Read Paite Chin KILAKNA 14 Bible Online

KILAKNA 14 - Paite Chin bible

KILAKNA 14

¹Huai nung in ka et leh, ngai in, Zion tang tung a Belamnou ding ka muta a, a kiang ah mipi nuaikhat singli leh sangli, a Pa min a tal ua kigelh chiatte toh a ding khawm uhi.

²‍Tui tampi leh vanpiging bang a ging van a kipan in aw ka zata hi; ka aw zak gosem tumte’n a gosem uh a tumging uh a bang hi:

³‍Mangtutphah leh ganhing lite ma leh upate ma ah la thak hileh kilawm khat a sa ua: leitung a kipat a huai leikhiaksate, nuaikhat singli leh sanglite loungal kuamah in huai la a thei theikei uhi.

⁴‍Hiaite numei lak a kihihnin loute ahi ua; nungak siangthou bang ahi uhi. Hiaite a paina lamlam ua Belamnou zuite ahi uhi. Pathian ading leh Belamnou ading a gah masapen hi ding a mite lak a kipan a leisa ahi uhi,

⁵‍Huan a kam uah zuau a omkei a; Pathian mangtutphah ma ah gensiat bei ahi uhi.

⁶‍Huan angel dang vanlai zawl a leng ka mu a, aman tangtawn Tanchinhoih, leitung a tengte kiang leh namchih leh chichih leh pauchih leh michihte kiang a genkhiak ding a nei hi.

⁷Aw ngaihtak in, “Pathian kihta unla, amah thupina pia un; a vaihawmna hun a hongtungta ngal a; van leh lei leh tuipi leh tuikhukte siampa amah bia un” a chi hi.

⁸‍Huan angel nihna in a honzui a, “Pukta, pukta Babulon khaw thupi, nam tengteng a mi ngaihhatna, hehna uain dawnsaknu, a chi hi.

⁹Angel thumna in amau a honzuita a aw ngaihtak in, “Kuapeuh gamsa leh a lim bia, a tal hiam a khut hiam a chiamtehna a neite’n

¹⁰‍Pathian thangpaihna uain a dawn ding ua, huai uain thangpaihna nou, bangmah toh hellouh hial a bawl ahi; angel siangthoute leh Belamnou muh in amah mei leh kat in hihnat in om in teh:

¹¹‍Huan a hihnatna meikhu uh tangtawn tangtawn in a zamtou dia; huai gamsa leh a limbete, leh kuapeuh a min chiamtehna neiphot in sun leh zan in tawlngakna a neikei ding uhi” a chi hi.

¹²‍Hiai ah misiangthou, Pathian thupiakte leh Jesu ginna zuite kuhkalna nei ding a chialna a om hi.

¹³‍Huan van a kipan in aw in hichibang in, “Gelh in, tua kipan in misite, Toupa a site a hampha uhi”; Kha in, “Ahi, a sepgimna uh a khawlsanta ding ua, a thilhihte un honzui ding a hih ziak in” a chih uh ka zata hi.

¹⁴‍Huan ka et leh ngai in, meipi ngou ka muta a; huai mei tung ah mi khat Mihing Tapa toh kibang, a lu a dangkaeng lallukhu khu, a khut a kawite hiam tawi ka muta hi.

¹⁵Angel dang Pathian biakin apan hong paikhia a, meipi tung a tupa kiang ah ngaihtak in, “Na kawite lik inla, at in: at hun a tungta hi; lei buh a min gawpta” chi’n a kikou hi.

¹⁶‍Huai mei tung a tupa’n leitung ah a kawite a lik a; leitung at in a omta hi.

¹⁷‍Huan van a om Pathian biakin a kipan in angel dang a hong paikhia a, aman leng kawite hiam a tawi hi.

¹⁸‍Huan mei tung a thilhihtheihna nei, angel dang maitam ma a kipan in a hong paikhia a; aman aw ngaihtak in, huai kawite tawipa sam in, “Na kawite hiamtak lik inla, leitung a grep gahbomte khawm in; grepte a min mahmah ta hi” a chi hi.

¹⁹‍Huai angel in leitung ah a kawite a lik a, leitung a grep gahte a khawmta hi, Pathian thangpaihna, uain sukna thupi, uain sukna ah a pailutta hi.

²⁰‍Khaw pawlam ah uain sukna chil in a omta a, uain sukna a kipan sisan sakol kamkaihna tanpha louching sang khat leh za guk pha in a luangkhia hi.