Read Paite Chin KILAKNA 19 Bible Online

KILAKNA 19 - Paite Chin bible

KILAKNA 19

¹Hiai thilnung in van ah mipi aw hileh kilawm in, “Hallelujah! Hotdamna leh thupina leh thilhihtheihna i Pathian a ahi;

²A vaihawmna a dik in a kizen hi; kizuaknu thupi leitung a, a mingaihna a hihsenu tung a vai a hawmtak ziak in, Aman a sikhate sisan amah tung ah a thukta,” a chih ka zata hi.

³‍“Hallelujah! Huai khopi halna meikhu tangtawn tangtawn in a zamtou hi,” chi in a kikou nawn uhi.

⁴‍Upa sawmnih leh lite leh ganhing lite a khupboh ua, Pathian mangtutphah a tupa a beta uhi, “Amen, Hallelujah!” a chi uhi.

⁵‍Huan mangtutphah a kipan in aw a hong pawtkhia a, “Nou a sikhate aw, na vek un, a neu a lian, nou amah laute, Pathian phatna pia un” chi in.

⁶‍Mipi tampi aw hileh kilawm tui tampi ging bang leh vanpiging bang aw in, “Hallelujah! Toupa i Pathian Bangkim hihthei in vai a hawm ziak in,

⁷‍Nuamni, nakpitak in kipakni, Amah kiang ah thupina pia in: Belamnou zineih hun a hongtungta hi. A zi leng a kisakkhit tak ziak in;

⁸Amah puanmalngat hoih leh siangthou a kizepna ding in piak in a omta hi, a chih ka za hi, tua puanmalngat hoih misiangthoute nasep diktatte ahi.”

⁹‍Huan angel in ka kiang ah, “Gelh in, Belamnou zineihna nitak Ankuang um ding a chial a omte a hampha uhi” a chi hi.

¹⁰‍Huan amah be ding in a khebul ah ka pukta hi. Huan ka kiang ah, “Hon be kei hial in: Jesu thu theihpihna kem nangmah unau leh sikha hihpih ka hi; Pathian be zaw in, Jesu thu theihpihna genkholhna kha a hih ziak in” a chi hi.

¹¹‍Huan van kihong ka muta hi; Ngai in, sakol kang leh a tung a tuang Ginom leh Dik kichi leng ka mu hi; Aman dikna a vaihawm in kidouna a bawl hi.

¹²A mit meikuang bang ahi a, a lutung ah lallukhu tampi a om a, min khat amah loungal kuamah theihlouh kigelh a nei hi.

¹³Amah puan sisan a diah in a kizem a; a min, “Pathian Thu” chih ahi.

¹⁴Amah van a om sepaih hon puanmalngat hoih, ngou leh siangthou silh a sakol kang tung ah tuang in a honzui uhi.

¹⁵A kam a kipan in namte a satna ding, namsau hiam khat a hong suakkhia hi: amau tung ah sikchiang in vai a hawm dia: Pathian Bangkim hihthei hehna lauhuaina uain sukna a chil hi.

¹⁶A puan tung leh a phei tung ah min, “KUMPIPATE KUMPIPA, LEH TOUPATE TOUPA” chih a kigelh hi.

¹⁷‍Huan angel khat ni ading ka mu a; amah aw ngaihtak a kikou in, van laizawl a vasa leng tengteng kiang ah, “Hong unla, Pathian nitakan thupi ah hong kikhawm vek un;

¹⁸‍Kumpipate sa, sepaih heutute sa, mi hatte sa, sakolte sa, a tung a tute sa, mi tengteng sa, sikha leh sikha loute sa, leh milian leh mineu sa na nek theihna ding un” a chi hi.

¹⁹‍Huai gamsa leh leitung a kumpipate leh a sepaihte uh, huai sakol tung a tuangpa leh a sepaihte kidoupih ding in a hong kikhawmta uhi.

²⁰‍Gamsa mat in a omta a, zawlnei taklou, a ma a chiamtehna hih a gamsa chiamtehna neite leh amah limbete a khempa toh a man khawm a: a nih tuak un a hing in meidil, kat a kang sung ah paihlut in a omta uhi.

²¹‍Huan a dangte huai sakol tung a tupa kam a kipan a hongsuak namsau a thah in a omta uhi; amau sa in vasa tengteng gilvah in a omta uhi.