Read Paite Chin KILAKNA 21 Bible Online

KILAKNA 21 - Paite Chin bible

KILAKNA 21

¹Huan van thak leh lei thak ka muta a: van masapen leh lei masapen a beitak ziak un; tuipi leng a om nawnta kei hi.

²‍Khopi siangthou, Jerusalem thak, mou a pasal a ding a kizem bang a bawlzohsa a om, Pathian a kipan van a hong paikhesuk ka muta hi.

³‍Huan mangtutphah a kipan aw thupitak ka zak in, “Ngai in, Pathian biakbuk mihingte lak ah a omta hi, amau lak ah a teng dia amau a mite ahi ding ua, Pathian mahmah in amau a ompih dia a Pathian uh ahi ding hi.

⁴‍Huan a mit ua kipan in khitui tengteng a nulhul dia; sihna a om nawn kei dia; lusun leh kah leh natna himhim leng a om nawn kei ding hi” a chi hi.

⁵‍Huan mangtutphah tung a tupa’n, “Ngai in, thil tengteng ka siam thakta,” a chi hi. “Gelh in: hiai thute a ginom in a dik uhi” a chi hi.

⁶Aman ka kiang ah, “Sepzoh ahita hi. Kei Alpha leh Omega, a bul leh a tawp ka hi. Dangtakte kiang ah manbei in hinna tuikhuk a tui amau ka pe ding hi.

⁷‍Kuapeuh a vualzoupa’n hiai thilte a luah dia; a Pathian ka hidia, amah ka tapa ahi ding hi.

⁸‍Himahleh dawilokte leh gingtaloute leh, kihhuaite leh tualthatte leh, mingaihhatte leh bumhatte leh, milimbete leh zuautheite tengteng tan tuh dil, mei leh kat a kang, sih nihna ahi” a chi hi.

⁹‍Huan angel sagih belhbu sagih leh gawtna sagih nanungpen tawite lak a khat a hongpai a; kei a hon houpih a, "hiai ah hongpai in, mou, Belamnou zi k’on ensak ding” a chi hi.

¹⁰Aman Kha in tang lian leh sangpi ah a hon pawmangta hi, huchi in khopi siangthou Jerusalem, Pathian a kipan a van a hong paikhesuk a hon ensak hi,

¹¹‍Pathian thupina a nei a: a vakna suang mantam pen, Jasper suang, Kristal bang in a siang hi:

¹²‍Kulhbang thupi leh sangpi a nei a; kong sawmlehnih a nei a, huai kongte ah angel sawmlehnih a om ua; huai kongtungte ah Israel suan nam sawmlehnihte min a kigelh hi:

¹³A suahlam ah kongpi thum a om a; a mallam ah kongpi thum, a simlam ah kongpi thum; a tumlam ah kongpi thum a om hi.

¹⁴‍Huan khopi kulhbang in nuaiphah sawmlehnih a nei a, huaite tung ah Belamnou Sawltak Sawmlehnihte minte a tuang hi.

¹⁵‍Huan kei hon houpihpa’n khopi leh kongpite leh kulhbangte tehna ding in tehna dangkaeng sialluang a tawi hi.

¹⁶‍Huai khua in ning li a nei a, a dunglam a vailam chia chia in a lian a; a sialluang in khopi a teh a, lou ching sang sawmlehnih ahi a, dunglam leh vailam leh a sanlam a kikim uhi.

¹⁷‍Huan angel in huai kulhbang mihing tehna dan in a teh a, tong za leh sawmli leh li a sah ahi.

¹⁸‍Huan a khopi kulhbang jasper suang a kibawl ahi a; huan a khopi dangkaeng siang, limlang siang bang ahi.

¹⁹‍Huai khopi kulhbang suangphum suang mantam chiteng a zep ahi. A suangphum khatna jasper suang ahi a; a nihna sapphir suang, a thumna kalsedoni suang; a lina emerald suang;

²⁰A ngana sardonik suang; a gukna sardi suang; a sagihna kristolait suang; a giatna beril suang; a kuan a topaz suang; a sawmna kristoprai suang; a sawmlehkhatna zasinth suang; a sawmlehnihna amethis suang ahi uhi.

²¹‍Huan kongpi Sawmlehnihte tuikep suang Sawmlehnihte ahi ua; a kongpite tuikep suang khat chiat a bawl ahi a: Khopi kholak dangkaeng siang ahi a, limlang muhpaisuak theih bang ahi.

²²‍Huai ah biakin ka mu kei a; Toupa Pathian Bangkim hihthei leh Belamnou biakin a hih ziak in.

²³‍Huan a tung a tanvak ding in huai khopi in ni hiam, kha hiam leng a poimawh kei a, Pathian thupina in a tanvak a, Belamnou a meivak uh ahi.

²⁴‍Huai vak ah hotdam namte a khosa ding ua; leitung kumpipate a thupina uh toh a honglut ding uhi.

²⁵‍Bangchi mah in huai kongpite sun a khak in a omkei ding a, huailai a zan a omlouh ding ziak in:

²⁶‍Huai mun ah namte thupina leh zahtakhuaina laklut ahi ding hi:

²⁷‍Bangchi mah in huai ah thilnin hiam, ahihkeileh kihhuai leh zuaubawl himhim leng a lut kei ding hi. Himahleh Belamnou hinna laibu a min gelhte kia a lut ding uhi.