Read Paite Chin KILAKNA 13 Bible Online

KILAKNA 13 - Paite Chin bible

KILAKNA 13

¹Tuipi piau a ka din leh tuipi a kipan gamsa khat, ki sawm leh lu sagih nei, a kite tung a lallukhu sawm om chiat, a lu tungte a Pathian gensiatna om, hong paikhetou ka muta hi.

²‍Ka gamsa muh gialbem a bang a, a khe vompi khe a bang a, a kam humpinelkai kam a bang hi: dragon in a thuneihna thupi leh a mangtutphah leh a thilhihtheihnate amah a peta hi.

³A lute lak a khat sihpih khop hial dia liam hileh kilawm in ka mu hi; sihpih khop hial dia liam pen hihdam in a omta a; huchi in leitung pumpi in huai gamsa lamdangsa in a zuita uhi.

⁴‍Dragon, gamsa kiang a a thuneihna petu a bia uhi; huchi in hiai gamsa a biak kawm in, “Hiai gamsa bang kua om a, amah kidoupih thei kua om hiam?” a chi uhi.

⁵‍Huan gamsa kiang ah thil thupite leh Pathian gensiatnate genna ding kam piak in a omta a; huan a kiang ah thuneihna piak in a om hi, kha sawmli leh nih thilhihtheihna piak ahi.

⁶‍Pathian gensiatna ding, a min gense ding leh a omna, van a tengte ngei gensia in a kamkata hi.

⁷‍Huan Dragon in gamsa kiang ah misiangthoute kidoupih ding leh amau zou ding in phalna a pia a: chichih, pauchih leh namchih tung a thuneihna leng a peta hi.

⁸‍Huan khovel om tung a kipat a belamnou thahsa hinna laibu a a min tuangloute tengteng leh leitung a teng tengteng in amah a be ding uhi.

⁹‍“Kuapeuh zakna ding bil nei in zata hen!”

¹⁰‍“Kuapeuh sal a pi dingte sal a pi in a om ding; kuapeuh namsau a thah dingte namsau a thah in a om ding. Hiai ah misiangthoute kuhkal na leh ginna neiding a chial ahi uh.

¹¹‍Huan gamsa dang khat leitung a kipat a hongpawt khetou ka muta a; belamnou bang in ki nih a nei a, dragon bang in thu a gen hi.

¹²‍Gamsa masapen thuneihna tengteng a mitmuh in a zang hi. Leitung leh asung a teng tengteng gamsa masapen, sikhop hial a liam a hihdam a om, be ding in a sawl hi.

¹³‍Huan mite mitmuh in van a kipan in leitung a mei kesuk thei khop in thillamdang pipi a hih hi.

¹⁴‍Huan gamsa sik leh a mitmuh a thillamdang hihtheihna piak a a omna in aman leitung a tengte a khemta a; huai gamsa namsau a satliam leh damnawn lim bawl ding in lei a tengte thu a pia hi.

¹⁵‍Gamsa masa lim a nakna peding leh tua gamsa a pautheihna ding in Dragon in amah kiang ah thilhihtheihna a pia a, tua bel gamsa lim be nuamlou tengteng leng a thahsak theihna ding ahi.

¹⁶‍Mi tengteng, a lian a neu, a zawng a hau, sikha leh sikha lou, a khut taklam uh hiam, a tal uah hiam a chiamtehna piak in a om chiat uhi.

¹⁷‍Huai bel kuamah in huai chiamtehna hiam, gamsa min hiam, ahihkeileh a min nambat neiloute’n lei theilou, zuak theilou a a omna ding ahi.

¹⁸‍Hiai ah pilna a om hi. Kuapeuh theihsiamna nei in, gamsa nambat sutkhia hen; mihing nambat ahi a; nambat tuh za guk sawmguk leh guk ahi.