Read Paite Chin KILAKNA 2 Bible Online

KILAKNA 2 - Paite Chin bible

KILAKNA 2

¹“Ephesa khua saptuamte angel kiang ah hichibang in gelh in: A khut taklam a aksi sagih tawi dangkaeng tuikuang koihna sagih lai a vialvakpa’n hiai thilte a gen hi:

²‍“Na thilhihte, na sepgim dan leh na kuhkal dan, migiloute na ngaihmoh dan leh hiloupi a amau sawltak kichite na ze-et a, amaute zuauthei ahi uh chih na muhkhiak dan ka thei hi.

³‍Huan thuakzohna na nei a, ka min ziak in na thuak teitei a, huchi in leng na bah kei hi.

⁴‍Himahleh n’on itna masapen na tawpsan thu ah k’on dem hi.

⁵‍Huaiziak in na pukna laitak theigige inla, kisik in, na thilhih masapente hih nawn in; huchilou in zaw na kiang ah ka hongpai dia, na kisik kei leh a omna kipan in na tuikuang koihna ka suan ding hi.

⁶‍Himahleh hiai thu ah na hoih, Nikol pawlte thilhihte na hua a, ken leng huaite ka hua hi.

⁷‍Saptuamte kiang a Kha thugen bil nei peuh in za uhen. A vualzoupa kiang ah Pathian Paradise a om, hinna sing a nek ding in ka pe ding a chi, chi in.

⁸‍“Huan Smarna khua a saptuamte angel kiang ah hichibang in gelh in: A masapen leh a nanungpen, huai si a hing nawnta in hiai thilte a gen hi:

⁹‍“Na thilhihte, na gimthuak dan leh na zawn dan, himahleh na hau hi, Judate hiloupi, ahi a kigen Setan kikhopna innte Pathian gensiatna ka thei hi.

¹⁰‍Na thuak pah ding thilte kihta ken; ngai in, ze-et a na om theihna ding un Diabol in na lak ua a khente suangkulh ah honkhum pah ding; ni sawm sung gimthuakna na nei ding uhi. Sihpha in ginom in om in, huchi in hinna lallukhu k’on pe ding hi.

¹¹‍Saptuamte kiang a Kha thugen bilnei peuh in za uhen. A vualzoupa sih nihna hihnat in a omkei ding a chi, chi in.

¹²‍“Huan Pergamom khua a saptuamte angel kiang ah hichibang in gelh in: Namsau hiam tak hiamtuah nei in hiai thilte a gen hi:

¹³‍Na tenna leh Setan mangtutphah omna leng ka thei hi; ka min kiptak in na lenden a, Setan tenna mun a ka palai ginom, Antipas thah a a omlai in leng na ginna na tawpsan tuankei hi.

¹⁴‍Himahleh demna zek k’on nei, huailai a mi khenkhat Balaam sinsakna zuite na ompih ziak in, Israel tate ma a kipukna koih ding leh milimte kiang a kithoihna thilte ne ding leh kingaihna khelhna hih ding in aman tuh Balak a thuhilh hi.

¹⁵‍Huchi bangmah in Nikol pawlte sinsakna zui, mi khenkhat mah na ompih hi;

¹⁶‍Huaiziak in kisik in; huchilou in zaw na kiang ah ka hongpai pah dia, amau ka kam a namsau in ka dou ding hi.

¹⁷‍Saptuamte kiang a Kha thugen bil nei peuh in za uhen. A vualzoupa kiang ah manna selguk ka pe ding, huan suangpek ka pedia, huai suang tung ah min thak, a neipa chih louh ngal theihlouh a kigelh a chi, chi in.

¹⁸‍“Huan Thaitira khua a saptuamte angel kiang ah hichibang in gelh in: Pathian Tapa, meikuang bang mit nei a sumsan nawttet bang khe neipa’n, hiai thilte a gen hi:

¹⁹‍Na thilhihte leh na itna leh na ginna leh na nasepna leh na thuakzohna ka thei hi, a masapen sang in na thilhih nanungte a tam zaw hi.

²⁰‍Himahleh hiai thu ah demna k’on nei hi, huai numei Jezebel, zawlnei kichinu khawk na saklouh ziak in; aman ka sikhate kingaihna khelhna hih ding leh milimte kiang a kithoihna thilte ne ding a khem in a hilh hi.

²¹‍Huchi in amah a kisikna ding in hun ka pia hi; huan a mingaihna khelhna ah a kisik tuankei hi.

²²‍Ngai in, amah damlou lupna ah ka pai ding a, a thilhihte a kisik tuankei leh amah angkawm teng leng gimthuakna thupi ah ka pai ding hi.

²³‍Huan hi in a tate ka that dia; saptuamte tengteng in lungsim kiheinate leh lungtang theipa kei ka hi chih a thei ding uhi; na thilhihte bangbang un na lak ua mi tengteng ka pe ding hi.

²⁴‍Himahleh, nou, Thaitira a om midangte hiai thuhilh neilou a, ‘Setan thil thukte’ theilou tengteng kiang ah tunggikna dang na tung uah k’on behlap kei ding, ka chi hi.

²⁵‍Himahleh ka hong mateng na neihpen uh lenkip un.

²⁶‍Huan a vualzoupa leh a tawppha a ka nnate kempa kiang ah, namte tung a thuneihna ka pe ding hi;

²⁷Aman sik chiang in amau tung ah vai a hawm ding a, leibel bang in amau a khentam ding hi, hiai thuneihna ka Pa apan ka muh ahi.

²⁸‍Huan amah zingsol aksi ka pe ding hi.

²⁹‍Saptuamte kiang a Kha thugen bil nei peuh in za uhen a chi hi.