Read Paite Chin KILAKNA 18 Bible Online

KILAKNA 18 - Paite Chin bible

KILAKNA 18

¹Hiai thilnung in van a kipan angel dang, thuneihna liantak nei, van a kipan hong paikhesuk ka muta hi; a thupina in leitung tuh a vaksak ta hi.

²Aw ngaihtak in a kikouta a, “Chimta, chimta Babulon khopi thupi, dawite omna leh kha nin tengteng kulh leh vasa nin leh huathuai teng kulh a hong hita hi.

³‍Nam tengteng in a mi ngaihna hehna uain a nam tengteng dawn khamsak a om ua, leitung Kumpipate’n amah a kingaihpih ua, leitung sumsinte nuamtat luatna a hong hauhtak ziak un” a chi hi.

⁴‍Huan van a kipan in aw dang in hichibang in a gen hi: “Ka mite a khelhna a na pan khaklouhna ding un leh ahi na kailouhna ding un, amah a kipan in hong paikhia un, a chih ka za hi.

⁵A khelhna van a tungta a, Pathian in a khelhnate a theigige hi.

⁶Aman honpiak bangmah a kiang ah pia unla, amah gamtatna a leh nih in thukkik un: a helna nou ah amah ading in a leh nih in helsak un,

⁷A ki thupisakna zahzah leh a noptalna zah in amah bawlgim un, hih lungkham un: aman a lungsim in, ‘Kumpinu in ka tu a, meithai ka hi kei, bangchi mah in lungkham ngeikei ding,’ a chih ziak in.

⁸Huaiziak in ni khat sung in hipi a gawtna, sihna, lungkhamna leh kialna a hongtung ding hi; huan amah mei in haltum vek in om inteh; amah tung a vaihawm Toupa Pathian a hat ziak in.”

⁹‍Huan leitung a kumpipate amah kingaihpih leh nuamtat a omte’n, amah haltumna meikhu a muh chiang un, amah kah in mau ding uhi.

¹⁰A thuakna a hihnat a om ding lau in gamlapi ading in, “Maizen! Maizen! khopi thupi Babulon! Dak kal khat sung a na tung a vaihawmna a hongtun tak ziak in” a chi ding uhi.

¹¹‍Huan leitung a sumsinte’n, a sumsinna van uh kuamah in a leilouh ziak un, kap in a sun ding uhi.

¹²‍Huan a sumsinna vante uh bel: Dangkaeng leh dangka a sumsinna van, suangmantam, tuikepsuang, puanmalngat hoih, puansan, maimom puan, puan eng, singnamtui, saiha a bawl van, sing mantam pen chi a van bawl tengteng, sumsan leh sik leh marbul sung a belsuan bawl tengteng;

¹³‍leh singguithak, namtui, namtui haichi, thau namtui, chim, uain, thau, buhnel, buh, belam, huan sakol kangtalai leh sal, mite hinna ahi.

¹⁴‍“Huan na lungsim a na deih, gahte’n nang hon taimangsan ua, thil limchi leh hoih teng in nang a hon manthat san ua, muhnawn ahi ngeikei ding” a chi uhi.

¹⁵‍Hiai thilte a sumsinte, amah ziak a hau a bawlte’n, amah hihnat a a omna lau in gamlapi ading in, kap in a sun ding uhi.

¹⁶‍“Maizen! Maizen! khopi thupi, puanmalngat hoih leh a san leh a eng a kizem a, dangkaeng leh suangmantam leh tuikepsuang a kivannu!

¹⁷‍Dakkal khat in hichitel a hauhna thupi bangmahlou a bawl a om ziak in” a chi ding uhi. Huan longpute leh koilam lam a long a hongtungte leh longmite leh tuipi a nekzong tengteng gamlapi ah ading uhi.

¹⁸Amau khopi kang leh halna meikhu a muh chiang un “Hiai bang khaw thupi om ngei hiam” chi in a kikou uhi.

¹⁹‍Huan amau lutung ah leivui a kibuak ua a kikou ua, kap leh sun in, “Maizen! Maizen! khaw thupi huai a tuipi a mi longnei tengteng amah hauhsakna ziak a hauhsak in a om uhi! Dakkal khat sung in amah bangmahlou hita mai” a chi ding uhi.

²⁰Aw nang van, amah tung ah kipak unla, Aw nou misiangthoute, leh nou sawltakte leh nou zawlneite; na tung ua a vaihawmna Pathian in amah tung ah vai a hawmtak ziak in kipak un a chi uhi.

²¹‍Huan angel hat khat in buhgawina suang lianpi hileh kilawm suang khat a domta a, tupi ah a pailut a, “Hichibang in khopi thupi, Babulon nakpi a hihchip in om in chin, muhkhiak nawnlouh hial in a om ding.

²²‍Gosem tumte leh lasiamte leh tamngai tumte leh pengkul tumte, na sung ah kiza nawn kei hial ding hi. Khutsiam siamna nei himhim, na sung ah muhkhiak in omnawn kei hial un chin; khawl ging na sung ah kiza nawn kei ding hi.

²³‍Na sung ah meivak a vaknawn kei ding hi; mouneipa aw leh mou aw na sung ah a kiza nawn kei ding hi: na sumsinte leitung kumpipate ahi ngal ua; na bumsiamna in nam tengteng khem in a omta uhi!”

²⁴Amah sung ah zawlneite sisan, leh misiangthoute sisan leh leitung a thah a omte tengteng sisan a ki mukhia hi,” a chi hi.