Read Paite Chin 1 SAMUEL 15 Bible Online

1 SAMUEL 15 - Paite Chin bible

1 SAMUEL 15

¹Huan, Samuel in Saul kiang ah, “TOUPA’N a mite tung ah, Israelte tung ah kumpipa dia nang sathau honnilh dia a honsawl ka hi. huaiziak in, tuin TOUPA thugen ngaikhia in.

²Sepaihte TOUPA’N, Amalek mite’n Israelte tung a a thilhih uh, Aigupta gam apan a hongpawt khiak lai ua lampi a a na dal dan ka theigige hi.

³Amalekte dou din kuan inla, a thilneih tengteng uh hawi himhim neilou in hihmang vek in. Numei leh pasal, naungek leh nawi nelai, bawngtal leh belam, sangawngsau leh sabiltung tan in that vek in, a chi” a chi hi.

⁴Huchi in Samuel in mipite a samkhawm a, Telaim khua ah amaute a sim a, sepaih nuai nih leh Judah mi sing khat ahi uh.

⁵Saul Amalekte khua a tungsuk a, guam ah a na buk hi.

⁶Saul in Kente kiang ah, “Hongpawt unla, Amalekte apan kihui khia un. Huchilou in zaw, ka honthat tel kha ding. Nou zaw Israel suan tengteng Aigupta apan a hongpawt khiak lai un nana hehpih ua” a chi hi. Huchi in Kente Amalek mite lak apan a pawtkhia uhi.

⁷Saul in Amalek mite Havilah apan Aigupta gam gei a Shur tan in a dou hi.

⁸Amalek mite kumpipa Agag a hingmata, mipi tengteng namsau in a satlum vek hi.

⁹Himahleh Saul leh mipite’n Agag a hawi ua, belam leh bawngtal hoihhoih, a thauthau, belamnoute, a hoih tengteng a that nuam kei uh. A hoihlou leh a deihlouh peuhmah uh bel a thatvek uhi.

¹⁰TOUPA thu Samuel kiang ah a hongtung hi.

¹¹“Saul kumpipa dia ka seh ka kisik hi. Honzui lai hon ki nungngatsan in ka thupiak bang in a hih ngalkei a” a chi hi. Hiai in Samuel a hehsak a, zankhua in TOUPA a sam hi.

¹²Saul mu din Samuel zing khangpi in a thou a, Karmel ah Saul a hoh hi. Ngai in, huai ah amah theihgigena suang a phut a, a kiknawn a, a pai zel a, Gilgal ah a paisukta, chih Samuel hilh in a om hi.

¹³Saul kiang Samuel a hongtung a, a kiang ah, “TOUPA’N hon vualzawl hen. TOUPA thupiak bang in ka hihta” a chi hi.

¹⁴Samuel in, “Tua belam ham ka bil a honglut leh bawng ham ka zakte bangchidan ahi dia le?” a chi hi.

¹⁵Saul in, “Amalek mite a hon laksak uh ahi. TOUPA na Pathian kiang a kithoihna din mipite’n belam leh bawngtal hoihhoih a hawi uhi. A dang tengteng ahihleh ka thatvek uhi” a chi hi.

¹⁶Samuel in Saul kiang ah, “Daiin, TOUPA’N tu zan a ka kiang a a thugen k’on hilh ding” a chi hi. Aman a kiang ah, “Gen dihve” a chi hi.

¹⁷Samuel in, “Nang ngaih in mi neuchik himah lechin leng, Israel nam heutu dia bawl na hi kei maw? TOUPA’N Israelte kumpipa din sathau a hon nilh hi.

¹⁸TOUPA’N nang a hon sawlkhia a, Kuan inla, mikhialte, Amalek mite thatvek inla, a manthat sipsip masiah uh dou zel in, a honchi hi.

¹⁹Bangdia TOUPA thu zuilou a, gallak thilte a boh a na boh a, TOUPA mitmuh a thil hoihlou na hih mawk?” a chi hi.

²⁰Saul in Samuel kiang ah, “E, TOUPA thu ka zui vaw oi, TOUPA’N honsawlna ah kahoh a, Amalek kumpipa Agag ka honman a, Amalek mite ka that vek vaw oi.

²¹Himahleh mipite’n gallak thil belam leh bawngtal hihman ding lak ah a hoihhoih Gilgal khua a TOUPA na Pathian kiang a kithoihna din a hontawi uh” a chi hi.

²²Samuel in, “TOUPA’N TOUPA thu zuih a kipahpih bang in haltum thillatte leh kithoihnate a kipahpih ahia? Ngai in, kithoihna sang in thuman a hoihzaw a, belamtal thau sang in a thuman a hoihzaw hi.

²³Helna zaw aisan khelhna toh a kibang a, engtatna zaw milim biakna toh a kikim hi. TOUPA thu na nial ziak in Aman leng kumpipa din nang a hon nialta hi” a chi hi.

²⁴Saul in Samuel kiang ah, mipite lau a, a thu uh ka manna lam ah TOUPA thupiak leh nang thu ka na bohse maizen a; ka na khialta hi.

²⁵Huaiziak in, tuin ka khelhna ngaidam inla, TOUPA ka biak theihna din kei lam ah hong kihei nawn in, a chi hi.

²⁶Samuel in Saul kiang ah, “TOUPA thu na nialta a, nang lam ah ka hong kiheinawn kei ding. TOUPA’N Israelte kumpipa din a hon deihkei” a chi hi.

²⁷Huchi in Samuel paidia a kihei leh a puan-mong ah a len a, a kekta hi.

²⁸Huchi in Samuel in a kiang ah, “Tuni apan TOUPA’N Israel gam a honsutta, nang sang a hoihzaw na inveng kiang ah a peta hi.

²⁹Israelte thagui a zuaukei dia, a kisik sam kei ding. Mihing bang a kisik nawn themthum mi ahi ngal kei hi” a chi hi.

³⁰Huchi in aman, “Ka na khialta hi. Himahleh ka mite upate leh Israelte ma a hon zahtak din k’on ngen hi. TOUPA na Pathian ka biak theihna din kei lam ah hong kihei in aw” a chi hi.

³¹Huchi in Samuel in Saul a paipihta a, Saul in TOUPA a bia hi.

³²Samuel in, “Amalek mite kumpipa Agag ka kiang ah honpi un” a chi hi. Samuel kiang ah ling kawm in Agag a vahoh hi. Agag in sihna mulkimhuai in hon paikhengta eive, a chi hi.

³³Samuel in, “Na namsau in numeite ta neilou dia a bawl bang in na nu leng numei lak a ta neilou mi ahi ding” a chi hi. Huchi in Samuel in Agag Gilgal khua ah TOUPA ma ah a satzanta hi

³⁴Huchi in Samuel Ramah khua ah a pai a; Saul bel a inn ah Saul omna khua Gibeah ah a paitouta hi.

³⁵Huchi in Samuel in a sih ni pha in Saul a mu nawnta kei hi. Samuel bel Saul ziak in a lungkham hi. Israelte kumpipa dia Saul a na tel ziak in TOUPA a kisik hi.