Read Paite Chin 1 SAMUEL 10 Bible Online

1 SAMUEL 10 - Paite Chin bible

1 SAMUEL 10

¹Huaikhit in Samuel in sathau bawm a lakhia a, a lu ah asung a, a tawp a, “TOUPA’N a goutante tung a heutu din sathau a honnilh kei maw?

²Tuni a n’on nutsiat chiang in Zelzah ah Benjamin gamgi a Rakil han kiang ah mi nih na mu dia; amau na kiang ah, ‘Na sabiltung zonte a muta uh. Ngai in, na pa’n sabiltungte lungkhampih nawnlou in, nang a hon lungkhampihta hi. Ka tapa adin bang ka hihdia, chichi ahi, a chi ding uh’.

³Huai apan pai zel inla, Tabor tawsaw na vatung dia, huai ah mi thum Bethel a Pathian kiang a hohtou dingte’n hon na kituahpih ding uh. Khat in kelnou a pom dia, khat in tanghoupek khal thum a tawi dia, khat in uain thawl a tawi ding hi.

⁴Chibai a honbuk ding ua, tanghoupek khal nih a honpe ding ua; huai na la ding ahi.

⁵Huaikhit in Philistia sepaihte omna Pathian tang na va tung ding. Hichi ahi ding a, huai khua na va tun chiang in zawlnei pawl khat a ma ua pekgingte, khuangtate, tamngaite leh kaihgingte tawi mi pawl toh munsang apan hong paikhesuk na tuak dia, amaute’n thu a gen ding uhi.

⁶TOUPA Kha nakpitak in na tung ah a hongtung ding a, nang leng amau toh thu na gen dia, huchi in mituam na suak ding hi.

⁷‘Hiai chiamtehnate na tung a a hongtun chiang in, thil hongom in a zil dungzui in na hih ding ahi. Pathian lah na kiang ah a om ngal a.

⁸Kei ma in Gilgal ah hohsuk in. Ngai in, keileng haltum thillatte leh lemna kithoihnate lan din na kiang ah ka hongsuk ding’. Na kiang a ka hong a, na hih ding k’on hilh ma ni sagih na tam ding” a chi hi.

⁹Huchibang a hong hingei a, Samuel paisan dia a nungngat tak in Pathian in lungtang dang a peta hi. Huai chiamtehna tengteng huai ni’n a hongtung vek hi.

¹⁰Huchi in tang a hongtun uleh, ngai in, zawlneite’n a na kituahpih uh. A tung ah TOUPA Kha nakpitak in a hongtung a, a thugenna uah amah leng a telsamta hi.

¹¹Hichi ahi a, tuma siaha amah a na theisate’n zawlneite thugenna ah a telsam chih a theih un, a kihou ua, “Kish tapa tung a thil hongom bangchidan ahita a? Saul leng zawlneite lak a telsamta ahi maw?” a kichi uhi.

¹²A omna khua ua mi khat in a dawng a, “A pa uh kua ahi tuan a ahia?” a chi hi. Huchi in Saul leng zawlnei ahi samta maw? chih paunak a hong hita hi.

¹³A thugen khit in munsang a tungta hi.

¹⁴Saul pangak in a kiang ah leh a sikha kiang ah, “Kaw hoh na hi ua?” a chi hi. Aman “Sabiltung zong ka hi uh. Ka muh zohlouh ziak un Samuel kiang ah ka vahoh uh” a chi hi.

¹⁵Saul pangak in, “Samuel in na kiang ua bang ahia a gen honhilh dih” a chi hi.

¹⁶Saul in a pangak kiang ah, “Sabengtungte a muta uh chih a honhilh hi” a chi hi. Himahleh lalgam thu Samuel in a genpen a hilh kei hi.

¹⁷Huchi in Samuel in mipite Mizpah ah TOUPA mai ah a samkhawm hi.

¹⁸Huai ah Israel suante kiang ah, “TOUPA, Israelte Pathian in hichi in a chi. Israelte Aigupta apan ka pikhia a, Aigupta mite khut apan leh nou hon nuaisiah gam tengteng apan k’on hunkhia hi.

¹⁹Himahleh tuni in na mangbatna tengteng uleh na gimthuakna tengteng ua kipan nou hon humbitpa na Pathian uh na deihkei uh. A kiang ah, Ahi kei, kumpipa hon bawlsak in, na chi uh. Huaiziak in, tuin a nam a nam leh a chi a chi in TOUPA ma ah hong kilang un” a chi hi.

²⁰Huchi a Samuel in Israel chi tengteng a hong kilat naisak tak in Benjamin chitel a hong hita.

²¹Benjamin chite bel a inkuan kuan in a hong kilak ua, Matri mite inkuan tel a honghi a, Kish tapa Saul tel a hong hita hi. Amah a zon uh leh a muzou kei uh.

²²huaiziak in, TOUPA a dong tuan nawn ua, “Hiai mi hongpai nailou hiam” a chi uh. TOUPA’N a dawng a, “Ngai un, vanlak ah a kibu hi” a chi hi.

²³Huchi in a tai ua, a va pikhia uh. Mipi lak a adin leh mi lak ah a sangpen a, kuamah a liangzang khengzou a omkei uhi.

²⁴Samuel in mi tengteng kiang ah, “TOUPA miseh na mu uhia? Mi tengteng lak ah amah bang mahmah a omkei uh” a chi hi. Mite a kikou ua, “Pathian in kumpipa hondam hen” a chi uhi.

²⁵Huchi in Samuel in mipite lalgam omdan ding a hilh hi. Laibu ah a gelh a, TOUPA ma ah a koih hi. Samuel in mite amau in chiat ah a pai sakta hi.

²⁶Saul leng Gibeah khua a a in ah a pai sam hi. Pathian in a lungtang uh a khoih mihangsante leng amah toh a paikhawm uhi.

²⁷Himahleh Belial tapate’n, “Hiai mi’n bangchi’n a hon hondam thei mahmah dia?” chi in amah a ngaineu ua, thilpiak a hong pekei uh. Himahleh amah bel a daidide hi.