Read Paite Chin KILAKNA 1 Bible Online

KILAKNA 1 - Paite Chin bible

KILAKNA 1

¹Jesu Khrist kilakna, Pathian in a sikhate kiang a lahkhiak ding a amah a piak, thil hong ompah mahmah dingte: Huan aman a sikha Johan kiang ah a angel sawl in chiamtehna in a theisak hi.

²‍Johan in Pathian thu leh Jesu Khrist tungtang a a thilmuhte tengteng a theisakta hi.

³‍Hiai genkholhna thute sim a, a thute za a, huai a thil kigelhte zuite a hampha uhi: a hun a naitak ziak in .

⁴‍Johan in Asia gam a om saptuam sagihte kiang ah: Amah omlel, omsa leh hongpai ngei dingpa a kipan leh, a mangtutphah ma a om, Kha sagihte a kipan in hehpihna leh lemna na kiang uah om hen:

⁵‍Jesu Khrist, theihpihpa ginom, misite lak a piang masapen leh leitung a kumpipate vaihawmpa ahi. Eite hon it a i khelhna a kipan a a sisan a honsawppa amah kiang ngei ah;

⁶‍leh lalgam hi ding a honbawl, Pathian leh a Pa kiang a siampute hi ding a honbawl, amah kiang ah thupina leh vaihawmna, tangtawn, tangtawn in om hen, Amen.

⁷Ngai in, meipi toh a hongpai hi; mit teng in amah a mu ding ua, amah sunte’n leng; leitung a nam tengteng in amah a kah ding uh, huai bang hi hen, Amen.

⁸‍“Kei Alpha leh Omega, a bul leh a tawp” Toupa Pathian, omsa, omlel leh hongpai ding Bangkim hihthei in a chi hi.

⁹‍Kei, Johan, Jesu a om haksa thuakna leh lalgam leh kuhkalna a, na unau uleh na tanpihpa uh, Pathian leh Jesu theihpihna ziak in tuikulh gam Patmos kichi ah ka om hi.

¹⁰Toupa ni in Kha in ka om hi, ka nunglam ah aw ngaihtak in pengkul ging bang ka za hi.

¹¹Aw in, “Kei Alpha leh Omega, abul leh atawp ka hi, Na thilmuhte laibu ah gelh inla, Asia gam a saptuam sagih, Ephesa saptuam, Smarna saptuam, Pergamos saptuam, Thaitira saptuam, Sardis saptuam, Philadelphia saptuam leh Laodisia saptuamte kiang ah khak in” a chih ka zata hi.

¹²‍Huan kei hon houpih huai aw muh tum in ka kihei hi. Huchi a ka kihei leh dangkaeng tuikuang koihna sagih ka muta hi.

¹³‍Huai tuikuang koihna lai ah kuahiam Mihing Tapa toh kibang, a khepek tuampha puansilh, a awm kimvel dangkaeng gakna a kigak ka muta hi.

¹⁴A lu leh a sam samul ngou leh vuk bang in a ngou a; a mitte meikuang bang ahi.

¹⁵A khepekte sumsan nawttet meipi a halsiangsa a bang a, huan a aw tui tampi ging bang ahi.

¹⁶‍Huan a khut taklam in aksi sagih a tawi a; a kam a kipan in namsau hiamtuah a suakkhia a; huan a mel ni a sat sanlai bang ahi.

¹⁷‍Huchi a amah ka muhtak in, misi bang in a khebul ah ka pukta hi. Huan aman a khut taklam ka tung a koih in, “Lau ken, a masapen leh a nanungpen ka hi.

¹⁸‍Mihing ka hi; ka hongsi a, ngai in tangtawn in ka hing hi, sihna leh misi khaw tahbi ka nei hi.

¹⁹‍Huaiziak in na thil muhsate, thil omlelte leh tunung a thil hongom dingte gelh in.

²⁰‍Ka khut taklam a aksi sagih na muhte leh dangkaeng tuikuang koihna sagihte thuguk hiai ahi: Aksi sagihte saptuam sagihte angelte ahi ua; tuikuang koihna sagihte saptuam sagihte ahi uh” a chi hi.