Read Paite Chin KILAKNA 16 Bible Online

KILAKNA 16 - Paite Chin bible

KILAKNA 16

¹Huan Tempul dantan sungnung a kipan hongsuak aw thupi in, angel sagihte kiang ah, “Kuan unla, leitung ah Pathian thangpaihna belhbu sagihte sungkhia un” a chih ka zata hi.

²A masapen a kuan a, leitung ah a belhbu a sungkheta hi, huai gamsa chiamtehna nei, a lim bemite tung ah meima sia leh nai in a hong suakta hi.

³A nihna in a belhbu tuipi tung ah a sungkhia a; misite si bang in sisan a hongsuak hi; tuipi sung a thil omte tanpha in hinna nei peuhmah a sita uhi.

⁴A thumna pen in a belhbu luite leh tuinakte tung ah a sungkhia hi; sisan a hongsuakta uhi.

⁵‍Tuite angel in, “Nang omsa leh omlel, nang Misiangthou, hichibang a vai na hawmtak ziak in na diktat hi:

⁶Amau misiangthoute leh zawlneite sisan a suah ua, nang a dawn ding un sisan na piak hichih tuak ahi him uhi” a chih ka za hi.

⁷‍Huan maitam in, “Ahi, Toupa Pathian aw, Bangkim hihthei, na vaihawmte a dik in a diktathuai hi!” a chih ka zata hi.

⁸A lina pen in a belhbu ni a sunkhumta a; amah kiang ah mite mei a hainat theihna piak in a omta hi.

⁹A sat a sa a mite hainatin a omta ua; hichibang natnate tung a thilhihtheihna nei, Pathian min a genseta ua; Pathian kiang a thupina pe ding in a kisik tuankei uhi.

¹⁰A ngana in a belhbu gamsa tutphah tung ah a sungkheta a; huan a lalgam hihmial in a omta a; amau na sa in a lei uh a keita uhi,

¹¹A natna uh leh a meimate uh ziak in amau tuh van a Pathian a gensia ua; a thilhihte uah a kisik tuankei uhi.

¹²A gukna in a belhbu luipi, Euphrates luitung ah a sungkheta a; huai tui a kangvekta hi, huchi in suahlama kipan kumpipa hong dingte adia lampi bawlsa a a om theihna ding in.

¹³‍Dragon kam a kipan leh gamsa kam a kipan leh, zawlnei taklou kam a kipan in kha nin thum, ukeng bang mai hong paikhia ka muta hi:

¹⁴Amaute dawite kha, thillamdang hihte; khovel pumpi leh lei kumpipate kiang a hong a, Pathian Bangkim hihtheipa ni thupi a kidouna adia amaute pikhawmte ahi uhi.

¹⁵‍“Ngai in, guta bang in ka hongpai hi. Kiveng leh puan tengsa a om a hampha hi, huchilou in zaw vuaktang in a om dia; a zumhuaina a mu kha ding uhi.”

¹⁶‍Huchi in amaute mun khat Hebru pau a ‘Armageddon’ kichi ah a pikhawmta uhi.

¹⁷A sagihna in a belhbu huihkhua tung ah a sungkheta hi; mangtutphah a kipan in dantan sungnung ah aw ngaihtak a hong suakkhia a, “Zoh ahita!” a chi hi.

¹⁸‍Huchi in khophiate, awte, vangingte a hong omta a; zinling thupi, huchibang a thupi leh hat leitung a mihing om nungsiah om ngeilou a omta hi.

¹⁹‍Khopi thupi mun thum in a kikhenta a, namte khopite a chimta uhi; Babulon khopi thupi Pathian mitmuh in theihgige in a om a, a hehna kihtakhuai uain nou a dawn ding in piak in a omta hi.

²⁰‍Tuikulh gam chiteng a taimangta ua, tangsangte muhphak in a omta kei hi.

²¹‍Huan van a kipan in gial lianpipi, talent khat a gik mite tung ah a hong kesukta hi; mite’n huai gial a gawtna ziak in Pathian a gensia ua; huai gawtna a thupi mahmah hi.