hun nanung ah Pathian limsaklouhna lam a amau utna bangzel a om, nuihsanhatte a hongom ding uh” chih na kiang ua a gendante uh.

¹⁹‍Huai mite sami, kha neilou, pawltuam bawlte ahi uhi.

²⁰‍Himahleh deihtakte, nou zaw na ginna siangthou tung a noumau leh noumau kilemtou in, Kha Siangthou a thum in.

²¹‍Tangtawn hinna neihsakna khop i Toupa Jesu Khrist hehpihna ngak in, Pathian itna ah kikem hoih un.

²²‍Khenkhatte, ginglah a omte hehpih unla;

²³‍Khenkhatte, mei a kipan in lakhe zok unla, hondam un; khenkhatte, a sa thanghuai banna uh puansilh lam leng kih in, laukawm in hehpih un.

²⁴‍Tuin, na puklouhna ding ua hon vengthei leh a thupina ma a nakpitak a nuamsa leh nin banglou a nou hon koih theipa,

²⁵‍Hondampa, Pathian tak kia kiang ah, i Toupa Jesu Khrist ziak in, hun himhim omma leh tu leh tangtawn dong in, pahtawina, thupina, vaihawmna, thuneihna, om hen, Amen.