Read Paite Chin 1 SAMUEL 17 Bible Online

1 SAMUEL 17 - Paite Chin bible

1 SAMUEL 17

¹Huan, Philistia mite’n kidou din a sepaihte uh a kaikhawm ua, Judah gamsung Soko khua ah a kikhawm uhi. Ephes Dammim mun ah Soko khua leh Azekah khaw kikal ah panmun a khoh uhi.

²Saul leh Israel mite a kikhawm ua, Ela guam ah panmun a khoh uh. Philistia mite na dal din a kiphalh uhi.

³Philistia mite tang pang ah a om ua, Israel mite bel a langkhat tang pang ah a om ua, a kikal uah guam a om hi.

⁴Philistia mite panmun apan a mi hat uh, a min Goliath, Gath khaw mi, tong guk leh khap khat a sang a hong pawtkhia hi.

⁵Dal lukhu a khu a, awmphaw a silh a; a awmphaw gikdan dal sekel sang nga ahi.

⁶A ngal ah dal ngalphaw a bun a, a nungzang ah dal teita a kuah hi.

⁷A tei peu siamkol bang ahi a; a tei lu bel sik sekel za guk a gik ahi. A phaw pawpa a ma ah a pai hi.

⁸A ding a, Israel sepaihte a sam a, a kiang uah, Bangdia kidou dia hong kiphalh na hi ua? Kei Philistia mi, nou Saul sikha na hi kei uh maw? Mi kitel unla ka kiang ah hong paisuk hen.

⁹A hon sual a a honthah leh na sikha un ka om ding uh. Himahleh ken ka zoh a ka thah leh ka sikha un na om ding ua, ka na uh na sem ding uh, a chi hi.

¹⁰Philistia mi in, Tuni in Israel sepaihte ka tou a, mi khat hon kuansak unla ka na kisual ding uh, a chi hi.

¹¹Saul leh Israel tengteng in huai Philistia mi thugente a zak un, a lunglel ua, lauh petmah in a lauta uh.

¹²David Jesse tapa ahi a, amah bel Judah gam a Bethlehem, Ephrath mi ahi a, tapa giat a nei hi. Amah Saul hunlai in tektak ahi khin a, tektak a ngaih ahi khinta hi.

¹³Jesse tapa upa zaw thum in kidouna ah Saul a zui uhi. A tapa thum kidouna a hohte min a upapen Eliab, a zom Abinadab, a thumna Shammah ahi.

¹⁴David a naupangpen ahi a, a u thumte’n Saul a zui uhi.

¹⁵David, Bethlehem ah a pa belam kem in Saul kiang apan a vahoh hi.

¹⁶Philistia mi in zingsang leh nitak teng in a va naihzel a, ni sawmli sung a va kitaklang zel hi.

¹⁷Jesse in a tapa David kiang ah, “Vaimim kan ephah khat leh hiai tanghou beu sawm pua inla, na unaute kiang ah a giahmun uah va hohpih pah in.

¹⁸Bawngnawi dat khal sawm a pawl ua sang heutupa adin puak inla; na unaute bangchi’n a om ua va en inla, a tanchin uh theihna banghiam hon pua in” a chi hi.

¹⁹Saul leh amau leh Israel mi tengteng Philistia mite dou din Elah guam ah a om uhi.

²⁰David zingkhang in a thou a, belamte chingmi khat a kemsak hi. Jesse in thu a piak dungzui in a pua a, a kuanta hi. Kidouna mun a pawtkhe lel sepaihte kidou dia a kikou zuazua laitak un amah kangtalai omna mun a va tung hi.

²¹Israelte leh Philistia mite kidou din a na kikhung ua, sepaih leh sepaih a na ki galsai uhi.

²²David in a kemmi khut ah a van a koih a, sepaihte kiang lam ah a vatai a, a ute chibai a vabuk hi.

²³Amaute a houpih laitak in ngai in, a mi hat uh Gath khua a Philistia mi a min Goliath Philistia mite sepaih pawl lak apan a hong paisuk a, a thugen ngeimah a hong gennawn hi. Huai thu David in a zata hi.

²⁴Israel mi tengteng in huai mi a muh un, a taikek ua, lauh petmah in a lau uhi.

²⁵Israel mite’n, “Huai mihing hong kuan khia na mu hia? Israel mite tou dia hong kuan khia ahi. Kuapeuh amah that kumpipa’n nakpitak in sum lam in a hih hausa dia, a tanu a pedia, a pa inkuan Israelte lak ah a zalen sak ding” a chi uhi.

²⁶David in a kiang a dingte kiang ah, “Hiai Philistia mi that a, Israelte minsiatna lamang mi bangchi bawl ahi dia? Hiai zeksumlouh Philistia mi kua ahia a hih, Pathian hing sepaihte a touvial mahmah” a chi hi.

²⁷Mipite’n huchi in a dawng ua, “Amah that peuhmah ka gen bang ua bawl ahi ding” a chi uh.

²⁸A u upapen Eliab in mite kiang a, a thugen lai a naza hi. David tung ah Eliab a heh guih a, “Bangdia hongsuk na hia? Gamdai a belam tamlou omte kua chingsak na hia? Na kisaktheihdan leh na lungsim hoihlouh dan ka thei. Kidou en ding bang in na hong mawkmawk a” a chi hi.

²⁹David in “Bang ka hih a ahia? A ziak om hilou ahi maw?” a chi hi.

³⁰Aman midang lam a ngatsan a, a gen ngeimah a gen hi. Mipite’n a ma amah bang in a dawng nawn uhi.

³¹David thugen a zak un Saul kiang ah a gensawn ua; aman a sam hi.

