Read Paite Chin KILAKNA 20 Bible Online

KILAKNA 20 - Paite Chin bible

KILAKNA 20

¹Huan angel khat van a kipan a hong paikhesuk, a khut a kawkhuk tawbei honna tahbi leh khainiang lianpi tawi ka mu hi.

²Aman dragon, gulpi tek, Diabol leh Setan a manta a, kum sang khat sung ding in amah a henta hi.

³‍Kum sang khat a chin ma a namte a khem nawnlouhna ding in amah kawkhuk tawbei ah paihlut in a om a, a khakkhum a, amah a kilhkhumta hi: tu nung in sawtloukal amah khahnawn a om ding ahi.

⁴‍Huan mangtutphahte leh a tung a tute ka muta hi, amaute kiang ah vaihawmna piak in a omta hi: Jesu thu theihsakna ziak leh Pathian thu ziak a a ngawng uh sattan a omte kha ka mu a, huaite gamsa leh a lim beloute, a tal ua leh a khut ua a chiamtehna neiloute ahi ua; amau a hong hingta ua, Khrist toh kum sang khat vai a hawmta uhi.

⁵‍Hiai pen thohnawnna masapen ahi. Misi dangte bel kum sang khat a bei mateng a hingkik kei uhi.

⁶‍Thohnawnna masapen a pangte a hampha uhi, a siangthou uhi: Amaute tung a sih nihna in hihtheih a neih louh ziak in; himahleh amau Pathian leh Khrist siampute a honghi ding ua, kum sang khat sung amah toh vai a hawm ding uhi.

⁷‍Huan kum sang khat a bei chiang in, Setan a tanna in a kipan in khahkhiak in a om dia,

⁸‍Leitung kil li a om namte, Gog leh Magog khem a amau kidouna mun a pikhawm ding in amah hong paikhe pah dia; a tamdan uh tuipi piaunel bang ahi uhi.

⁹‍Huan amau leitung vailam khaksuak in a paitou ua, misiangthoute giahphual leh khopi it, a kimvel in a umta uhi. Huan van a kipan in mei a hong kesukta a, amaute a kangtum vek hi.

¹⁰‍Huan amaute khempa Diabol gamsa leh zawlnei taklou omna, mei leh kat dil ah paihlut in a omta uhi; tangtawn tangtawn in sun leh zan in hihnat in a omta ding uhi.

¹¹‍Huan mangtutphah ngou thupi leh a tung a tu ka muta a; a mai a kipan lei leh van a taimangta hi, amau ading in mun himhim a omkei hi.

¹²‍Misite, a neu a lian, huai mangtutphah ma a dingte ka muta hi; laibute a kihong a; laibu dang, hinna laibu leng a kihong a; misite huai laibute a thilkigelhte a kipan in a thilhih bang ua vai hawmsak in a omta uhi.

¹³‍Tuipi in a sung a om misite a hon pawtsakta a; sihna leh misi khua in a sung ua misi omte a hon pawtsak ua: mi chiteng a thilhih bangbang ua vai hawmsak in a omta uhi.

¹⁴‍Sihna leh misi khua meidil a paihlut in a omta uhi. Hiai mei dilpen sih nihna ahi.

¹⁵‍Kuapeuh hinna laibu a kigelh a muhlouh uh, meidil a paihlut in a omta uhi.