Read Paite Chin KILAKNA 7 Bible Online

KILAKNA 7 - Paite Chin bible

KILAKNA 7

¹Hiai thilte zoh in angel li, lei kil li a dingte’n leitung a huih lite leitung a nunglou ding leh tuipitung hiam, ahihkeileh singtung hiam a nunglou ding in a khawlsak uhi.

²‍Huan amau chiamtehna apat angel dang kuantou ka muta hi, Pathian hing chiamtehna a nei ua; aman huai angel lite leitung leh tuipi hihse dia piak a omte kiang ah aw ngaihtak a kikou in:

³‍Pathian sikhate a tal ua i chiamteh zohma in leitung leh tuipi leh singte hihse kei un, a chi hi.

⁴‍Huai chiamteh a omte lak a tampi, nuai khat leh sing li leh sang li, Israel suan chiteng a kipan chiamteh zah ka zata hi;

⁵‍Juda chi a kipan sing khat leh sang nih chiamteh in a om ua, Reuben chi a kipan sing khat leh sang nih; Gad chi a kipan sing khat leh sang nih:

⁶Asher chi a kipan sing khat leh sang nih; Naphtali chi a kipan sing khat leh sang nih; Manasseh chi a kipan sing khat leh sang nih;

⁷‍Simeon chi a kipan sing khat leh sang nih; Levi chi a kipan sing khat leh sang nih; Issakar chi a kipan sing khat leh sang nih;

⁸‍Zebulun chi a kipan sing khat leh sang nih, Joseph chi a kipan sing khat leh sang nih, Benjamin chi a kipan sing khat leh sang nih.

⁹‍Hiai thilteng zoh in ka et leh ngai in, mipi tampi kuamah simsenglouh, namchih leh chichih leh mi tengteng leh pau tengteng a kipan mangtutphah leh Belamnou ma a ding a, puanngou thupi a kizem a tumnah tawi ka muta hi:

¹⁰‍Huan amau aw ngaihtak in, “Mangtutphah a tu i Pathian leh Belamnou kiang ah hotdamna” chi in a kikou uhi.

¹¹Angel tengteng mangtutphah leh upate leh ganhing lite kimvel in a ding ua; mangtutphah ma a khupboh in, Pathian a bia uhi,

¹²“Amen, Vualzawlnate, thupinate, pilnate, zahtakhuainate, thilhihtheihnate, hatnate, tangtawn tangtawn in i Pathian kiang ah om hen” a chi uhi.

¹³‍Huan upate lak a khat in ka kiang ah, “Hiai puanngou thupi a kizemte kuate ahi ua, koi a kipan a hong ahi ua? chi in a hon houpih hi:

¹⁴‍Ken a kiang ah, “Ka Toupa, nang na thei hi” ka chi hi. Huan aman ka kiang ah, “Hiai mite gimthuakna thupi a kipan hongpai ahi ua, a puanthupi uh sawp in, Belamnou sisan in a hihngou uhi.

¹⁵‍Huaiziak in Pathian mangtutphah ma ah a om ua, sun leh zan in a Pathian biakin uah amah a sep sak uhi; Amah mangtutphah tung a tupa’n amau tung ah a puan in a zak ding hi.

¹⁶A gil uh kial nawn ken chin, a dang uh tak nawn himhim ken teh, amau ni in kang ken chin, satna in leng a hihgim kei ding hi.

¹⁷Belamnou huai mangtutphah lak a om A belamchingpa uh a hih ding ziak in, amau hinna tuikhuk ah a piding a; Pathian in a mit ua kipan khitui a nulhul ding” a chi hi.