Read Paite Chin RUTH 3 Bible Online

RUTH 3 - Paite Chin bible

RUTH 3

¹Huan, a pi Naomi, a pasal nu’n a kiang ah, “Ka tanu, nang adin khawlna k’on zonsak kei dia hia, huchi in nang adin a hoih ding hi.

²I tanaupa Boaz, a sikha nungakte toh nna nasepnapa om hilou hia? Ngai in, tuzan in phual ah barli buh a zapsiang ding hi.

³Huchi in, kisil inla, thau kinilh inla, na kizepna puansilh inla, phual ah va hohsuk in. Himahleh an ne a, a dawn khit masiah a kiang ah kitheisak ken.

⁴Hichi ahi ding a, a lup chiang in a lupna chiamteh inla, lut inla, a khe lem inla, va lum in. Aman na hih ding a honhilh ding” a chi hi.

⁵Aman a kiang ah, “Na gen teng ka hih ding” a chi hi.

⁶Huchi in phual ah a hohsuk a, a pi hilh bang in a hihta hi.

⁷Boaz in an a ne a, a dawn khit in a lungtang a kipak a, buhvum bul a lum din a paita hi. Amah awlawl in a hongpai a, a khe a lem a, a lumta hi.

⁸Hichi ahi a, zan lai in huai mipa a lauta a, a langkhat a nga a; ngai in, a khe kiang ah numei khat a na lumta mai hi.

⁹Aman, “Kua na hia?” a chi hi. Aman, “Na sikhanu Ruth ka hi. Huchi in na sikhanu na puan honzawn in, ka tanau bul lah na hi ngal a” a chi hi.

¹⁰Aman, “Ka tanu, TOUPA’N nang hon vualzawl hen. Tangval genthei hiam, hausa hiam na zuihlouh in a tunglai sang in a nunglam ah hoihna na hihlang zaw hi.

¹¹Huchi in ka tanu, lau ken aw. Na gen bang in na tung ah ka hih ding. I khua a mi tengteng in numei kizentak na hi chih a thei vek ngal ua.

¹²Kitanau nai i hi ngut hi. Himahleh kei sang a naizaw a om hi.

¹³Tuzan zaw om peuhmah inla, zing chiang zingsang in na tung a aman a tanau hih ding a hihnop leh a hoih hi. Himahleh tanau hih ding na tung a a hihnop kei leh, tanau hih ding pen TOUPA a hin bang in ken ka hih ding. Zingsang tan lum nilouh in” a chi hi.

¹⁴Huchi in zingsang tan in a khebul ah a lum hi. Kuamah a kimuh chian theihma in a thoukhia hi. Aman, “Phual ah numei a hong chih himhim kuamah in theikei hen” a chi hi.

¹⁵A kiang ah, “Na puansilh la inla, doh in” a chi hi. Huchi in a doh a, barli buh tehna guk a teh a, a suan a; huchi in khua ah a paita hi.

¹⁶A pi kiang a tun in, “Ka tanu, bang n’ong chi a?” a na chi hi. Aman, huai mipa in a tung a thil a na hih tengteng a hilhta hi.

¹⁷“Hiai barli buh tehna guk a honpia a, ‘na pi kiang ah a vuak in pai ken,’ ” a honchi, a chi hi.

¹⁸Aman, “Ka tanu, bangchibang in ahia thil a hongom ding na theih ma in tu maimai in. Tuni a hiai thil a hih khit mateng huai mipa dai mailou ding ahi,” a chi hi.