Read Paite Chin KILAKNA 12 Bible Online

KILAKNA 12 - Paite Chin bible

KILAKNA 12

¹Van ah chiamtehna thupi leh lamdangtak: numei khat ni a kizem, a khenuai a khapi sikden leh a lu tung a lallukhu aksi sawmlehnih khu a hong kimu hi.

²Aman nau a pai a, nauvei leh suakkhe ding natna in a kapkhia hi.

³‍Huan van ah thillamdang thupi khat a hong kilang a; ngai in, dragon san lianpi, lu sagih leh ki sawm nei, a lu tung a lallukhu sagih khu a hong kilang hi.

⁴A mei in van a aksite mun thum a khen mun khat a kaikhia a, leitung ah a paikheta hi; dragon in huai numei naunei dia kisa, a neih chiang a a nau nekzoh tum in a ma ah a ding hi.

⁵‍Ta pasal naupang, sik chiang a nam tengteng tung a vaihawm ding a neita hi; tua tapa Pathian leh a mangtutphah ah laktouh in a omta hi.

⁶‍Numei pen gamdai ah, Pathian in amah adia a mun bawlsak ah, huai ah ni sang khat leh ni za nih leh ni sawmguk khoi a om ding in a taita hi.

⁷‍Huan van ah kidouna a om a: Mikael leh angelte dragon toh kidou ding in a kuan khia ua; dragon leh a angelte’n leng a dou uhi.

⁸‍Huan a zoukei ua, van ah a mun himhim uh muh in a omta kei hi.

⁹‍Dragon lian, gulpi tek, Diabol leh Setan chih a ompa, khovel pumpi khempa leh amah nasem angelte toh van apan paih khiaksuk in a omta uhi.

¹⁰‍Huan van ah aw ngaihtak mai ka za hi, “Tun ah i Pathian hotdamna a hongtungta, thilhihtheihna, leh Khrist thuneihna; i unaute hekpa, i Pathian ma a sun leh zan a amau hekpa, paihkhiaksuk a a om ziak in.

¹¹‍Belamnou sisan ziak leh a theihpih uh thu ziak in amah tung ah a vualzouta ua; sih tanpha’n leng a hinna uh a it kei uhi.

¹²‍Huaiziak in kipak un, aw van leh nou asung a tengte, Lei leh tuipi ading in a tung uh a gik; Diabol in hun tomchik phet a nei chih a kitheih ziak in, a heh mahmah a na kiang uah a hong paisukta hi” chi in.

¹³‍Dragon leitung a paihkhiak ahita chih a kitheihtak in, huai numei nau pasal neinu a gawtta hi.

¹⁴‍Huai numei kiang ah muvanlai thupitak kha nih piak in a omta a, gulpi mai a kipan gamdai mun a a lenlut theihna ding in, huai ah hun khat sung leh hunte leh hun kimkhat sung vak in a om hi.

¹⁵‍Gulpi in a kam a kipan in tuipi bang tuiluang a numei a taihmangsak theihna ding in numei nung ah a sekheta hi,

¹⁶‍Lei in numei a panpihta a, lei in a kam a ka ta a, dragon in a kam a kipan a a tui siatkhiak a na valhzohsak vekta hi.

¹⁷‍Dragon numei tung ah a heh mahmah a, a suan omsun, Pathian thupiak zuite leh Jesu thu theihpihte kidoupih ding in a kuankheta hi.

¹⁸‍Huan Dragon tuipiau ah ading hi.