Read Paite Chin 1 SAMUEL 12 Bible Online

1 SAMUEL 12 - Paite Chin bible

1 SAMUEL 12

¹Huan, Samuel in Israel mi tengteng kiang ah, “Ngai dih ua, ka kiang a na thugen tengteng uh ngaikhia in, na tung uah kumpipa ka bawlta hi.

²Tuin, ngai dih ua, kumpipa in na ma uh a kai hi. Kei zaw tek in ka lu leng a kangta hi. Ngai dih ua, ka tapate na kiang uah a om uh. Ka naupan apan tutan na ma uh k’on pi hi.

³Hiai ah ka om hi. TOUPA ma leh a sathau nilhpa ma ah honsel un. Kua bawngtal ka suh ngei a? Kua sabiltung ahia ka suh ngei? Kua ka khem ngei a? Kua ka hih genthei ngei a? Ka mit tawsak din kua apan in golhna ka la ngei a? K’on din nawn vek ding” a chi hi.

⁴Amau, “n’on khem ngeikei. N’on hih genthei ngei sam kei. Kuamah khut apan lak tuak louh leng na la ngeikei” a chi uh.

⁵Aman a kiang uah, “Ka khut ah bangmah kilawmlou na mu kei uh, chih tuni in TOUPA na lak uah theihpihpa ahi a; a sathaunilhpa a theipihpa ahi” a chi hi. Amau, “Amah a hon theipihpa ahi” a chi uhi.

⁶Samuel in mite kiang ah, “Mosi leh Aron seppa leh Aigupta apan na pipute uh pikhepa TOUPA ahi.

⁷Huchi in ding kinken unla, TOUPA ma ah TOUPA’N na tung uh leh na pipute uh tung a thildik a na hihte k’on sutpih ding.

⁸Aigupta gam a Jakob a lut nung in, na pipute un TOUPA a sam ua, huchi in TOUPA’N Mosi leh Aron a sawl hi. Na pipute uh Aigupta gam apan a pi khia a, hiai mun ah a tengsak hi.

⁹Himahleh, TOUPA a Pathian uh a mangngilh uh. Aman Hazor sepaih heutu Sisera khut, Philistia mite khut leh Moab kumpipa khut ah a khong a, amaute’n a dou uhi.

¹⁰TOUPA a sam ua, TOUPA i lehngatsan ua, Baal leh Ashtaroth na i sep ziak un Toupa tung ah i na khialta uh. Himahleh tuin ka melmate khut apan hon hunkhia inla, huchi in nang na ka sem ding uh, a chi uh.

¹¹TOUPA’N Jerubbaal, Bendan, Jephthah leh Samuel a sawl a, khatlam khatlam a na melmate uh khut apan a hon hunkhia hi. Huchi in bittak in na tengta uhi.

¹²Ammon suante kumpipa Nahash nou dou din a hong kuan chih na theihtak un, ka kiang ah, ‘Ahi kei, kumpi in ka tung uah vaihawm hen’ na chi uh. TOUPA Pathian lah na kumpipa uh ahi gige ngal a.

¹³Huchi in na kumpipa tel uleh nget uh en dih uh, TOUPA’N kumpipa a hon bawlsakta hi.

¹⁴TOUPA laudan na siam ua, a nna nasep ua, a aw na zuih ua, TOUPA thupiak na helsan kei ua, nou leh na tung ua vaihawm kumpipa toh TOUPA na Pathian uh zuite na hih uleh a hoih ding hi.

¹⁵Himahleh, TOUPA aw zuilou a, TOUPA thupiak na helsan uleh na pipute un TOUPA khut a thuak mah bang un nou leng na thuak ding uhi.

¹⁶Huchi in ding kinken unla, TOUPA’N na mitmuh ua thil thupitak a hih ding en un.

¹⁷Tuni in huit buh a la uh ahi kei maw? ‘Van gingsak ding leh vuah zusak din TOUPA ka sam ding. Huchi in kumpipa na nget thu uah TOUPA mitmuh a thil na hihkhelh uh a thupidan thei in na mu ding uh” a chi hi.

¹⁸Huchi in Samuel in TOUPA a sam a, TOUPA’N huai ni’n van a gingsaka, vuah a zusak hi. Huchi in mite’n TOUPA leh Samuel a lau mahmah uhi.

¹⁹Mi tengteng in Samuel kiang ah, “Ka sihlouhna ding un, TOUPA na Pathian kiang ah na sikhate hon thumsak in. Hiai thil hoihlou tak, kumpipa ka na nget uh, ka gitlouhna tengteng uh behlap ka na hita uh” a chi uhi.

²⁰Samuel in mite kiang ah, “Lau kei un, hiai thil gilou tak na hihta uhi. Himahleh TOUPA na zuih uh pialsan kei unla, na lungtang tengteng un TOUPA na semzaw un.

²¹Lampial kei un. Manna bei thilte leh nou hon hunkhe theiloute zuikei un; amaute bangmahlou ahi ngal ua.

²²A min thupitak ziak in TOUPA’N a mite a lehngatsan kei dia; Amah mite hidia noute honbawl TOUPA kipah lam ahi.

²³Huai phet leng ahi kei a, nou adia thum tawp in TOUPA tung ah thil ka hihkhial hetkei ding. Himahleh lampi hoih leh dik k’on kawkmuh zaw ding ahi.

²⁴TOUPA laudan siam photphot un. Na lungtang tengteng un chihtak tak in amah na sem unla; nou adia a thilhih thupitakte ngaihtuah un.

²⁵Himahleh gilou tak a thil na hihlai lai uleh nou leh na kumpipa uh na mangthang ding uh” a chi hi.