Read Paite Chin RUTH 2 Bible Online

RUTH 2 - Paite Chin bible

RUTH 2

¹Huan, Naomi in a pasal tanau, Elimelek suan, mi neizoutak tanau a nei a; a min Boaz ahi.

²Moab mi Ruth in Naomi kiang ah, “Lou ah hon hohsak in. Mi lou ah hon hehpihmi buhsang ka va zong ding aw,” a chi hi. Aman a kiang ah, “Hoh ve, ka tanu” a chi hi.

³Huchi in a hohta a, buhlamite lakmaih a vazong a; huchi in Elimelek suan Boaz lou ah a va hoh kha geih hi.

⁴Huchi in, ngai in, Bethlehem apan Boaz a vahoh a, buhlamite kiang ah, “Na kiang uah TOUPA om hen, a chi hi. Amau TOUPA’N nang hon vualzawl hen” chi in a dawng uh.

⁵Huchi in Boaz in a sikha, buhlamite tung a heutu kiang ah; “Hiai kua nungaknou ahia oi?” a chi hi.

⁶A buhlamite tung a heutu a sikha in, “Moab nungaknou, Moab gam apan Naomi toh hongpai ahi.

⁷Aman, ‘hon hehpih inla, na buhsang ka zong dia, buhlamite’n a buhphal uh a lakkhawm khit chiang un ka zong zel ding aw’ a chi hi. Huchi in a hongpai a, in a tomchik a om chihlouh zingsang apan a om nilouh hi,” chi in a dawng uhi.

⁸Huchi in Boaz in Ruth kiang ah, “Ka tanu, ngai dih. Buhsang zong in lou dang ah hoh kenla, hiai apan pai ken. Ka sikha nungakte kiang ah om gige in.

⁹A buhlak uh en gige inla, a nung uh suizel in. Tangvalte nang bangmah hon chihlou din thu ka pevekta hi. Na dangtak peuh chiang in tuibel a tangvalte tui tawisa dawnzel in” a chi hi.

¹⁰Huchi in a kun a, leisi in a khupboh a, a kiang ah, “Namdang hinapi ing a, nang hichibang a n’on theihnopa n’on na hehpih bangchidan ahia?” a chi hi.

¹¹Boaz in a dawng a, a kiang ah, “Na pasal sih nungsiah na pi tung a na thilhih dan tengteng min a honhilh vek uh. Na nu leh na pa leh na pianna gam paisan a tuma lam in a na mi theih ngeilouhte kiang a na hongpai dante leng.

¹²TOUPA’N na thilhih hondin henla, TOUPA, Israelte Pathian, ki humbitna dia a kha nuai na muan in kipahman tampi honpia hen” a chi hi.

¹³Aman, “Ka toupa, hon hehpih in. Nang n’on lungmuan a, na sikha nungakte lak a mi hi kei mah leng, na sikhanu hoihtak in n’on houpihta ngal a” a chi hi. copy

¹⁴Annek hun in Boaz in a kiang ah, “Hongpai inla, Tanghoute hong ne sam inla, tanghou themte uain thuk ah hong diah sam in” a chi hi. Huchi in buhlamite kiang ah a tu a; buhkan a pia a; a ne a, a nek nung in leng a khamval lai hi.

¹⁵Buhsang zong dia a dinnawn in, Boaz in a tangvalte kiang ah, “Buhphalte lak ah leng tawmsak zel unla, tai kei un.

¹⁶A lomte leng dohkhiak sak unla, nutsiat zel unla, tom henla, tai kei un” chi’n thu a pia hi.

¹⁷Huchi in lou a buhsang nitaklam tan in a zong hi. A zonsa a khen a, barli buh ephah khat hiam tak a pha hi.

¹⁸A van kisuan in khopi ah a paita hi. A pi in a buhsang zon a na mu a; aman a nek khamval a sitte a suahkhia a, a pia hi.

¹⁹A pi in a kiang ah, “Tuni a koilam a buhsang zong na hia? Koi ah ahia na va sep? A hon na thei nuampa vualzawl in om hen” a chi hi. Aman kua kiang ah ahia a vasep chih a pi a hilh hi. “Tuni a ka va nasepna min Boaz ahi” a chi hi.

²⁰Naomi in a mounu kiang ah, “TOUPA, mihing leh misi tung a a hehpihna tawp tuan ngeilou in amah vualzawl hen” a chi hi. Naomi in a kiang ah, “Huai mi, i kinaihpih, i tanau bul eive” a chi hi.

²¹Moab mi Ruth in, “Kei kiang ah leng honchi eive” a chi hi.

²²Naomi in a mounu Ruth kiang ah, “Ka tanu, lou dang a a honmuh hetlouhna din a sikha nungakte lak ngen ah pai lechin a hoih ding” a chi hi.

²³Huchi in, barli buh leh buhpi lakkhit mateng Boaz sikha nungakte lak kia ah buhsang zong in a hoh a, a pi kiang ah a teng hi.