Read Paite Chin KILAKNA 17 Bible Online

KILAKNA 17 - Paite Chin bible

KILAKNA 17

¹Huai thilnung in angel sagih belhbu sagih tawite lak a khat hongpai in kei a hon houpih hi, “Hongpai in, tui tampite tung a tu kizuaknu thupi tung a vaihawmna k’on ensak ding.

²‍Leitung kumpipate amah toh a kingai ua, huan a mingaihna uain in leitung a tengte khamsak in a om” a chi hi.

³Aman Kha in gamdai ah hon pawmangta a: huan gamsa san-au, Pathian gensiatna min a pumdim, lu sagih leh kisawm nei tung a numei khat tu ka muta hi.

⁴‍Huai numei in puan sandup leh puan sandang a silh a, dangkaeng leh suangmantam leh tuikepsuang in a kizem hi; a khut in dangkaeng nou, thil kihhuaite leh a mi ngaihna thilninte a dim a tawi hi.

⁵‍Huan a taltang ah min thuguk, “Babulon thupi, kizuakte leh leitung a kihhuaite nu,” chih a kigelh hi.

⁶‍Huan huai numei misiangthoute sisan leh Jesu martarte sisan dawnkham in ka mu hi. Huainu ka muhtak in lamdang ka sa mahmah hi.

⁷‍Huan angel in ka kiang ah, “Bangding a lamdang sa na hia? Huai numei leh amah pua gamsa, lu sagih leh kisawm nei, thuguk k’on hilh ding a chi hi.

⁸‍Huai na gamsa muh a omkhin a, huan a omkei a; kawkhuk tawbei a kipan a hong paikhe ding ahi, manthatna a pai ding ahi. Huan leitung a tengte, khovel siam tung a kipan a hinna laibu a min gelhlouhte’n tua gamsa omkhin a, omlou leh hongom ding a hihdan a muh chiang un lamdang a sa ding uhi.

⁹‍“Hiai ah pilna lungsim a kul. Lu sagihte numei tutna tangsang sagihte ahi uhi.

¹⁰‍Huan kumpipa sagihte ahi ua; nga a pukkhin ua, khat a omlel a, khat a hongtung naikei hi. A hongtun chiang in, hun tomchik sung a om ding hi.

¹¹‍Huai gamsa omkhin a, tua omlou pen kumpi giatna ahi. Amah sagihte lak a tel ahi; huan manthatna ah a pai ding hi.

¹²‍“Huan ki sawm na muhte, lalgam nei nailou, kumpipa sawmte ahi ua; himahleh dakkal khat lel, huai gamsa toh amau kumpipate bang in thuneihna a nei ding uhi.

¹³‍Hiaite’n lungsim khat nei in, gamsa kiang ah a thilhihtheihna leh a thuneihna uh a pia uhi.

¹⁴‍Hiaite’n Belamnou a kidou pih ding ua, Belamnou in amau a zou ding, amah toupate Toupa leh kumpipate KUMPIPA a hih ziak in; amah toh omkhawmte bel sapte, telte leh muanhuaite ahi uhi.

¹⁵Aman ka kiang ah, “Kizuaknu tutna tui na muhte mite leh mipite leh namte leh paute ahi uhi.

¹⁶‍Ki sawm na muhte leh na gamsa muhte’n kizuaknu a mudah ding ua, suanbei leh vuaktang a suaksak ding uhi, a sa a ne ding ua, amah mei in a haltum vek ding uhi.

¹⁷‍Pathian thu hihkim a a om mateng, amah deihlam a hihna ding uleh, lungsim khat a neihna ding uleh, a lalgam uh gamsa kiang a a piakna ding un, Pathian in amau ah ngaihtuahna a koihta hi.

¹⁸‍Huan na numei muh khopi thupi, leitung kumpipate tung a vaihawmnu ahi” a chilai hi.