Read Paite Chin KILAKNA 22 Bible Online

KILAKNA 22 - Paite Chin bible

KILAKNA 22

¹Huan hinna tuisiang luanna lui a hon ensak hi. Huai lui bel Kristal bang a siang, Pathian leh Belamnou mangtutphah apan hong luangkhia ahi.

²‍Huai a kongzing lai, a lui lang tuaktuak ah hinna singgah chi sawm lehnih nei, kha teng a gah a om a: huai singnahte namte hihdamna ding ahi.

³‍Huan hamsia himhim a omnawn kei ding a; huai ah Pathian leh Belamnou mangtutphah a omta ding hi: a sikhate’n a na a sem ding uhi.

⁴Amaute’n a mel a mu ding ua; amah min a tal uah a om ding hi.

⁵‍Huan zan himhim a omnawn kei dia; khawnvak vak leh ni vak hiam leng a deih nawn kei ding uhi; Toupa Pathian in amau vakna a piak ding ziak in: amau tangtawn tangtawn in vai a hawm ding uhi.

⁶‍Huan aman ka kiang ah, hiai thute a muanhuai un a dik uhi: Toupa zawlnei siangthoute Pathian in thil hong ompah mahmah dingte a sikhate kiang ah musak ding in a angel a sawlta hi.

⁷‍“Ngai in, Ka hong paipah ding.” “Hiai laibu a genkholhna thute zui peuhmah a hampha hi” a chi hi.

⁸‍Huan kei Johan, hiai thilte zapa leh mupa ka hi. Huchi a ka zak leh ka muhtak in, hiai thilte hon musakpa angel khebul ah be ding in ka pukta hi.

⁹Aman ka kiang ah, “Hon be kei hial in, hiai laibu thute kem, na unau zawlneite leh nang sikha hihpih ka hi: Pathian be zaw in” a chi hi.

¹⁰Aman ka kiang ah, “Hiai laibu a genkholhnate bilhkhum ken, a hun a naitak ziak in.

¹¹‍Kuapeuh midiklou in diklouhna hih nalai henla, kuapeuh mi nin, nin nalai hen: kuapeuh midiktat, diktat nalai henla; kuapeuh Mi Siangthou, siangthou nalai hen” a chi hi.

¹²‍“Ngai in, ka hong paipah ding hi; michih a thilhih bangzel ua piak ding in ka kiang ah ka kipahman a om hi.

¹³Alpha leh Omega, a masapen leh a nanungpen, abul leh atawp ka hi.”

¹⁴‍Hinna sing a honzot theihna ding uleh, kongpi tawn a khopi sung a a lut theihna ding ua a puan uh sawpsiangte a hampha uhi.

¹⁵A pawlam ah uite, bumhatte, mingaihhatte, tualthatte, milimbete leh kuapeuh zuauthu deih a, zuauthu bawlte a om uhi.

¹⁶‍“Kei, Jesu’n saptuamte a ding a hiai thilte na kiang ua hon theisak ding in ka angel k’on sawlta hi. David zung leh a suan, zingsol aksi vak ka hi” a chi hi.

¹⁷‍Kha leh Mou in, “Hongpai in” a chi uhi. A za peuh in, “Hongpai in” chi hen. Kuapeuh a ut in hinna tui a manbei in dawn hen.

¹⁸‍Hiai laibu a genkholhna thute za peuh kiang ah ka theisak hi: Mi kuapeuh in hiai thute a behlap leh, Pathian in amau tung ah hiai laibu a kigelh gawtnate a behlap ding hi:

¹⁹‍Huan kuapeuh in hiai genkholhna laibu a thute lakmang a neih leh, Pathian in a tan ding hiai laibu a kigelh, hinna sing leh khopi siangthou a kipan a lamang ding hi.

²⁰‍Hiai thilte theisakpa’n, “ Ahi, hong paipah ding ka hi” a chi. Amen! Hongpai in, Toupa Jesu.

²¹Toupa Jesu hehpihna noute tengteng tung ah om hen, Amen.