Read Paite Chin KILAKNA 5 Bible Online

KILAKNA 5 - Paite Chin bible

KILAKNA 5

¹Huai mangtutphah tung a tupa khut taklam ah laibu a sunglam leh a pawlam kigelh chiamtehna sagih a chiamteh ka muta hi.

²Angel hat khat in aw ngaihtak in, “Kua ahia laibu hong a, huai a chiamtehnate phel tham?” chi a phuangkhia ka mu hi.

³‍Huan vantung hi in, leitung hiam, ahihkeileh lei nuai ah leng huai laibu hongthei hiam, ahihkeileh a tung enthei kuamah a omkei hi.

⁴‍Huchi in huai laibu hong a simtak hiam, ahihkeileh a tung entak kuamah a omlouh ziak in ka kapkap hi:

⁵‍Huan upate lak a khat in ka kiang ah, “Kap kenla ngai in, humpinelkai, Juda nam a, David Zung in, laibu hongthei ding leh huai a chiamtehna sagihte phelthei ding in a vualzouta” a chi hi.

⁶‍Huan huai mangtutphah leh huai ganhing lite leh huai upate lai ah thahsa hileh kilawm, Belamnou, ki sagih leh mit sagih nei ding ka mu a, huai mit sagihte Pathian kha sagih leitung tengteng a sawlkhiakte ahi uhi.

⁷Amah a hongpai a, mangtutphah tung a tupa khut taklam a kipan laibu a lata hi.

⁸‍Huai laibu a laktak in, ganhing lite leh Upa sawmnih leh lite, gawsem khat chiat leh dangkaeng belhbute gimnamtui a dimchiat tawi in, Belamnou ma ah a khupboh ua, huai gimnamtui misiangthoute thumna ahi.

⁹‍Huan la thak khat a sa uhi: “Laibu la a, huai a chiamtehnate phel tham na hi: thah in na omta a, chichih leh pauchih leh michih leh namchih a mite Pathian ading a na sisan a na leitak ziak in.

¹⁰Ka Pathian kiang uah amau Lalgam leh siampute hi ding in na bawl a; Amau leitung ah vai a hawm ding uh” chi in.

¹¹‍Huan ka etleh, mangtutphah leh ganhingte leh upate kimvel ah, angel tampi aw ka zata hi. A tam dan uh sangsawm mun sangsawm leh a sang a sang tampi ahi uhi;

¹²Amau aw ngaihtak in: “Thah a om, Belamnouin hatnate, hauhsaknate, thilhihtheihnate, zahtakhuainate, thupinate, vualzawlnate mu tham na hi” chi in a kikou uhi.

¹³‍Huan thilsiam khempeuh van a omte, leitung a omte, leinuai a omte, tuipi tung a omte leh amau a thil omte tengteng in: “Mangtutphah tung a tupa leh Belamnou kiang ah: Vualzawlnate, zahtakhuainate, thupinate leh vaihawmnate, tangtawn tangtawn in om hen” a chih uh ka za hi.

¹⁴‍Huan ganhing lite’n, “Amen!” a chi uhi. Upate a khupboh ua, a beta uhi.