Read Paite Chin 1 SAMUEL 19 Bible Online

1 SAMUEL 19 - Paite Chin bible

1 SAMUEL 19

¹Huan, Saul in a tapa Jonathan leh a sikha tengteng kiang ah David that un, a chi hi.

²Himahleh Saul tapa Jonathan in David a deihthoh mahmah hi. Jonathan in, “Ka pa Saul in thah din hon zong hi, huaiziak in, zingchiang in zingsang in pilvang inla mun guk ah bu nilouh in.

³Ka pawtkhe dia, na omna gamlak ah ka pa kiang ah ka va ding dia, na tungtang thu ah ka pa ka houpih ding. Huchi in ka theih k’on hilh ding” a chi hi.

⁴Jonathan in a pa Saul ma ah David a phat a, a kiang ah, “Kumpipa a sikha David tung ah khial hetkei hen. Na tung ah lah a khial kei a, a thilhihte lah nang adia hoih pipi ahizaw ngal ua.

⁵Sih khawksalou in Philistia mi a sual a, TOUPA’N Israel tengteng adin hotdamna thupitak a sep khiaksak hi. Huai nangngei in na mu a, na kipak mahmah hi. Huaiziak in, sisan poikhoihlou tung ah bang ding in ahia na khelh ding, a ziak bangmah omlou a David na thah ding?” a chi hi.

⁶Huchi in Saul in Jonathan thugen a zui hi. Saul in kichiam in, “TOUPA a hin laiteng amah thah ahi kei ding” a chi hi.

⁷Jonathan in David a sam a, huai thil tengteng a hilh hi. Jonathan in David Saul kiang ah a pi a, tuma lam mah bang in a kiang ah a om nawnta hi.

⁸Kidouna a hongom nawn a, David a kuan khia hi. Philistia mite a vasual a, tamtak a vathat a, a ma ah a taikek uhi.

⁹Saul bel a inn a teipi tawi a, a tutlai in TOUPA sawl dawi a tung ah a hongtung hi. David in kaihging a tum hi.

¹⁰Saul in a teipi in David bang toh khohden a tum hi. Himahleh Saul kiang apan a kitholh khegeih a, teipi pen bang ah a khohtal hi. Huchi in David a taikhia a, huai zan in a suakta hi.

¹¹Saul in a zingsang a David tang a that ding in mi a sawl hi. David zi Mikal in, tu zan a na hinna na humbit kei leh zingchiang in a honthat ding uh, chi in a hilh hi.

¹²Mikal in David tohlet ah a khai khesuk a; huchi in a taimang a, a suakta hi.

¹³Mikal in milim a la a, lupna ah a lumsak a, a lu lam ah kelmul lukham a koih a, puan in a khuh hi.

¹⁴David pi dia Saul in mi a honsawl kiang ah, “A chi a na” a na chi hi.

¹⁵Saul in David va en din mi a sawl nawn a, “A lupna toh hon zawngtou le uchin ka na that ding” a chi hi.

¹⁶A mi sawlte a va lut uleh, ngai in, lupna ah milim a lu lam a kelmul lukham kham in a na om hi.

¹⁷Saul in Mikal kiang ah, “Bangdia hichibang a hon zekhem a, bitna dia ka melma pawtsak na hia?” a chi hi. Mikal in Saul a dawng a, “Hon paisak in, bangdia nang honthat ding ka hia?” a honchi, a chi hi.

¹⁸Huchi in David a taimang a, a suakta hi. Ramah khua a Samuel kiang a va tung a, Saul in a tung a a thilhih tengteng a va hilh hi. Amah leh Samuel a kuan ua, Naioth ah a om uhi.

¹⁹Ngai in, Ramah khua a Naioth ah David a om, chi in Saul a hilh uh.

²⁰Huchi in David pi din Saul in mi a sawl hi. Zawlnei pawlte lasak lai leh Samuel a tung ua heutu a om a vamuh un Saul in a mi sawlte tung ah Pathian Kha a hongtung a, amau leng la a sata uhi.

²¹Huai Saul a hilh uleh, midang a sawl nawn a, amau leng la a vasa sam uh. Saul in a thumveina din mi a sawl nawn a, amau leng la a vasa sam uhi.

²²Amah leng Ramah khua ah a va hoh a, Seku mun a tuileh lian mahmah a va pha hi. “Samuel leh David koi a om ahi ua?” chi in a dong hi. Mi kuahiam khat in, “Ngai in, Ramah khua a Naioth ah a om uh” a chi hi.

²³Ramah khua a Naioth ah a hoh a; Pathian kha a tung ah a hongtung samta a, a pai zel hi. Ramah khua a Naioth a tun tan in la a sazel hi.

²⁴Aman a puansilhte leng a suahsam a, Samuel ma ah la a sa a, huai ni nitum leh huai zankhua in vuaktang in a lum hi. Huaiziak in, “Saul leng zawlnei lak a telsam ahi maw?” a chi uhi.