Read Paite Chin KILAKNA 4 Bible Online

KILAKNA 4 - Paite Chin bible

KILAKNA 4

¹Hiai thilte nung in, ka et leh ngai in, van ah kongkhak a kihong hi: ka aw zak masapen pengkul aw ging bang in kei a hon houpih hi: “Hiai ah hongtou in, huchi in tunung chiang a thil hongom dingte k’on musak ding” a chi hi.

²‍Huai phet in Kha in ka om hi; Ngai in, van ah mangtutphah a hong kitungta a, mangtutphah tung ah mi khat a tu hi.

³‍Huai mi jasper leh karnelia suang bang in a kimu a; huai mangtutphah kimvel ah sakhituihup, emerald suang bang mai a kimu in a zam hi.

⁴‍Huan huai mangtutphah kimvel ah mangtutphah dang sawmnih leh li a om a; tua mangtutphahte tung ah Upa sawmnih leh li puanngou a kizema tu ka muta a, amau dangkaeng lallukhu a khu chiat uhi.

⁵‍Huai mangtutphah a kipan in khophiate, awte, leh vanpi gingte a hong suakkhia hi. Huan mei khawnvak sagih, mangtutphah ma ah a kuang a, huaite Pathian Kha sagihte ahi uhi;

⁶‍Huai mangtutphah ma ah Kristal bang a siang limlang tuipi a om hi. Huai mangtutphah kimvel ah ganhing nunglam leh malam mit a dim a om uhi.

⁷A ganhing khatna humpinelkai bang ahi a, ganhing nihna bawngnou bang ahi a, ganhing thumna in mihing mai bang a nei hi, ganhing lina muvanlai lenglai bang ahi.

⁸‍Huai ganhing lite’n kha guk a neichiat ua, tua khate kimvel leh a sunglam a mit a dim ahi: amau sun leh zan khawllou in, “Siangthou, Siangthou, Siangthou, Toupa Pathian, Bangkim hihthei, omsa omlel leh hongom ding,” a chi uhi.

⁹‍Huan huai amah mangtutphah tung a tupa leh huai amah tangtawn tangtawn a hingpa kiang a ganhingte’n, thupina leh zah-omna leh kipahna thu a piak chiang un,

¹⁰Amah mangtutphah tung a tupa ma ah Upa sawmnih leh lite a khupboh uhi, huai mangtutphah ma a a manglukhute uh koih in, amah tangtawn tangtawn a hingpa a bia uhi.

¹¹“Nang ka Toupa leh ka Pathian uh, thupina, zahhuaina, thilhihtheihna mutak na hi; thil tengteng nang na bawl a, nang thu ziak a om leh siam ahi uhi” a chi uhi.