Read Paite Chin 1 SAMUEL 11 Bible Online

1 SAMUEL 11 - Paite Chin bible

1 SAMUEL 11

¹Huchi in Ammon mi Nahash a hong kisa a, Jabesh-gilead sual tum in a vagiah khum hi. Jabesh mi tengteng in Nahash kiang ah, kou toh thukhun bawl in, huchi in nang na ka sem ding uh, a chi uh.

²Ammon mi Nahash in a kiang uah, hichibang in ahi nou toh thu ka khun ding. Na mit taklam tengteng uh khelkhiak vek ahi dia; huai Israel mi tengteng minsiatna dia koih ahi ding, a chi hi.

³Jabesh khua upate’n a kiang ah, “Israel gam tengteng a thupawmite ka sawl theihna ding un ni sagih sung hon hungaih in. Hon hondam ding kuamah a omkei leh na kiang ah ka hong paikhe ding uh” a chi uhi.

⁴Huchi in huai thupawmite Saul omna khua Gibeah a hongtung uh. Mite bil a zak in huai thute a gen ua; mite aw suah in a kap uhi.

⁵Ngai in, lou apan Saul bawng hawl in a hongpai hi. Saul in “Bang a chi ua ahia mite a kah uh?” a chi hi. Jabesh khua a mite thugen a hilh uhi.

⁶Huai thu a zaktak in Saul tung ah Pathian Kha a hongtung a nakpitak in a hehta hi.

⁷Huchi in bawngtal nih a la a, a satnen vek hi. Israel gam tengteng ah thupawmite a hawmsak a, “Kuapeuh Saul leh Samuel zui nuamlou peuhmah hiai bawngtal bang a hih ding ahi” a chi hi. Huchi in mipite’n TOUPA a lau ua, thukhatsat in a hong kuankheta uh.

⁸Bezek ah amaute a sim a, Israel mite nuai thum ahi uh. Judah mite sing thum ahi uhi.

⁹A hongpai thupawmite kiang ah, “Jabesh-gilead mite kiang ah, zingchiang in nisat sanlaitak mah in hotkhiak na hi ding uh va chi un” a chi hi. Thupawmite a vahoh ua, Jabesh mite a hilh ua, huchi in a kipak mahmah uhi.

¹⁰Huchi in Jabesh mite’n “Zingchiang in na kiang uah ka hongpawt khe ding ua, ka tung uah na utut un hihmai un” a chi uhi.

¹¹Hichi a honghi a, a zing in Saul in mipite pawl thum in a koih a, zing ven hunlaitakin a giahmun uah a lut uh. Ammon mite sun nisat sanlai tan in a that uhi. Hichi ahi a, a thahvalte a dalhzak vek ua, nih a omkhawm himhim leng a omkei uhi.

¹²Mipite’n Samuel kiang ah, “Kuate ahia, Saul in i tung uah vai a hawm tel ding maw chi? Huai mite honpi in ka that ding uh” a chi uhi.

¹³Saul in, “Tuni chitchiat in zaw kuamah that kei un. Tuni in TOUPA’N Israelte lak ah hotdamna a bawlta ngal a” a chi hi.

¹⁴Huchi in Samuel in mipite kiang ah, “Kisa dih uh, Gilgal ah i hoh ding ua, huai ah lalgam i thaksak nawn ding uh” a chi hi.

¹⁵Huchi in mite tengteng Gilgal ah a hohta uh. Saul Gilgal ah TOUPA ma ah kumpipa in a bawlta uhi. Huai ah TOUPA ma ah lemna kithoihnate a lan uhi. Huchi in huai ah Saul leh Israel mi tengteng a kipak mahmah uhi.