Read Paite Chin 1 SAMUEL 1 Bible Online

1 SAMUEL 1 - Paite Chin bible

1 SAMUEL 1

¹Ephraim tang gam Ramathaim zophim khua ah mi khat a om a, a min Elkanah ahi. Huai mi Jeroham tapa ahi a, huai mi Elihu tapa ahi a, huai mi Tohu tapa ahi a, huai mi Ephraim mi Zuph tapa ahi.

²Aman zi nih a nei a, a khat min Hannah ahi, a khat min Peninnah ahi. Peninnah in tate a nei a, Hannah in bel tate a neikei hi.

³Huai mi a khua ua kipan Shiloh ah Sepaihpawlte TOUPA houpih ding leh kithoih din kumteng in a hohtou hi. Huai ah Eli tapate nih, Hophni leh Phinehas, TOUPA siampute a om uhi.

⁴Elkanah kithoih ni a hongtun in, a zi Peninnah leh a tapate leh a tanute tengteng tantuan a bawlsak hi.

⁵Hannah tan nih a bawlsak a, Hannah lah a it mahmah ngal a. Himahleh TOUPA’N a sul a khak sak hi.

⁶TOUPA’N a sul a khak sak ziak in a melma in a lungkham saknak hi.

⁷Huchibang a kumtenga a hih ziak in TOUPA inn a hohtouh teng in a lungkhamna a tokthou nak hi. Huchi in a kapkap a, an leng a ne kei hi.

⁸A pasal Elkanah in a kiang ah, “Hannah, bang a chia ahia na kah? Bang a chia an ne lou na hia? Bang a chia lungkham na hia? Tapa sawm sang in nang adin ka hoihzaw ka hia?” a chi hi.

⁹Huchi in, Shiloh a a nek ua a dawn khit un Hannah ading a, siampu Eli TOUPA biakin kong khuambul a a tutna ah a tu hi,

¹⁰Hannah lungsim haksa mahmah in a om a, TOUPA kiang ah a thum a, khase mahmah in a kap hi.

¹¹Thu a chiam a, “Sepaihte TOUPA aw, na sikhanu gimna en a, n’on theihgige a, na sikhanu n’on mangngilh louh a, na sikhanu tapa na piak leh, a damsung teng TOUPA ka pedia, a lu met ahi kei ding” a chi hi.

¹²Hichi ahi a, TOUPA ma a a thum sanlai in Eli in a mukphun a na chiamteh hi.

¹³Hannah in a lungtang in a gen a, a muk kia a tangsak a, a aw bel zak ahi kei hi. Huaiziak in Eli in zukham a sa hi.

¹⁴Huchi in Eli in a kiang ah, “Bang tan ahia kham a na om nilouh ding? Na uain koihmang in” a chi hi.

¹⁵Hannah in, “Kham kei veng e, ka toupa. Lungsim lungkham mahmah numei ka hi. Uain leng, Zu chik leng ka dawn kei, TOUPA ma ah ka lungsim ka suahkhia ahizaw.

¹⁶Na sikhanu Belial tanu in honngoh hetken. Lungsim a dimlet ka lungkimlouhna leh ka lungkhamna genkhia ka hi zaw hi” chi’n a dawng hi.

¹⁷Eli in, “Lungmuangtak in pai in, Israelte Pathian in na thil nget nang honpia hen” chi in a dawng hi.

¹⁸Aman, “Na sikhanu na mitmuh in deihsakna musak in” a chi hi. Huchi in numei a paita a, an a ne a, lungkham mel a puta kei hi.

¹⁹Zingsangpi in a thou ua, TOUPA a bia ua, a pai ua, Ramah khua a inn uh a tungnawnta uh. Elkanah in a zi Hannah a luppih a, TOUPA’N amah a theigige hi.

²⁰Hichi ahi a, Hannah in nau a pai a, a hun a hongtun in tapa a nei hi.“ TOUPA ka nget ziak in” chi in a min Samuel a sa hi.

²¹Huchi in, Elkanah leh a inkawte tengteng TOUPA ma a kumteng a a kithoihna uh lan ding leh a thuchiam uh tangtun din a hong paitou uhi.

²²Hannah bel a hohtou kei hi. A pasal kiang ah, “Kei zaw naupang in nawinek a tawp masiah ka hohtou kei ding. Huai hun chiang in TOUPA ma a kilat theihna din ka pi ding. Huai ah a om nilouhta ding” a chi hi.

²³A pasal Elkanah in a kiang ah, “Hoih di na chih bangzel in hih in. A nawinek na tawpsak tan in om in. Himahleh TOUPA’N a thu hihkip lel hen” a chi hi. Huchi in nawinek a tawp masiah numei bel a omta a, a tapa nawinek a tawp masiah nawi a nesak hi.

²⁴Nawinek a tawp tak in, tangbuang ephah khat leh uain thawl khat tawi in bawngtal thum toh Shiloh a TOUPA inn ah a ta naupang chik paipih in, a pitou hi.

²⁵Bawngtal khat a gou in, naupang Eli kiang ah a pi uhi.

²⁶Aman, “Toupa, na hinna lou in ka gen ahi, kei zaw aw, toupa, hiai lai a na kiang a ding a TOUPA kiang a thum numei ka hi.

²⁷Hiai naupang ngen in ka thum a, TOUPA’N ka nget a honpeta hi.

²⁸Huaiziak in ken leng TOUPA kiang ah ka lan hi. A damsung teng TOUPA adia lat ahi” a chi hi. Huai ah aman TOUPA a bia hi.