Read Paite Chin 1 SAMUEL 18 Bible Online

1 SAMUEL 18 - Paite Chin bible

1 SAMUEL 18

¹Huan, hichi ahi a, Saul kiang a thu a gen khit in Jonathan hinna leh David hinna a hong kipeh geih a, huchi in Jonathan in amah hinna a it bang in amah a it hi.

²Saul in huai nin a omsak ngal a, a pa inn ah a paisak nawnta kei hi.

³Huchi in Jonathan leh David in thu a khung ua, amah hinna bang geih a amah a it ziak in.

⁴Jonathan in a puansilhlai a suah a, David a pia a, a kivatna leh a namsau leh a thalpeu leh a taigakna nangawn a pia hi.

⁵Saul in a sawlna peuh ah David a hohzel a, kizentak in a gamtang hi. Saul in sepaihte heutu in amah a bawl a, huai mi tengteng ngaih in leh Saul sikhate ngaih in a hoih hi.

⁶A hongpai un hichi ahi a, Philistia mi that David a hongpai in Israel khaw teng ah numeite lasa leh lam kawm in khuangta leh thilging theite toh, nuamsatak in kumpipa Saul dawn din a hong pawtkhia uhi.

⁷Numeite’n lam kawm a la a kidawng tuah in, “Saul in asang asang a that, David in asing asing” a chi uhi.

⁸Hiai lasak in Saul a kipaksak kei a, a heh mahmah hi. David bel asing asing thatin a ngai ua, kei ka hihleh asang asang kia thatin a hon ngai uh. Gam lou ngal a tanding dang bang ahia omta? a chi hi.

⁹Saul in huai ni apan David a hazat bawlta hi.

¹⁰Hichi ahi a, a zingsang in Saul tung ah Pathian sawl dawi a hongtung a, inn sung ah thu a gen hi. David in nidang a a hih mah bang in kaihging a tum hi. Saul in a teipi a tawi hi.

¹¹Saul in a teipi a khoh a, huai bang ah David ka khohden ding, a chi hi. David in nihvei a kihep khiaksan hi.

¹²A kiang a TOUPA a om ziak leh Saul a paisan ziak in Saul in David a lau hi.

¹³Huaiziak in, Saul in amah apan a kisuansak a, a sepaih sang tung a heutu in a bawl hi. Huchi in David mipi lak ah lut in a pawt zel hi.

¹⁴David bel a hih peuhmah ah piltak in a gamtang zel a; TOUPA a kiang ah a om hi.

¹⁵Saul in piltak in a gamtang chih a muh in a lau hi.

¹⁶Himahleh Israelte leh Judahte tengteng in David a it ua; a lak ua lut a pawt zel lah ahi ngal a.

¹⁷Saul in David kiang ah, “Ngai in, ka tanu upa zaw Merab na zi din k’on neisak ding. Hangtak in hon gum peuhmah lechin. TOUPA kidounate dou in” a chi hi. Saul in, “Ken zaw a tung a khut khalou in Philistia mite’n a tung ah khut kha zaw uhen” a chi hi.

¹⁸David in Saul kiang ah, “Kua ahia ka hih a, ka hinna leh Israelte lak a ka pa inkuante leng bang ahia a hih uh, kumpipa makpa ka hihna ding?” a chi hi.

¹⁹Himahleh hichi ahi a, Saul tanu Merab David toh kitensak a hong hun in Meholath mi Adriel zi din a pe mawk hi.

²⁰Saul tanu Mikal in David a it a; Saul a hilh ua; huai in a kipaksak hi.

²¹Saul in, “A awkna ding thang a hong hih theihna ding leh Philistia mite’n a tung a khut a khak theihna ding un amah ka pe ding” a chi hi. Huaiziak in, Saul in David kiang ah, “Tuni’n ka makpa na hihna ding hunlem a nihveina na nei” a chi hi.

²²Huchi in Saul in a sikhate thu a pia a, “A simtham in David houpih unla, ngai in, kumpipa na tung ah a kipak mahmah a, a sikhate tengteng in leng nang a hon it uh. Huchi in kumpipa makpa in om in” chi un, a chi hi.

²³Saul sikhate’n huai thu David bil ah a gen uh. David in, “Mi genthei leh kuamah theihphak ngellouh kei adin kumpipa makpa hih thil namai in na sep ua hia?” a chi hi.

²⁴Saul sikhate’n, “David in huchibang in a chi” chi’n a hilh uh.

²⁵Saul in David kiang ah hichibang in na chi ding uh, “Kumpipa’n kumpipa melma phulakna din Philistia mite zekvun za khat chihlouh man bangmah a deihkei a chi” chi un, a chi hi. Saul in David lah Philistia mite khut a sihsak lungsim in a nei bikbek hi.

²⁶A sikhate’n huai thu David a hilh uleh kumpipa makpa hih David a kipak mahmah hi.

²⁷Huchi in ni chiamte a beima in, David leh a mite a thou ua, Philistia mite za nih a va that uh. David in a zekvun uh a honpua a, kumpipa makpa a hih theihna din kumpipa kimtakin a pia hi. Huchi in Saul in a tanu Mikal a zi din a peta hi.

²⁸Saul in David kiang ah Pathian a om chih a theitelta hi. Saul tanu Mikal in amah a it hi.

²⁹Huchi in Saul in David a lau semsem a, Saul bel David melma ahi denta hi.

³⁰Philistia miliante a va kuankhe zel uh. Hichi ahi a, a kuan khiak peuhmah chiang un David bel Saul sikha tengteng sang a piltak a a gamtat ziak in a min a thang semsem hi.