Read Paite Chin 1 SAMUEL 14 Bible Online

1 SAMUEL 14 - Paite Chin bible

1 SAMUEL 14

¹Huan, hichi ahi a, ni khat Saul tapa Jonathan in a galvan tawipa tangval kiang ah, “Kisa dih, gal langkhat Philistia mi galvil sepaihte omna ah i va hoh ding” a chi hi. Himahleh a pa a hilh kei hi.

²Saul bel Gibeah gam tawp lampek a Migron a theibuhfai kung nuai ah a om hi. A kiang a om mite za guk ahi uh.

³Shiloh a TOUPA siampu Eli tapa Phinehas tapa Ikabod unaupa Ahitub tapa Ahijah siampu puanak silh a om hi. Jonathan a hoh chih mipite’n a theikei uhi.

⁴Jonathan in Philistia mi galvil sepaihte omna a hoh a tupna guam leh guam kikal ah a langtuak tuak ah suangpi sangtak a om hi. A khat min Bozez ahi a, a khat min Seneh ahi.

⁵Suangpi sang khatpen Mikmash zawn mallam a om ahi a, a dang khat pen Gebeah zawn simlam a om ahi.

⁶Jonathan in a galvan tawipa tangval kiang ah, “Kisa dih, zeksumlouh sepaihte omna ah i va hoh ding. TOUPA’N thil a hon hihsak kha mai hiam. TOUPA adin a tam hiam, a tawm hiam a hotdamna ding bangmah dalna a om tuan ngalkei a, a chi hi.

⁷A galvan tawipan a kiang ah, “Na lungsim a om bangtak in hih in. Ngai in, na lungsim bang geih ka lungsim ahi” a chi hi.

⁸Huchi in Jonathan in, “Kisa in, a kiang uah i va hoh galkah dia, i va kimu sak ding.

⁹I kiang a, “Na kiang ua ka hong matan uh na om un, a honchih uleh i mun ah i ding kinken dia, a kiang uah i hohtou kei ding.

¹⁰Ka kiang lam uah hongtou un, a chih uleh bel i hohtou dia, TOUPA’N i khut ah amaute a honpia chih ei adin chiamtehna ahi ding” a chi hi.

¹¹A nih un Philistia mi galvil sepaihte a va kimusak uhi. Philistiate’n “En dih uh, Hebru mite a bukna leihawm apan a hong paikhia uh,” a chi uhi.

¹²Galvil sepaihte omna a mite’n Jonathan leh a galvan tawipa, “Hongtou unla, thil banghiam k’on ensak ding uh,” chi in a na sam uhi. Jonathan in a galvan tawipa kiang ah, “Hon zuitou dih. TOUPA’N amaute Israelte khut ah a peta hi” a chi hi.

¹³Jonathan a khut leh khe toh pangin a kaltou a, a galvan tawipan a zui hi. Amau bel Jonathan ma ah a puk ua, a ma nung in a galvan tawipan amaute a that hi.

¹⁴Jonathan leh a galvan tawipan a thah masak pen uh mi sawmnih vel, lou ching khat, bawngtal nih leilehna chia sung ahi.

¹⁵Giahmun leh gamlak a mipi tengteng a ling ua; galvil sepaihte leh lokmite leng a lingsam uh. Huan zin a hongling a; huchi in nakpitak a linna a om hi.

¹⁶Benjamin gam Gibeah Saul galvil mite’n a en vialvial uhi. Ngai in, mipite zul in a zulkhe zungzung ua, khatlam khatlam ah a kiphu muimui uhi.

¹⁷Huchi in Saul in a kiang a mipi omte kiang ah, “Tuin kisim unla, kuate ahia kimlou hong ki en dih ua” a chi hi. A hong kisim uh leh ngai in, Jonathan leh a galvan tawipa a na omta kei uhi.

¹⁸Saul in Ahijah kiang ah, “Pathian bawm vala dih” a chi hi. Huailai in Pathian bawm Israel suante kiang a om hi.

¹⁹Hichi ahi a, Saul in siampu a houpih laitak in Philistia mite giahmun lam a thawmging a ngaih semsem hi. Saul in siampu kiang ah, “Na khut kaikik in” a chi hi.

²⁰Huchi in Saul leh a kiang a mipi om tengteng a paikhawm ua, kidouna ah a hohta uh. Ngai in, amau leh amau namsau in a na kisattuah ua, huchi in a pumbuai uhi.

²¹Hiai ban ah tuma lam a Hebru mite huai gam kim apan Philistiate giahmun a amau toh vapaitoute leng Saul leh Jonathan kiang ah om in Israel mite lam ah a hong pang nawnta uhi.

²²Huchi mah bang in Ephraim tanggam a Israelmi kibu tengteng in Philistia mite a taimang uh chih a naza ua, amau leng kidouna a pangsam in a delhzui uhi.

²³Huchi in huai ni’n TOUPA’N Israelte a humbitta hi. Bethaven pha in a sual uhi.

²⁴Huai ni’n Israel mite a mangbang uh. Saul in, “Ka melmate tung a phu ka lakna dia nitaklam a hih masiah kuapeuh in an a nek leh hamsia thuak hen” a chih ziak in. Huchi in kuamah in an himhim a chiam kei uhi.

²⁵Mipi tengteng gamnuai a vatung ua, lei ah khuaizu a na om hi.

