Read Paite Chin RUTH 4 Bible Online

RUTH 4 - Paite Chin bible

RUTH 4

¹Huchi in Boaz kulh kongpi ah a hohtou a, huai ah a tu hi. Ngai in, a tanau bul uh a tungtang thu Boaz in a gen a hongpai hi. Huai mi kiang ah, “E! nang na hi maw! hongpai inla, tu dihve” a chi hi. Amah hongpai in a tuta hi.

²Huai khua a upate lak a mi sawm a pi a, a kiang uah, “Hiai ah tu dih ua” a chi a, huchi in amau a tuta uhi.

³A tanau bul uh kiang ah, “Moab gam apan hongkik Naomi in i unaupa Elimelek gam a zuak hi.

⁴Huchi in khomite mitmuh leh ka mite upate mitmuh in lei in. Na tat nop leh tan in. Himahleh na tatnop kei leh ka theih theihna din honhilh in. Nang lou lah kuamah a tan dia kilawm a om ngalkei uh. Nang zom in kei ka hi chih nang hon theihsak kiphamawh in ka thei” a chi hi. Aman, “Ka tan ding” a chi hi.

⁵Boaz in, “Naomi khut apan huai gam na lei nin, misi zi, Moab numei Ruth apan misi min beilou a, a gouluah ding mi a om zel theihna din na lei tel ding ahi” a chi hi.

⁶A tanau bulpa in, “Kei adin zaw ka tan theikei. Huchilou in zaw keimah gouluah ka mansuah kha ding. Ka tat theihna nang tangmai in. Ken zaw tan theilou ka himai hi” a chi hi.

⁷Nidanglai a Israelte lak a thil bangkim a hihkipna ding ua a kitat dan uleh a kikhen dan uh hichi ahi. Khedap a phel ua, a vengte uh a pia ua, huai Israelte lak a a hihdan uh ahi.

⁸Huchi in a tanau bulpa un Boaz kiang ah, “Nang adin lei zaw in” a chi hi. Huchi in a khedap a phelta hi.

⁹Boaz in upate leh mipi tengteng kiang ah, “Tuni in noute Elimelek thilneih tengteng leh Kilon leh Mahlon thilneih tengteng Naomi khut apan ka lei chih theihpihtute na hi uh.

¹⁰Huai kia hilou in misi min a manlouhna din Moab numei Ruth, Mahlon zi ka zi din ka lei a, huai, tuni in noute a theihpihtute na hi uh” a chi hi.

¹¹Kulh kongpi a mipi tengteng leh upate’n, “Theihpihtute ka hi uh. Na in a numei honglut Rakil leh Leah, Israel inkuan dingsak nihte bang in TOUPA’N bawl hen. Nang Ephrathah ah suanhuaitakin hongom inla, Bethlehem ah minthangtakin hongom in.

¹²TOUPA’N hiai nungaknou apan suan a hon bawlsak ding ziak in na inkuan uh Tamar in Judah a suansak Perez inkuan bang honghi hen” a chi uhi.

¹³Huchi in Boaz in Ruth a pi a, a zi a hong hita hi. Huchi in a luppih a, TOUPA’N nau a paisak a, tapa a nei hi.

¹⁴Numeite’n Naomi kiang ah, “Tuni mahmah a tanau nai bei a hon omsak lou, TOUPA phat in om hen. Israelte lak ah a min hongthang hen.

¹⁵Amah na hinna tungdingpa leh na teklam a hon vakpa a honghi dia; na mounu nang hon it nu, tapa sagihte sang a nang adia hoih in amah lah a suangta ngal a” a chi uhi.

¹⁶Naomi in nau a la a, a pom a, a donta hi.

¹⁷A inveng numeite’n a min a phuak ua, “Naomi adin tapa a hong piangta” chi’n a min Obed a sa uhi. Amah, David pa Jesse pa ahi.

¹⁸Hiaite Perez suante ahi uh. Perez in Hezron a suang a;

¹⁹Hezron in Ram a suang a; Ram in Aminadab a suang a;

²⁰Aminadab in Nashon a suang a, Nashon in Salmon a suang a;

²¹Salmon in Boaz a suang a, Boaz in Obed a suang a;

²²Obed in Jesse a suang a, Jesse in David a suang hi.