Read Paite Chin KILAKNA 15 Bible Online

KILAKNA 15 - Paite Chin bible

KILAKNA 15

¹Huan chiamtehna thupi leh lamdang, angel sagih, hi nanung sagih, a nanung pente, Pathian hehna toh kidim tawi, van ah ka muta hi.

²‍Huan limlang tuipi hileh kilawm, mei toh kihel leh gamsa leh a lim leh a min nambat tung a vualzoute, a khut ua Pathian gosem tawi a, limlang tuipi kiang a ding ka muta hi,

³‍Pathian sikha, Mosi la leh Belamnou la a sa uhi: “Na thilhihte thupi in a lamdang hi. Aw Toupa Pathian, Bangkim hihthei! Na lampite a dik in a tang uhi, Misiangthoute Kumpipa, chi in.

⁴Toupa aw, kuan ahia na min hih thupi a laulou ding? Nang kia siangthou na hi a. Nam tengteng hongpai in na ma ah hong be ding uh, Na thilhih diktatte hihlat in omta ngal ua” a chi uhi.

⁵‍Hiai thilte ka muh nung in, van a theihsakna biakbuk dantan sungnung hon in a omta hi:

⁶‍Huan hiai dantan sungnung a kipan in angel sagih, gawtna sagih nei, puanmalngat siangthou leh vak a kizema, dangkaeng kawnggaka a awm ua kigakte a hong paikhia uhi.

⁷‍Ganhing lite lak a khat in angel sagihte kiang ah tangtawn tangtawn a hing Pathian hehna a dim dangkaeng belhbu sagihte a peta hi.

⁸‍Huchi in Tempul Pathian thupina a thilhihtheihna a kipan meikhu in hihdim in a omta hi; angel sagihte gawtna sagihte a tunkim masiah asung ah kuamah a lut theita kei uhi.