Read Paite Chin KILAKNA 8 Bible Online

KILAKNA 8 - Paite Chin bible

KILAKNA 8

¹Chiamtehna sagihna a phellai in dakkal kimkhat sung van a dai sipsip hi.

²‍Huchi in Pathian ma a angel sagih dingte ka mu a, amau kiang ah pengkul sagih piak in a omta uhi.

³‍Huan angel dang khat a hongpai a, gimnamtui halna dangkaeng bel tawi in, maitam kiang ah a dingta hi, a kiang ah gimnamtui tampi mangtutphah ma a om dangkaeng maitam teng a misiangthou tengteng thumna toh hel ding in, piak in a om hi.

⁴‍Huai gimnamtui khu leh misiangthoute thumna angel khut a kipan Pathian ma ah a zamtouta hi.

⁵Angel in gimnamtui halna dangkaeng bel a la a; huai maitam a mei in a hihdim a, leitung ah a paikheta hi: huan vangingte leh khophiate leh zinlingte a hong omta hi.

⁶‍Huan angel sagih pengkul sagih tawite mut ding in a kisata uhi.

⁷A masapen in a mutta a, gial leh mei sisan toh kihel a hong omta hi, huaite leitung a paihkhiak in a omta a; leitung mun thum a khen mun khat a kang bei hi, huan sing mun thum a khen mun khat a kang beita a; loupa hing tengteng a kang beita hi.

⁸‍Huan angel nihna in a mutta a, mual lianpi mei a kang bang a kang hileh kilawm tuipi ah paihkhiak in a omta hi; tuipi mun thum a khen mun khat sisan a suakta hi.

⁹‍Huai tuipi a ganhingte hinna neite mun thum a khen mun khat a sita ua; long mun thum a khen mun khat hihsiat in a omta hi.

¹⁰‍Huan angel thumna in a mutta a, van a kipan in aksi lianpi, meisel bang a kuang a keta hi, lui mun thum a khen mun khat leh tui tuikhukte tung a deng hi.

¹¹‍Huai aksi min Khaatna ahi; tui mun thum a khen mun khat khaatna a suak hi; tuite hihkhat a a om ziak un mi tampi a si uhi.

¹²‍Huan angel lina in a mutta a, huan ni mun thum a khen mun khat leh kha mun thum a khen mun khat leh aksi mun thum a khen mun khat hihsiat ahita hi; huchi in a vaknate uh mun thum a khen mun khat hihmial in a omta hi; sun hun seh thum suah seh khat leh zan hun seh thum suah seh khat beisak in a om hi.

¹³‍Huan ka etleh, angel khat van laizawl a leng in aw ngaihtak in, “Tunggik, tunggik, tunggik, Angel thum pengkul mutlai dingte leh huai ging hong omlai dingte ziak in leitung a omte tung a gik” a chih ka zata hi.