³²David in Saul kiang ah, “Amah ziak in kuamah lungsim lunglel kei heh. Na sikha in huai Philistia mi ka vasual ding” a chi hi.

³³Saul in David kiang ah, “Nang zaw huai Philistia mi sual din na kuan theikei ding, valnou phet na hi ngal a. Amah lah a valnou tung apan galdou siammi ahi” a chi hi.

³⁴David in Saul kiang ah, “Na sikha in a pa belamte a chinlai in, humpinelkai hiam vompi hiam a hong kuan a, belamhon lak apan belamnou a man hi.

³⁵Ka delhzui a, ka sual a, a kam apan ka hunkhe zel hi. Amah hongsual tum in a hong ding a, ken a baksam ah ka man a, ka sual a, ka that zel hi.

³⁶Na sikha in humpinelkai leh vompi ka that tuaktuak hi. Huai zeksumlouh Philistia mi amau bang in a omsam ding hi. Pathian hing sepaihte a touvial a” a chi hi.

³⁷David in, “Humpinelkai khutbom apan leh vompi khutbom apan kei hon hunkhepa TOUPA’N huai Philistia mi khut apan a hon hunkhe ding” a chi hi. Saul in David kiang ah, “Kuan in, na kiang ah TOUPA om hen!” a chi hi.

³⁸Saul in amah galthuam David a silhsak a, dal lukhu a khusak a, awmphaw a silhsak hi.

³⁹David in a galvan tung ah a namsau a kuah a, pai din a kisa hi. Huchibang a chiamteh ngei naikei hi. David in Saul kiang ah, “Ka paipih theikei. Hichibang ka chiamteh ngeikei” a chi hi. Huchi in David in a galthuam a suahta hi.

⁴⁰A chiang a tawi a, luita a suang mum mam pilhpelh nga a tel hi. A belamchinna ip, a kawlzal ah a kuah hi. A vaisuanglot a tawi a, Philistia mi a vazuan naita hi.

⁴¹Philistia mi a hongpai zel a, David a zuan nai hulhul a; a lum tawipa a ma ah a pai hi.

⁴²Philistia min a en vialvial a, David a muh leh a simmawh mahmah hi. Amah lah san chiuchiau, mithah kilawm tak, valnou lel lah ahi ngal a.

⁴³Philistia mi in David kiang ah, “Ui ka hi maw chiangte toh ka kiang a na hongpai?” a chi hi. Philistia mi in a pathiante lou in David a hamsiat khumta hi.

⁴⁴Philistia mi in David kiang ah, “Ka kiang ah hongpai in, na sa tung a leng vasate leh gamsate ka nesak ding” a chi hi.

⁴⁵David in Philistia mi kiang ah, “Nang zaw namsau, tei leh teita tawi in n’ong kuan hi. ‘Kei zaw sepaihte TOUPA, Israel sepaihte Pathian ka TOUPA min in ka hong kuan zaw hi.

⁴⁶Tuni in TOUPA’N ka khut ah nang a honpe ding hi. Huchi in ka honthat dia, na lutang ka tan ding. Philistia sepaihte luangte tuni’n tung a leng vasate leh gamsate ka nesak ding hi’. Huchi in, leitung a mi tengteng in Israel ah Pathian a om chih a thei ding uhi.

⁴⁷Hiai a kikhawm tengteng in TOUPA’N namsau leh tei in a hondam kei chih a thei ding uh. Kidouna lah TOUPA kidouna ahi ngal a. Aman ka khut uah noute a honpe ding” a chi hi.

⁴⁸Hichi ahi a, Philistia mi a hong kuan a, David sual dia a honnaih leh David sepaihte lam ah Philistia mi sual din a tai gepgep hi.

⁴⁹David in a ip a sawk a, suang khat a lakhia a, a vaisuanglot in a lawn a, Philistia mi taltang tak ah a deng hi. A taltang ah suang a lut a, a khup in a puk helhul maimah hi.

⁵⁰Huchi in David in vaisuanglot leh suang in Philistia mi a zou hi. Philistia mi a deng a, a thatta hi. Himahleh David in namsau a tawi kei.

⁵¹Huaiziak in, David a tai a, Philistia mi tung ah ading hi. A namsau a la a, a pai apan a dokkhia a, huai in a that a, a lu a tanta hi. Philistia mite’n a mi hat uh a sita, chih a theih un a taikekta uh.

⁵²Israel mite leh Judah mite a thou ua, a kikou ua, Philistia mite Gath leh Ekron kulh kongkhak pha in a delh uh. Philistia mite lak a liamte Shaaraim lam tawn in Gath leh Ekron pha in a puk zengzung uhi.

⁵³Israel suante’n Philistia mite a delh uh a tawpsan ua, a hong kiknawn ua, a giahmun uh a lok uhi.

⁵⁴David in Philistia mi lu a la a, Jerusalem ah a paipih a, a galvan bel a puanin ah a koih hi.

⁵⁵Saul in Philistia mi sual dia David kuan a muh in sepaih heutu Abner kiang ah, “Abner, hiai valnou kua tapa ahia?” a chi hi. Abner in “Na hinna lou in ka gen, toupa aw, ka theikei,” a chi hi.

⁵⁶Kumpipa’n “Hiai naupang kua tapa hiam dongkhia in” a chi hi.

⁵⁷Philistia mi that David a hongpai in Abner in a pi a, Philistia mi lu tawikawm in Saul kiang ah a paipih hi.

⁵⁸Saul in a kiang ah, “Tangval, kua tapa na hia?” a chi hi. David in a dawng a, “Bethlehem mi na sikha Jesse tapa ka hi” a chi hi.