Read Paite Chin KILAKNA 9 Bible Online

KILAKNA 9 - Paite Chin bible

KILAKNA 9

¹Angel ngana in a mutta a, van a kipan aksi leitung a kia ka muta hi; amah kiang ah guamkhuk tawbei honna tahbi piak in a om hi.

²Aman guamkhuk tawbei a hongta a; huai guam a kipan in meikhu, meipi khu bang mai a pawttou a, huai guam a meikhu ziak in ni leh huihkhua hihmial in a om hi.

³‍Huan meikhu a kipan in khaupe leitung ah a hongsuak a; aikamte’n thilhihtheihna a neih bang in amau thilhihtheihna piak in a omta uhi.

⁴Amau leitung a loupate, thilhing himhimte, leh sing peuhmahte, hihselou a, mi kuapeuh a tal ua Pathian chiamtehna neiloute kia hihse dia hilh in a om uhi.

⁵Amau that lou ding a, kha nga amau hih genthei zaw ding a hilh in a om uhi; huai a hihgentheihna aikam in mi a teh a gentheihna bang ahi.

⁶‍Huai ni chiang in min sihna a zong ding ua, bangchi mah in a mu kei ding uh; sih a ut ding ua, himahleh sihna in amau a taimangsan ding hi.

⁷‍Huan khaupete mel sakol kidouna a pang dia bawl bang ahi ua; a lutung uah lallukhu hileh kilawm dangkaeng hileh kilawm a om a, a mai uh mihingte mai a bang hi.

⁸‍Numei sam bang sam a nei ua, a ha uh humpinelkai ha bang ahi.

⁹A awm uah sik awmphawte a nei ua; a khazap ging uh kidouna lam a sakol tampi tai dupdup, kidouna kangtalai tampi ging bang ahi.

¹⁰‍Huan aikam bang in meigu nei a nei ua, mihingte kha nga hihnatna ding in a mei uah a thilhihtheihna a nei uhi.

¹¹Amaute’n guamkhuk tawbei neitu angel a tung ua kumpipa in a nei uhi: amah min bel Hebru pau in Abaddon ahi a, Grik pau in Appolion ahi.

¹²‍Tunggikna masapen a beita a ngai in, tunggikna nih tunung chiang in a hong tunglai ding hi.

¹³‍Huan angel gukna in a mut a, Pathian ma a om dangkaeng maitam ki a kipan in aw ka zata hi:

¹⁴‍Huai aw in angel gukna pengkul nei kiang ah, “Luipi Euphrates lui a angel li hen a omte phel in” a chi hi.

¹⁵‍Huan angel lite phel in a omta ua, amau mi mun thum a khen mun khat a thah theihna ding un, dak khat leh ni khat leh kha khat leh kum khat kisa in a na omta uhi.

¹⁶‍Huan sakol tungtuang sepaih a tamdan uh sing ngen mun sing nih ahi chi a a tamdan uh kigen ka za hi.

¹⁷‍Huchibang in kilakna in sakolte leh a tung ua tuangte, mei bang a san, engdup leh kat bang a eng, awmphaw neite ka muta hi: sakolte lu humpinelkai lu bang ahi ua; a kam ua kipan in mei leh meikhu leh kat a suakkhia hi.

¹⁸‍Huan a kamsung ua kipan in hii thum, mei, meikhu leh kat hong pawtkhia in mihing munthum a khen mun khat thah in a omta uhi.

¹⁹‍Huai sakolte thilhihtheihna a kam uh leh a mei ua om ahi a; a mei uh gulpi mei toh a kibang ua, lu leng a nei ua, huaite in mi a hihna uhi.

²⁰‍Huan midang huai gawtna a siloute a khut ua sepkhiakte ah a kisik tuankei uhi; dawite, dangkaengte, milimte, dangka milimte, suang milimte, leh sing milimte; mutheiloute, zatheilou leh tangtheiloute be nawnlou ding in kisik tuankei uhi.

²¹‍Huan a tualthahna uh, a mibumna uh leh a kingaihna khelhna uh leh a guktakna uh a kisik tuankei uhi.