Read Paite Chin 1 SAMUEL 13 Bible Online

1 SAMUEL 13 - Paite Chin bible

1 SAMUEL 13

¹Saul kum sawmthum a hih in vaihawm apan a; Israelte tung ah kum nih vai a hawm hi.

²Saul in Israelte lak ah mi sang thum a tel hi. Huai teng lak a sang nih Mikmash ah leh Bethel tang ah Saul kiang ah a om uh. Sang khat Benjamin gam a Gibeah ah Jonathan kiang ah a om uh. A dangteng a puanin uah a paisak vek hi.

³Jonathan in Gibeah a om Philistia galvil sepaihte a vasual hi. Huai Philistia mite’n a naza uh. Huchi in Saul in, “Hebru mite’n naza uhen” chi in a gam tengteng ah pengkul a mutsak hi.

⁴Israel tengteng in, Saul in Philistia galvil sepaihte a sual chih leh Israelte’n leng Philistia mite huat in a om uh chih thute a na zata uh. Huchi in mite Saul kiang ah Gilgal ah a ki kaikhawm uhi.

⁵Philistia mite Israelte sual din a ki kaikhawm uhi. Kangtalai sing thum, sakol tungtuangmi sang guk, mihing tuipi piau a piaunel zah mahmah a tam ahi uh. Huchi in a kuantou ua, Bethaven suahlam pang ah Mikmash ah panmun a khoh uhi.

⁶Israel mite’n umbit in a om uh, chih a kitheih un, mite lah a lunghimawh mahmahta ua, mite kawkhuk ah, lounok ah, suangpi pang ah, kulh ah leikawhawm ah a kibuta uhi.

⁷Hebru mi khenkhatte Jordan gal ah Gad leh Gilead gam ah a tai uh. Saul bel Gilgal ah a om lailai a, mite’n ling kawmkawm in amah a zui uhi.

⁸Samuel hunseh bang in ni sagih a tam hi. Himahleh Samuel lah Gilgal ah a hongpai kei hi. Huchi in mite’n a taizak santa uhi.

⁹Saul in, “Haltum thillat ding leh lemna thillat dingte hiai ah ka kiang ah honla un” a chi hi. Huchi in haltum thillat a lan hi.

¹⁰Hichi ahi a, haltum thillat a lankhin lel a, ngai in, Samuel a hongtung hi. Amah mu din Saul a kuan hi. Samuel in, “Bang na hih na hia?” a chi hi.

¹¹Saul in, “Mite’n a hon paimangsan khin ua, nang lah niseh ni’n na hongtungta kei hi. Philistia mite lah Mikmash ah a kikaikhawm uh chih ka thei hi.

¹²Huaiziak in, ‘Philistia mite’n Gilgal ah hon sualdek dek uhi. TOUPA hehpihna lah ka ngen naikei a,’ ka chi hi. Huaiziak in, haltum thillat lanlou thei ka hi kei” a chi hi.

¹³Samuel in Saul kiang ah, “Na thilhih a haihuai mahmah hi. TOUPA na Pathian thupiak, nang thu a honpiak na zuikei hi. TOUPA’N Israelte tung ah na lalna tangtawn a hihkip tum zaw hiven maw,

¹⁴Himahleh na lalna a mongta ding. TOUPA’N thu a honpiak na zuih louh ziak in TOUPA’N amah lungtang bang pu mi a zong a, mite tung a heutu din TOUPA’N amah a septa hi” a chi hi.

¹⁵Samuel a thou a, Gilgal apan Benjamin gam a Gibeah ah a hoh touta hi. Saul in a kiang a mi omte a sim a, za guk tak ahi uh.

¹⁶Saul leh a tapa Jonathan leh a kiang ua mi omte Benjamin gam a Gibeah ah a om uh. Himahleh Philistia mite’n Mikmash ah panmun a khoh uhi.

¹⁷Lokmite Philistia mite panmun apan pawl thum a hong kuan uh. Pawl khat in Shual gam a Ophrah lam zuan lampi a zui uh.

¹⁸Pawl khat in Bethhoron lam zuan lampi a zui ua, pawl dang in gamdai zul Zeboim guam lam zuan gamgi lampi a zui uhi.

¹⁹Philistia mite’n, “Hebru mite’n namsau hiam, tei hiam a bawl kha zenzen ding uh” a chih ziak un Israel gam pumpi ah siksekmi a kimu kei hi.

²⁰Himahleh Israel mi tengteng, michih a leilehna, a suanggal, a heipi, a tupi tat hiam din, Philistiate kiang ah a hohsuk zel uhi.

²¹Himahleh tupite, suanggalte, sikkhutte leh heipite tat hiamna dia sikhat leh chiang mukzumte bawlna ding a nei uhi.

²²Huchi in hichi ahi a, a kidou ni un Saul leh Jonathan kiang a om mite’n namsau hiam, tei hiam a neikei uh. Saul leh a tapa Jonathan in bel a nei uhi.

²³Philistia galvil sepaihte Mikmash kuam ah a paikheta uhi.