²⁶Mipite gamnuai a vatun un, ngai in, khuaizu a na takkhia hi. Himahleh mipite’n hamsia a lauh ziak un kuamah in khut a sawkin a chiam ngamkei uhi;

²⁷Himahleh Jonathan in apan mipite hamsiaa a vau lam theilou in; a chiang mongin khuaikhak sun in a neta a, huchi in a mithah a hongchiangta hi.

²⁸Mipi lak a mi khat in a houpih a, “Na pa’n zaw mipite tuni a an ne peuhmah hamsethuak in om hen” chi in a vau bikbek hi. Huchi in mipite a bah uhi, a chi hi.

²⁹Jonathan in, “Ka pa’n mite buaisak lel eive. Enta unla, khuaizu tawmchik ka chep ziak lel a ka mit a hongvak tak dan.

³⁰Mipite’n gallak thil a muh peuhpeuh uh tuni in a utut uh ne thei le uh vakzaw na tel in chia! Huaiziak in, Philistiate tamsem thahlouh loh i hi ve ua” a chi hi.

³¹Huai ni’n Mikmash apan Aijalon tan in Philistia mite a dou uh. Huchi in mipite a bah mahmah uhi.

³²Mipite’n a gallak thil uh a boh in a boh uh. Belamte, bawngtalte leh bawngnoute a man ua, lei ah a that ua, mipite’n a sisan toh a neta uhi.

³³“Ngai in, mipite’n sisan toh ne in TOUPA tung ah a khialta uh” chi in Saul a hilh uhi. Aman, “Na talekta uhi; ka ma ah suang lianpi khuk un” a chi hi.

³⁴Saul in, “Mipi lak ah vakzak vek unla, a kiang uah, michih in a bawng honkai hen. Michih in a belam honkai hen. Hiai ah hong gou in ne hen. A sisan toh ne a TOUPA tung a thil hihkhial lou in” vachi un, a chi hi. Huai zan in mi tengteng in amau bawngtal chiat uh a honkai ua, huai ah a gou uhi.

³⁵Saul in TOUPA adin maitam a doh a; huai pen TOUPA adia maitam a bawl masak pen ahi.

³⁶Saul in, “Zanchiang in Philistia mite vadou unla, zing khovak tan in i sual ding uh. Kuamah i hawikei ding uh” a chi hi. Amau, “Hoih nasak peuhmah hih in” a chi uh. Siampu in ahihleh “Pathian naih ni” a chi hi.

³⁷Saul in Pathian a dong a, “Philistia mite ka vasual diam? Israelte khut ah amaute na pe diam?” a chi hi. Himahleh huai nin a dawng kei.

³⁸Saul in, “Nou mipi heutu tengteng hongnai dih ua. Tuni in a koipen ah ahia i khelh uh theihkhiak tum dih uh.

³⁹Israelte hondam zelpa TOUPA a hinlai teng ka tapa Jonathan hilhial in a na hihkhelh leh amah a sih ngeingei ding ahi” a chi hi. Himahleh mipi lak a mi kuamah a dawng himhim a omkei uh.

⁴⁰Israel tengteng kiang ah, “Noute a tuam in omkhawm unla, kei leh ka tapa Jonathan a tuam in ka omkhawm ding uh” a chi hi. Mipite’n Saul kiang ah, “Hoih nasak bang in hih in” a chi uhi.

⁴¹Saul in TOUPA Israelte Pathian kiang ah, “A diktak hon hihlang in, a chi a, Aisan pen Jonathan leh Saul tung ah a puk a; mipite bel a hul uhi.

⁴²Saul in, “Kei leh ka tapa kikal ah aisan un,” a chi hi. Huchi in Jonathan tung ah a puk hi.

⁴³Saul in Jonathan kiang ah, “Bang ahia na hih honhilh in” a chi hi. Jonathan in a hilh a, “Ka chiang tawi mong in khuaizu neuchik ka na chiam hi. Ngai in, ka sih ding mah ahi” a chi hi.

⁴⁴Saul in, “Pathian in a hihhih in hih mai hen. Huai sang a thupizaw in leng. Jonathan, na si ngeingei ding ahi” a chi hi.

⁴⁵Mipite’n Saul kiang ah, “Israelte lak a hiai hotdamna thupi mahmah hihpa Jonathan a si dia hia? Si lou hial ding. TOUPA a hinlai teng a samzang khat leng lei ah a ke hetkei ding. Tuni in Pathian toh a semkhawm uhi” a chi uh. Mipite’n Jonathan a hondam ua, a sikei hi.

⁴⁶Saul in Philistia mite a delhlai a kiksanta a, Philistia mite amau om mun ah a paita uhi.

⁴⁷Saul in Israelte tung ah vaihawmna a la a, a ning teng ah a melmate, Moab, Ammon suante, Edom, Zobah kumpipate leh Philistia mite a dou a; a kiheina peuh ah a vualzou zel hi.

⁴⁸Hangsantak in gal a dou a, Amalekte a zou a, a lokmite khut apan Israelte a honkhia hi.

⁴⁹Saul tapate bel Jonathan, Jishul leh Malkishua ahi ua, a tanu nihte min hiaite ahi; a upa zaw min Merab ahi a, a naupang zaw min Mikal ahi.

⁵⁰Saul zi min Ahinoam ahi a, amah Ahimaaz tanu ahi. A sepaih heutu min Abner ahi a, amah Saul pangak Ner tapa ahi.

⁵¹Kish bel Saul pa ahi a. Abner pa Nar bel Abiel tapa ahi.

⁵²Saul damsung teng in Philistia mite toh nakpitak in a kidou uhi. Saul in mi hat leh hangsan a muh peuhmah a nuai a sem din a lazel hi.