Read Paite Chin KILAKNA 11 Bible Online

KILAKNA 11 - Paite Chin bible

KILAKNA 11

¹Huan tehna chiang hileh kilawm sialluang chiang khat piak in ka om a: angel in, “Thou inla, Pathian biakin leh maitam leh huai a bete teh in:

²‍biakin huangsung nusia inla, tehken; Jentelte kiang a piaksa a hihtak ziak in; huan khaw siangthou a khenuai un kha sawmli leh kha nih a sikden ding uhi.

³‍Huan ka palai nihte kiang ah thilhihtheihna ka pedia, amau saiip puan silh in ni sang khat leh ni za nih leh ni sawmguk thu a genkhol ding uh a chi hi.

⁴‍Hiaite olive sing nihte leh khawnvak koihna nihte, leitung a Toupa ma a dingte ahi uhi.

⁵‍Mi kuapeuh in amau suknat a tup ualeh, a kam ua kipan a mei hong suakkhia in, a melmate a kangtum vek dia; kuapeuh in amau hihnat a tup ualeh huchibang a thah in a om ding uhi.

⁶‍Hiai mite’n a thu genkholh sung ua vuah zuklouhna ding in, van khak theihna a nei ua; huan a ut hunhun ua sisan suaksak ding in tuite tung ah thu a nei ua, leitung leng gawtna chiteng a gawt ding in thu a nei uhi.

⁷‍Huan a theihpihna nasep uh a zoh chiang un, huai gamsa kawkhuk tawbei a kipan a hong pawtkhia in amau a kidou pih ding a, amau a zou dia, a that ding hi.

⁸A siluang uh khopi thupi kongzing ah a kisial a, huai khalam thu ah Sodom leh Aigupta kichi Toupa Kros a kilhlup a a omna mah ahi.

⁹‍Mite leh chite leh paute leh namte lak a kipan mite a luang uh ni thum leh a kim a en ua, a luang uh han a vui a phal kei uhi.

¹⁰‍Huchi in leitung a tengte amaute tung a kisial in a kipak ua, kipahna a bawl ua; thilpiakte a kikhak tuah ua; hiai zawlnei nihte’n amau leitung a tengte a thuakgimsak khittak ziak un.

¹¹‍Huan ni thum leh a kim nung in, Pathian a kipan in hinna hatna amau ah a honglutta a, amau khe un a dingta uhi; amau mu tengteng tung ah nakpi a launa a hong omta hi.

¹²‍Van a kipan in aw thupitak a zata ua, “Hiai ah hong paitou un,” chi in. Huan amau meilak ah van ah a paitou uhi; a melmate un amau a mu chiat uhi.

¹³‍Huai dak in zinling thupitak a omta a, khopi mun sawm a khen mun khat a chimta hi; huai zinling in mi sang sagih thah in a omta ua; a dangte a lauta uhi, van a Pathian kiang ah thupina a pia uhi.

¹⁴‍Tunggikna nihna tuh a beita a: ngai in, tunggikna thumna a hong tungpah ding hi.

¹⁵‍Huan angel sagihna in a pengkul a mutta hi; van ah aw thupitak in a zuita a, “Leitung lalgam i Toupa leh a Khrist a a hong hita hi; aman tangtawn in vai a hawm ding” a chi uhi.

¹⁶‍Upa sawmnih leh li, mangtutphah tung a Pathian ma a tute’n a mai ua leisi in, Pathian a bia uhi.

¹⁷“Na tung ah ka kipak uhi, Toupa Pathian Bangkim hihthei, omlel leh omsa leh hongom ding; na thilhihtheihna thupi na laktak ziak in leh vai na hawmtak ziak in,

¹⁸Namte a heh ua, tuin nang thangpaihna ni a hongtungta hi, misite vai na hawmsak hun leh na sikha zawlneite leh misiangthoute kiang leh na min kihtate milian leh mineute kiang a kipahman na piakna hun leh leitung hihsete hihsiat a a omsam hun uh a hongtungta hi,” a chi uhi.

¹⁹‍Huan van a om Pathian biakin hon in a omta a; biakin sung a thukhun bawm a hong kimuta hi; huchi in khophiate, awte, vangingte, zinlingte leh gial thupitak in a zuita hi.