Read Paite Chin KILAKNA 6 Bible Online

KILAKNA 6 - Paite Chin bible

KILAKNA 6

¹Belamnou in chiamtehna sagihte lak a khat a phellai ka mu a, ganhing lite lak a khat aw in, vanpiging bang mai in, “Hongpai in,” a chih ka zata hi.

²‍Ka et leh ngai in, sakol kang leh a tung a tupa thalpeu tawi ka muta a; amah kiang ah lallukhu piak in a om a; amah vualzou a vualzou zouzel ding in a hong paikheta hi.

³‍Huan chiamtehna nihna a phellai in, ganhing nihna, in “Hongpai in” a chih ka za hi.

⁴‍Sakol dang khat a san, hong paikhia hi: huai tung a tupa kiang ah leitung a kipan lemna lakhe ding a thupiak ahi a, huchi a amau a kithah tuahna ding un: amah kiang a namsau thupi piak ahita hi.

⁵‍Huan chiamtehna thumna a phellai in ganhing thumna in, “Hongpai in,” a chih ka zata hi. Ka etleh ngai in, sakol vawm ka muta hi; a tung a tupa’n a khut in bukna a tawi hi.

⁶‍Huan ganhing lite lai ah aw hileh kilawm in, “Huitbuh tehna dan khat shilling khat, huan barli buh tehna danthum in shilling khat, huan thau leh uain zaw hihse ken” a chih ka za hi.

⁷‍Chiamtehna lina a phellai in, ganhing lina aw in, “Hongpai in,” a chih ka za hi.

⁸‍Ka et leh ngai in, sakol daang ka muta hi: a tung a tupa min Sihna ahi a, Misikhua toh a kizui uhi. Namsau, kial leh sihna leh leitung a gam sahangte thah ding in amau kiang ah leitung seh li suah seh khat tung a thuneihna piak ahita hi.

⁹‍Chiamtehna ngana a phellai in, Pathian thu ziak leh a zuih uh theihsakna ziak a amau thah a omte maitam nuai ah ka muta hi:

¹⁰Amaute aw ngaihtak a kikou in, “Toupa Tungnungpen aw, siangthou leh dik bangtan ka sisan man uh amau leitung a tengte tung a thuklou leh vaihawmlou ding na hia?” a chi uhi.

¹¹Amaute kiang ah puanngou thupi piak in a om chiat ua: amau a sikha hihpihte uleh a unaute uh amau bang a thah a om dingte akim mateng uh na khawl tadih un chi a hilh in a om uhi.

¹²‍Chiamtehna gukna a phellai ka mu a, zinling thupitak a om hi: Ni samul saiip puan bang in a vawmta a, kha leng a pum in sisan bang in a santa hi.

¹³‍Van aksite theipi kung huihpi in a mut ling a, a hutte a pulh bang in leitung ah a pulhta uhi.

¹⁴‍Van laibuzial bang a kizial zou in suanmang in a omta: tangsangte leh tuikulh gam teng a mun ua pat suanmang in a omta uhi.

¹⁵‍Huchi in leitung kumpipate, miliante, heutute leh ahat leh ahaute, salte leh sallou teng leng tangsangte leh suangpi heng leh kawkhukte ah a kiselta uhi.

¹⁶‍Tangsangte kiang leh suangpite kiang ah, “Hon delhlum unla, amah mangtutphah tung a tupa leh Belamnou thangpaihna mai a kipan honsel un:

¹⁷A thangpaihna ni thupi hongtung hi; kua ading zou dia?” a chi uhi.