Read Paite Chin KILAKNA 10 Bible Online

KILAKNA 10 - Paite Chin bible

KILAKNA 10

¹Huan meipi puansilh a kizem angel hat dang van a kipan hongpai khesuk ka muta hi: sakhituihup a lu tung ah a om a, a mai ni a bang a, a khete mei khuamte bang mai ahi.

²A khut a laibu neuchik honsa a tawi a; a khe taklam a tuipi tung sik in a khe veilam leitung ah a nga hi.

³‍Humpinelkai humham bang in aw ngaihtak in a kikou a: a kikou khit in vanpiging sagihte’n a aw uh a suah uhi.

⁴‍Huan vanpiging sagihte’n a aw uh a suahtak un gelh ding in ka kisa hi; Van a kipan aw in, Vanpiging sagihte thugen im bikbek inla gelhkhe ken” a chih ka za hi.

⁵‍Huan tuipi tung leh leitung a angel ding ka muh in Vanlam ah a khut taklam a liktouta hi;

⁶‍Huchi in huai tangtawn a hing van leh lei leh asung a om tengteng leh tupi leh asung a om tengteng siampa minlou in a zekai nawnlouhna ding chi in a kichiamta hi.

⁷‍Himahleh angel sagihna in a mut ding pengkulpi a gin chiang in, huai hun chiang in “Pathian thuguk, a sikha zawlneite kiang a a genkhiaktak hihkim in a omta ding” chi in.

⁸‍Van a kipan a ka aw zak in kei hon houpih in, “Kuan inla, tuipi tung leh leitung a angel ding khut a laibu neuchik honsa vala in,” a chih ka za nawn hi.

⁹‍Kei, angel kiang ah ka vahohta a, laibu neu honpe ding in a kiang ah ka vagen hi. Aman ka kiang ah, “La inla, nezou vek in; huai in na gil hihkha inchin himahleh na kam ah khuaizu bang in a khum ding” a chi hi.

¹⁰‍Huan angel khut a kipan in laibu neuchik ka lata a, ka nezou vek a; ka kam ah khuaizu bang in a khum a; huan ka nekzohtak in ka gil hihkhat in a omta hi.

¹¹‍Huan ka kiang ah, “Mi tampite leh namte leh paute leh kumpipate kiang ah Pathian thusuak na genkholh nawn ngeingei ding ahi” a honchi hi.